ເປີດມື້ອື່ນງານວາງສະແດງສິນຄ້າເຟີນີເຈີວຽງຈັນ ຄັ້ງທີ 4

317

ງານວາງສະແດງເຟີນີເຈີວຽງຈັນ ຄັ້ງທີ 4 ປະຈຳປີ 2019 ເລີ່ມເປີດໃຫ້ມວນຊົນເຂົ້າທ່ຽວຊົມແລ້ວ ສ່ວນມື້ເປີດເປັນທາງການແມ່ນວັນເສົາທີ 23 ມີນາ 2019 ເປັນຕົ້ນໄປ ເຊິ່ງໃນງານມີຜູ້ປະກອບການໂຮງງານປຸງແຕ່ງໄມ້, ແກະສະຫຼັກໄມ້ ເຂົ້າຮ່ວມ 75 ຫົວໜ່ວຍ ລວມຫ້ອງວາງສະແດງທັງໝົດ 191 ຫ້ອງ.

ຫ້ອງການສະມາຄົມເຟີນີເຈີ ລາວ ( ສຟລ ) ໄດ້ເຜີຍຂໍ້ມູນຄວາມພ້ອມການຈັດງານ ມາຮອດປັດຈຸບັນ 98%, ສ່ວນຜູ້ປະກອບການໂຮງງານປຸງແຕ່ງໄມ້ ແລະ ໂຮງຊ່າງຫັດຖະກໍາເຂົ້າຮ່ວມ ມີ 75 ຫົວໜ່ວຍ. ໃນນັ້ນ, ຜູ້ປະກອບການໃນນະຄອນຫຼວງວຽງຈັນ ມີ 58 ຫົວໜ່ວຍ, ມາຈາກບັນດາແຂວງ 17 ຫົວໜ່ວຍ ນອນໃນ 10 ແຂວງໃນທົ່ວປະເທດ ແລະ ພ້ອມແລ້ວທີ່ຈະນຳສິນຄ້າຂອງຕົນເຂົ້າມາວາງສະແດງ ແລະ ຈຳໜ່າຍ ເພື່ອໃຫ້ຜູ້ມາທ່ຽວງານໄດ້ເລືອກຊື້ໄປຊົມໃຊ້ເຊິ່ງຕາມທີ່ສັງເກດເຫັນຜ່ານມາໃນສ່ວນຂອງລູກຄ້າກໍຈະມີທັງພາຍໃນ ແລະ ຕ່າງປະເທດ ໂດຍສ່ວນໃຫຍ່ຈະແມ່ນລູກຄ້າຈາກ ສປ ຈີນ ແຕ່ວ່າເຂົາຈະໃຫ້ຄວາມສົນໃຈຫຼາຍໜ້ອຍພຽງໃດ ກໍຕ້ອງຂຶ້ນກັບຄວາມສວຍງາມ, ໄດ້ມາດຕະຖານຂອງຜະລິດຕະພັນ ແລະ ທີ່ສຳຄັນ ເມື່ອຊື້ໄປແລ້ວກໍຕ້ອງນຳກັບປະເທດໄດ້.

ທ່ານ ບຸນເພັງ ເພັງສີສະຫວັດ ຫົວໜ້າຫ້ອງການ ສຟລ ບອກກັບນັກຂ່າວພວກເຮົາ ວ່າ: ການວາງສະແດງຖືວ່າເປັນວຽກງານໜຶ່ງທີ່ ສຟລ ກໍານົດເປັນແຮງຊຸກຍູ້ທີ່ເຮັດໃຫ້ຜູ້ປະກອບການມີຄວາມຫ້າວຫັນ, ຄວາມສາມັກຄີພາຍໃນ ເພື່ອຜັນຂະຫຍາຍຄໍາສັ່ງ 15/ນຍ ໃຫ້ເປັນຈິງ, ຜະລິດສິນຄ້າເຟີນີເຈີຕອບສະໜອງຕະຫຼາດ ເພື່ອນໍາເອົາທ່າແຮງບົ່ມຊ້ອນໃຫ້ເກີດດອກອອກຜົນຫຼາຍກວ່າເກົ່າ ເຮັດໃຫ້ການຈໍລະຈອນສິນຄ້າເຟີນີເຈີໃນຕະຫຼາດລາວມີການເຄື່ອນໄຫວຢ່າງຕໍ່ເນື່ອງ ແລະ ລຽນຕິດ ເຮັດໃຫ້ຕະຫຼາດເຟີນີເຈີເຂົ້າເຖິງຊຸມຊົນ, ກຸ່ມລູກຄ້າ, ຜູ້ຢາກໄດ້ສິນຄ້າຄຸນນະພາບກໍເຂົ້າມາໃນງານແຫ່ງດຽວ ເຖິງວ່າລູກຄ້າເຂົ້າມາບໍ່ໄດ້ສິນຄ້າທີ່ຕ້ອງການກໍສາມາດສັ່ງຜະລິດພິເສດໄດ້ ອັນນີ້ສໍາຄັນທີ່ສຸດໃນການວາງສະແດງແຕ່ລະຄັ້ງ.

ງານແຕ່ລະຄັ້ງຜູ້ປະກອບການລາວໄດ້ບົດຮຽນອັນລໍ້າຄ່າທີ່ສຸດ ໂດຍສະເພາະແມ່ນການຮຽນຮູ້, ການດຳເນີນທຸລະກິດ ເອັສເອັມອີ, ການເຂົ້າເຖິງແຫຼ່ງທຶນ, ການເຂົ້າເຖິງຕະຫຼາດ, ການວາງສະແດງສິນຄ້າໃຫ້ລູກຄ້າໄດ້ເຫັນ – ຈັບຕ້ອງ – ສໍາຜັດ ລວມໄປເຖິງການແລກປ່ຽນຄວາມຮູ້ເຊິ່ງກັນ ແລະ ກັນ ລະ ຫວ່າງຜູ້ປະກອບການດ້ວຍກັນ. ບັນດາສິນຄ້າທີ່ເຂົ້າມາວາງສະແດງລ້ວນແລ້ວມີຄວາມໂດດເດັ່ນເປັນເອກະລັກຂອງລາວເຮົາ ໂດຍສະເພາະແມ່ນການນໍາໃຊ້ຫົວຄິດປະດິດສ້າງທີ່ເປັນມູນເຊື້ອ ນໍາມາອອກແບບໃນສິນຄ້າ ເຊັ່ນ: ເຄື່ອງຫັດຖະກໍາຕ່າງໆ, ເຄື່ອງເງິນ, ເຟີນີເຈີ ເປັນຕົ້ນ.

ງານວາງສະແດງເຟີນີເຈີວຽງຈັນ ຄັ້ງທີ 4 ປະຈຳປີ 2019 ຈະຈັດຂຶ້ນໃນລະຫວ່າງວັນທີ 23 – 31 ມີນາ 2019 ທີ່ສູນການຄ້າ ລາວ – ໄອເຕັກຕຶກເກົ່າ ນະຄອນຫຼວງວຽງຈັນ.