ສໍາມະນາວິທະຍາສາດບັ້ນຮົບປ້ອງກັນຕົວເມືອງທ່າແຂກ

409

ການສໍາມະນາວິທະຍາສາດ “ ບັ້ນຮົບປ້ອງກັນຕົວເມືອງທ່າແຂກ 21 ມີນາ 1946 ” ເບື້ອງຕົ້ນແມ່ນເລີ່ມຈາກການເຂົ້າຮ່ວມວາງພວງມາລາ ແລະ ກະຕ່າດອກໄມ້ຢູ່ 04 ຈຸດ ຂອງແຂວງ ຄື: ຫໍໄຫວ້ລະນຶກປະຫວັດສາດ 21 ມີນາ 1946, ອະນຸສາວະລີນັກຮົບນິລະນາມ, ອະນຸສາວະລີປະທ່ານ ໄກສອນ ພົມວິຫານ ແລະ ອະນຸສອນສະຖານ 21 ມີນາ. ຈາກນັ້ນ, ແມ່ນໄດ້ເຂົ້າຮ່ວມກອງປະຊຸມສໍາມະນາວິທະຍາສາດໂດຍໄດ້ຈັດຂຶ້ນໃນຕອນເຊົ້າຂອງວັນທີ 20 ມີນາ 2019 ຢູ່ທີ່ສະໂມສອນ ໃຫຍ່ຫຼັກ 4.

ກອງປະຊຸມຄັ້ງນີ້ເປັນກຽດຢ່າງສູງທີ່ໄດ້ຕ້ອນຮັບການເຂົ້າຮ່ວມຂອງທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ,  ລັດຖະມົນຕີກະຊວງປ້ອງກັນປະເທດ; ທ່ານພົນຕີ ແອສະໄໝ ເລືອງວັນໄຊ ຮອງລັດຖະມົນຕີກະຊວງປ້ອງກັນປະເທດທັງເປັນປະທານກອງປະຊຸມ; ເຂົ້າຮ່ວມມີ ທ່ານ ສົມໃຈ ເພັດສີນວນຮອງເລຂາພັກແຂວງ, ປະທານສະພາປະຊາຊົນແຂວງຄໍາມ່ວນ; ມີບັນດາທ່ານເຈົ້າແຂວງຈາກບັນດາແຂວງໃກ້ຄຽງ, ພະນັກງານປະຕິວັດອາວຸໂສບໍານານ, ທ່ານ ເຈິນກົງທິ່ງ ຫົວໜ້າກົງສຸນໃຫຍ່ ສສ ຫວຽດນາມ ປະຈໍາແຂວງສະຫວັນນະເຂດ ແລະ ພາກສ່ວນຕ່າງໆເຂົ້າຮ່ວມ.

ທ່ານ ພົນຕີ ແອສະໄໝ ເລືອງວັນໄຊ ຮອງລັດຖະມົນຕີກະຊວງປ້ອງກັນປະເທດ ໃນນາມປະທານກອງປະຊຸມໄດ້ກ່າວເປີດກອງປະຊຸມຢ່າງເປັນທາງການ ເຊິ່ງຕະຫຼອດໄລຍະຂອງການດໍາເນີນກອງປະຊຸມເປັນເວລາ 01 ວັນ ຜູ້ເຂົ້າຮ່ວມແມ່ນໄດ້ຮັບຮູ້, ເຂົ້າໃຈກ່ຽວກັບບົດຮຽນ ແລະ ປະສົບການຈາກວິທະຍາກອນທີ່ສັງກັດຢູ່ບັນດາກົມຂອງກະຊວງປ້ອງກັນປະເທດ, ກອງບັນຊາການທະຫານແຂວງຄໍາມ່ວນ, ພະນັກງານປະຕິວັດອາວຸໂສບໍານານຂັ້ນຕ່າງໆທີ່ໄດ້ຜ່ານບັ້ນຮົບມາແລ້ວໃນໄລຍະຕໍ່ສູ້ກູ້ຊາດ ເຊິ່ງບົດຮຽນທີ່ນໍາມາສໍາມະນາປະກອບມີ ຄື: ການຊີ້ນໍາ – ນຳພາຂອງຄະນະພັກແຄວ້ນລາວ ຕໍ່ກໍາລັງປະກອບອາວຸດ ແລະ ປະຊາຊົນບັນດາເຜົ່າເພື່ອຕີເອົາໄຊຊະນະພວກລ່າເມືອງຂຶ້ນ ແລະ ປົກປັກຮັກສາເມືອງທ່າແຂກ ໃນຕົ້ນປີ 1946, ເສີມຂະຫຍາຍມູນເຊື້ອພິລະອາດຫານ ແລະ ການສ້າງສາພັດທະນາແຂວງຄໍາມ່ວນຕະຫຼອດໃນໄລຍະເວລາ 70 ປີຜ່ານມາ ພາຍໃຕ້ການນໍາພາຂອງຄະນະພັກ – ອໍານາດການປົກຄອງແຂວງ, ບັ້ນຮົບປ້ອງກັນຕົວເມືອງທ່າແຂກ 21 ມີນາ 1946.

ນໍາສະເໜີບົດຮຽນກ່ຽວກັບສະພາບແວດລ້ອມ, ສະພາບສັດຕູ ແລະ ສະພາບກໍາລັງເຮົາໃນເວລາຜັນແປສູ້ຮົບຢູ່ຕົວເມືອງທ່າແຂກ ໃນຕົ້ນປີ 1946, ເງື່ອນໄຂສະພາບແວດລ້ອມ, ທີ່ຕັ້ງພູມສັນຖານຂອງແຂວງຄໍາມ່ວນ, ສະພາບເທສະບານເມືອງທ່າແຂກ ໃນເມື່ອກ່ອນ ແລະ ປັດຈຸບັນ.

( ຂ່າວ – ຮູບ: ແດງສະຫວັດ ແສນພານິດ )