ງານຕະຫຼາດນັດແຮງງານ ຄັ້ງທີ 8 ຈະມີຕຳແໜ່ງງານຫຼາຍກວ່າ 200 ຕຳແໜ່ງ

363

ເພື່ອສ້າງໂອກາດໃນການພົບປະຫົວໜ່ວຍທຸລະກິດແລກປ່ຽນບົດຮຽນ ແລະ ໃຫ້ແຕ່ລະຫົວໜ່ວຍທຸລະກິດໄດ້ຊອກຫາເພື່ອນຮ່ວມງານທີ່ຖືກຕາມຄວາມຕ້ອງການຂອງການພັດທະນາທຸລະກິດຂອງຕົນ. ວັນທີ 20 ມີນາ 2019 ຄະນະວິສະວະກຳສາດ ( ຄວສ ) ມະຫາວິທະຍາໄລແຫ່ງຊາດ ຮ່ວມມືກັບ ສະພາການຄ້າ – ອຸດສາຫະກຳແຫ່ງຊາດ ( ສຄອ ) ແລະ ສຄອ ເອີຣົບ ໄດ້ຈັດພິທີຖະແຫຼງຂ່າວກ່ຽວກັບການຈັດຕະຫຼາດນັດແຮງງານ ຄັ້ງທີ 8 ຂຶ້ນທີ່ ຄວສ ໂດຍການເຂົ້າຮ່ວມຂອງ ທ່ານ ປອ. ວິມານ ພູມມະວົງ ຮອງຄະນະບໍດີ ຄວສ, ທ່ານ ວັນທອງ ສິດທິກຸນ ຮອງປະທານ ສຄອ ແຫ່ງຊາດ, ທ່ານ ປອ. ຣາມອນ ບຣູດສເລີ ຜູ້ອຳນວຍການ ສຄອ ເອີຣົບ ປະຈຳລາວ ແລະ ທ່ານ ອ່ອງຕວນ ບຼົມຄິສທ໌ ຜູ້ຮັບຜິດຊອບອົງການ AUF ປະຈຳມະຫາວິທະຍາໄລແຫ່ງຊາດ ພ້ອມດ້ວຍຄະນະຂອງແຕ່ລະຝ່າຍເຂົ້າຮ່ວມ.

ທ່ານ ປອ. ວິມານ ພູມມະວົງ ຮອງຄະນະບໍດີ ຄວສ ກ່າວວ່າ: ການຈັດງານຕະຫຼາດນັດແຮງງານໃນຄັ້ງນີ້ ແມ່ນຄັ້ງທີ 8, ເຊິ່ງເປັນການຕອບສະໜອງແຮງງານໃຫ້ຖືກຕາມ ຄວາມຕ້ອງການຂອງຕະຫຼາດແຮງງານໃນອະນາຄົດ ແລະ ຍັງເປັນການອຳນວຍ ຄວາມສະດວກໃຫ້ການຊອກຫາວຽກເຮັດງານທຳທີ່ດີໃຫ້ນັກສຶກສາ, ເປັນການນັດພົບປະເຊິ່ງກັນ ແລະ ກັນ ລະຫວ່າງຜູ້ຕ້ອງການແຮງງານກັບຜູ້ຊອກຫາວຽກ ອັນເປັນໂອກາດທີ່ຈະໄດ້ຮັບຮູ້ເຊິ່ງກັນ ແລະ ກັນ. ນອກນັ້ນຍັງຈະມີການສົນທະນາ, ການລິເລີ່ມທຸລະກິດ, ແລກປ່ຽນ, ຮຽນຮູ້, ສ້າງຄວາມເຂົ້າໃຈອັນທີ່ຈະນຳໄປສູ່ການສ້າງຄວາມຜູກ ພັນ – ຮ່ວມມືນຳກັນໃນຕໍ່ໜ້າ ເຊິ່ງງານຕະຫຼາດນັດແຮງງານ ຄັ້ງທີ 8 ນີ້, ຈະຈັດຂຶ້ນໃນວັນທີ 10 ພຶດສະພາ 2019 ນີ້ ແລະ ຄາດວ່າຈະມີຕຳແໜ່ງງານ 200 ກວ່າຕຳແໜ່ງ ຈາກ 30 ກວ່າບໍລິສັດ ແລະ ຈະມີນັກສຶກສາເຂົ້າຮ່ວມງານ ທີ່ຕ້ອງການວຽກຫຼາຍກວ່າ 2 ພັນຄົນ.

