ປາຖະກະຖາວັນສ້າງຕັ້ງພັກ ຄົບຮອບ 64 ປີ

828

ພັກປະຊາຊົນ ປະຕິວັດລາວແມ່ນພັກທີ່ສືບທອດພາລະກິດຂອງພັກກອມມູນິດອິນດູຈີນ ໂດຍແມ່ນ ທ່ານ ໄກສອນ ພົມວິຫານເປັນຫຼັກແຫຼ່ງໃນການນໍາພາກໍ່ຕັ້ງ ແລະ ຖະນຸບໍາລຸງ ເຊິ່ງໄດ້ນໍາພາປະຊາຊົນບັນດາເຜົ່າດໍາເນີນການປະຕິວັດຊາດປະຊາທິປະໄຕ ໃນຫຼາຍທົດສະວັດຈົນສາມາດເຮັດສໍາເລັດພາລະກິດປົດປ່ອຍຊາດໄດ້.

ສູນກາງຊາວໜຸ່ມປະຊາຊົນ ປະຕິວັດລາວ ໄດ້ຈັດພິທີປາຖະກະຖາ ເນື່ອງໃນວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 64 ປີ ( ວັນທີ 22/3/1955 – 22/3/2019 ) ໃນວັນທີ 21 ມີນາ 2019 ທີ່ສູນກາງຊາວໜຸ່ມປະຊາຊົນ ປະຕິວັດລາວ, ນະຄອນຫຼວງວຽງຈັນ.

ໂດຍການປາຖະກະຖາຂອງ ທ່ານ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ. ມີເລຂາ – ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ, ຫົວໜ້າພະແນກ – ຮອງພະແນກ ແລະ ພະນັກງານພາຍໃນສູນກາງຊາວໜຸ່ມຮ່ວມຮັບຟັງເກືອບ 300 ທ່ານ.

ທ່ານ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ໄດ້ກ່າວໃນພິທີປາຖະກະຖາ ວ່າ: ຈຸດປະສົງໃນມື້ນີ້ກໍເພື່ອເປັນການສະເຫຼີມສະຫຼອງວັນສ້າງພັກປະຊາຊົນ ປະຕິວັດລາວ ຄົບຮອບ 64 ປີ ແລະ ຍັງເປັນການຫວນຄືນເຫດການສໍາຄັນໃນຄັ້ງປະຫວັດສາດ ເຊິ່ງພັກເຮົາໄດ້ສ້າງວິລະກໍາອັນດີງາມ ແລະ ເປັນມູນເຊື້ອໃຫ້ລູກຫຼານຈົນມາຮອດປັດຈຸບັນ. ນອກຈາກນີ້, ກໍເພື່ອໃຫ້ພວກເຮົາໄດ້ຈື່ຈໍາບຸນຄຸນໃນການຕໍ່ສູ້ກູ້ຊາດດ້ວຍ ຄວາມສາມາດທີ່ສະຫຼາດ ແລະ ພິລະອາດຫານ ຖ້າບໍ່ມີເພິ່ນໃນມື້ນັ້ນກໍບໍ່ມີເຮົາໃນມື້ນີ້ ພວກເຮົາເຊື່ອແນ່ວ່າເປັນການນໍາພາທີ່ຖືກຕ້ອງໃນການເດີນທາງໃນວັນຂ້າງໜ້າ.

ທ່ານຍັງໄດ້ຍົກໃຫ້ເຫັນມູນເຊື້ອປະຫວັດສາດແຫ່ງການກໍາເນີດ, ການເຕີບໃຫຍ່, ການເຄື່ອນໄຫວ ແລະ ການນໍາພາຂອງພັກໃນພາລະກິດຕໍ່ສູ້ກູ້ຊາດໃນເມື່ອກ່ອນ ກໍຄືການນໍາພາສ້າງສາພັດທະນາປະເທດຊາດໃນປັດຈຸບັນຂອງພັກປະຊາຊົນ ປະຕິວັດລາວ ໃນໄລຍະ 64 ປີ. ພາຍຫຼັງປົດປ່ອຍຊາດພັກປະຊາຊົນ ປະຕິວັດລາວ ຍັງສືບຕໍ່ນໍາພາປະຊາຊົນ ປະຕິບັດ 2 ໜ້າທີ່ຍຸດທະສາດ ຄື: ໜ້າທີ່ໃນການປົກປັກຮັກສາປະເທດຊາດ ແລະ ສ້າງສາພັດທະນາປະເທດຊາດຕາມແນວທາງປ່ຽນແປງໃໝ່ຂອງພັກ ຈົນສາມາດເຮັດໃຫ້ປະເທດຊາດມີບາດກ້າວຂະຫຍາຍຕົວໃໝ່.

ນອກຈາກນີ້, ຍັງໃຫ້ປະຊາຊົນໄດ້ຮັບການເປີດກວ້າງ, ຄວາມສາມັກຄີເປັນເອກະພາບທົ່ວປວງຊົນລາວນັບມື້ດີຂຶ້ນ, ສ້າງບົດບາດໃຫ້ປະເທດຊາດໄດ້ຮັບການເຊີດຊູໃນເວທີສາກົນສູງຂຶ້ນ ແລະ
ຊີວິດການເປັນຢູ່ຂອງປວງຊົນທັງຊາດໄດ້ຮັບການປົວແປງໃຫ້ດີຂຶ້ນເປັນບາດກ້າວ.