ທ່ານ ວັນທອງ ສິດທິກຸນ ຮອງປະທານ ສຄອ ແຫ່ງຊາດ ກ່າວວ່າ: ການຈັດງານຕະຫຼາດນັດແຮງງານໃນຄັ້ງນີ້ ເພື່ອເປັນການຕອບສະໜອງຄວາມຕ້ອງການທາງດ້ານແຮງງານຂອງບັນດາຫົວໜ່ວຍທຸລະກິດ, ຕອບສະໜອງຊ່ອງວ່າງໃນການຊອກວຽກເຮັດງານທຳຂອງບັນດານັກສຶກສາ ເຊິ່ງສະພາການຄ້າ – ອຸດສາຫະກຳ ແມ່ນມີໜ້າທີ່ໃນການເຊື່ອມຕໍ່ລະຫວ່າງບັນດາຫົວໜ່ວຍທຸລະກິດ ແລະ ຜູ້ຊອກວຽກທັງຫຼາຍໃຫ້ມີການພົບປະ ແລະ ຈ້າງງານຕາມຄວາມເໝາະສົມ ເຊິ່ງແຕ່ລະຫົວໜ່ວຍທຸລະກິດໃນລາວເຮົາມີຄວາມຕ້ອງການແຮງງານຫຼາຍ ເປັນຕົ້ນແມ່ນແຮງງານດ້ານເຕັກນິກ ເຊັ່ນ: ໄຟຟ້າ, ໄອທີ, ຄົມມະນາຄົມ, ກົນຈັກ, ບໍ່ແຮ່ ແລະ ອື່ນໆ. ນອກນັ້ນ, ຍັງເປັນການສ້າງໂອກາດໃຫ້ນັກສຶກສາທີ່ກຳລັງສຶກສາມີໂອກາດແລກປ່ຽນຄວາມຮູ້ ເພື່ອເປັນພື້ນຖານໃນການຊອກຫາວຽກເຮັດໃນອະນາຄົດ.

ທ່ານ ປອ. ຣາມອນ ບຣູດສເລີ ຜູ້ອຳນວຍການ ສຄອ ເອີຣົບ ປະຈຳລາວ ກ່າວວ່າ: ການເຂົ້າຮ່ວມງານຕະຫຼາດນັດແຮງງານໃນຄັ້ງນີ້ ເຊິ່ງແມ່ນງານຄັ້ງທຳອິດຂອງພວກເຮົາໃນ ສປປ ລາວ, ສະພາບການພັດທະນາເສດຖະກິດ – ສັງຄົມໃນລາວ ປັດຈຸບັນເຫັນວ່າຕະຫຼາດແຮງງານບໍ່ມີຄວາມແນ່ນອນເທົ່າທີ່ຄວນ ບຸກຄົນທົ່ວໄປບໍ່ຮູ້ຈະຊອກວຽກໄດ້ຢູ່ໃສ ແລະ ຈະຊອກຫານາຍຈ້າງທີ່ເໝາະສົມໄດ້ແນວໃດ. ສະພາບການດັ່ງກ່າວເຮັດໃຫ້ແຮງງານລາວອອກໄປເຮັດວຽກຢູ່ຕ່າງປະເທດເປັນຈຳນວນຫຼາຍ ໂດຍສະເພາະແມ່ນປະເທດໄທ. ດັ່ງນັ້ນ, ສະພາການຄ້າເອີຣົບ ຄິດວ່າການຈັດງານຕະຫຼາດນັດແຮງງານໃນຄັ້ງນີ້ ແມ່ນມີຄວາມຈຳເປັນ ແລະ ສຳຄັນເພື່ອເສີມສ້າງ ແລະ ພັດທະນາຕະຫຼາດແຮງງານໃຫ້ດີຂຶ້ນ. ສະພາການຄ້າເອີຣົບ ເຮົາແມ່ນມີຄວາມຕ້ອງການທາງດ້ານເຕັກນິກຕ່າງໆ, ການຂາຍ, ລະບົບອາຊີບກ່ຽວກັບໂຮງໝໍ ແລະ ໂຮງແຮມ ໂດຍເນັ້ນໃສ່ຄົນທີ່ເກັ່ງພາສາອັງກິດໃນລະດັບມາດຖານສາກົນ.

ທ່ານ ອ່ອງຕວນ ບຼົມຄິສທ໌ ຜູ້ຮັບຜິດຊອບ ອົງການ AUF ປະຈຳມະຫາວິທະຍາໄລແຫ່ງຊາດ ກ່າວວ່າ: ການຈັດງານຕະຫຼາດນັດໃນຄັ້ງນີ້ແມ່ນເປັນການເປີດໂອກາດໃຫ້ນັກສຶກສາໄດ້ຮຽນຮູ້ ແລະ ແລກປ່ຽນປະສົບການຕ່າງໆກ່ຽວກັບການຊອກຫາວຽກເຮັດ ແລະ ການຈ້າງງານໃນຂົງເຂດເສດຖະກິດ ແລະ ການຮໍ່າຮຽນອີກດ້ວຍ.