ການພັດທະນາແຄມຂອງນະຄອນປາກເຊ ແລະ ເມືອງໂພນທອງ ຄືບໜ້າ 25%

436

ໂຄງການພັດທະນາແຄມຂອງ ນະຄອນປາກເຊ ແລະ ເມືອງໂພນທອງ ແຂວງຈໍາປາສັກ ແມ່ນໂຄງການໜຶ່ງທີ່ນອນໃນແຜນພັດທະນາບຸລິມະສິດຂອງລັດຖະບານ ຈຸດທີ່ຕັ້ງໂຄງການຢູ່ ນະຄອນປາກເຊ ແລະ ເມືອງໂພນທອງ ເຊິ່ງໄດ້ວາງສີລາລືກໃນການກໍ່ສ້າງມາແຕ່ທ້າຍເດືອນທັນວາ ປີ 2017 ມາຮອດປັດຈຸບັນການຈັດຕັ້ງປະຕິບັດໂຄງການຄືບໜ້າຫຼາຍກວ່າ 25%.

ທ່ານ ຫົງສະໝຸດ ແກ້ວວິລະວົງ ຜູ້ຈັດການທົ່ວໄປຂອງ ກຸ່ມບໍລິສັດ ຈໍາປາຄໍາ ກໍ່ສ້າງຂົວ – ທາງ ເຄຫາສະຖານ ແລະ ຊົນລະປະທານ ຈໍາກັດຜູ້ດຽວ ໃນນາມບໍລິສັດຮັບເໝົາກໍ່ສ້າງ ໃຫ້ສໍາພາດໃນຕົ້ນເດືອນມີນາ 2019 ນີ້ວ່າ: ໂຄງການພັດທະນາແຄມຂອງ ໄດ້ເລີ່ມດໍາເນີນການສໍາຫຼວດເກັບກໍາຂໍ້ມູນເພື່ອສຶກສາເສດຖະກິດເຕັກນິກເບື້ອງຕົ້ນແຕ່ປີ 2010, ຮອດທ້າຍເດືອນເມສາ 2017 ຈຶ່ງໄດ້ເຊັນສັນຍາວ່າຈ້າງຜູ້ຮັບເໝົາກໍ່ສ້າງ ແລະ ໃນທ້າຍເດືອນທັນວາ 2017 ຈຶ່ງໄດ້ວາງສີລາລືກໂຄງການກໍ່ສ້າງ. ສໍາລັບໜ້າວຽກຂອງໂຄງການປະກອບມີ: ສ້າງສວນສາທາລະນະ 2 ແຫ່ງ ມີຄື: ສວນສາທາລະນາເບື້ອງຝັ່ງບ້ານທ່າສາລາຄໍາ ( ປາກແມ່ນໍ້າເຊໂດນ ) ນະຄອນປາກເຊ 1 ແຫ່ງໄປຫາຂົວນໍ້າຂອງ ( ຂົວມິດຕະພາບ ລາວ – ຍີ່ປຸ່ນ ) ເນື້ອທີ່ 9,5 ເຮັກຕາ ແລະ ກໍ່ສ້າງຄູປ້ອງກັນນໍ້າຖ້ວມ ຍາວ 1,9 ກິໂລແມັດ; ກໍ່ສ້າງສວນສາທາລະນະແຄມຂອງຝັ່ງເມືອງໂພນທອງ ແຕ່ບ້ານຄັນແຍງ ຫາ ບ້ານໂພນສະຫວັນ ເນື້ອທີ່ 0,6 ເຮັກຕາ ພ້ອມທັງກໍ່ສ້າງປ້ອງກັນຕາຝັ່ງເຈື່ອນ ແລະ ຄູປ້ອງກັນນໍ້າຖ້ວມຢູ່ແຄມຂອງຝັ່ງດັ່ງກ່າວ ຍາວ 4,1 ກິໂລແມັດ.

ນອກນັ້ນ, ຍັງກໍ່ສ້າງປ້ອງກັນຕາຝັ່ງເຈື່ອນ ແລະ ຄູປ້ອງກັນນໍ້າຖ້ວມ ນັບແຕ່ບ້ານທ່າສາລາຄໍາ ( ປາກແມ່ນໍ້າເຊໂດນຝັ່ງຊ້າຍ ) ຫາ ຂົວບ້ານແຫ່ ຄວາມຍາວ 5,9 ກິໂລແມັດ; ສ່ວນເຂດບ້ານທ່າໄຮ ແຄມແມ່ນໍ້າຂອງ ( ຝັ່ງຊ້າຍ ) ຫາ ບ້ານຄັນເກີງ ຄວາມຍາວ 1,9 ກິໂລແມັດ; ສໍາລັບແຕ່ປາກແມ່ນໍ້າເຊໂດນ ( ຝັ່ງຂວາ ) ຫາ ຂົວມິດຕະພາບ ລາວ – ຣັດເຊຍ ລວງຍາວ 2,5 ກິໂລແມັດ ແລະ ກໍ່ສ້າງຄູປ້ອງກັນນໍ້າຖ້ວມ ( ຍົກລະດັບທາງ ) ແຕ່ຂົວບ້ານແຫ່ ຫາ ບ້ານຊົ້ງ ລວງຍາວ 2,9 ກິໂລແມັດ.

ທ່ານ ຫົງສະໝຸດ ກ່າວຕື່ມອີກວ່າ: ວຽກງານທີ່ບໍລິສັດຜູ້ຮັບເໝົາສຸມໃສ່ຈັດຕັ້ງປະຕິບັດໃນປັດຈຸບັນ ແມ່ນວຽກກໍ່ສ້າງຕີນກັນເຈື່ອນ ແລະ ວຽກຖົມຊາຍຖືເປັນວຽກສໍາຄັນຕົ້ນຕໍ, ສໍາລັບຄວາມຄືບໜ້າໃນການຈັດຕັ້ງປະຕິບັດວຽກງານຂອງໂຄງການມາຮອດເດືອນມີນາ 2019 ສໍາເລັດແລ້ວ 25%, ສ່ວນວຽກງານກໍ່ສ້າງຮ່ອງລະບາຍນໍ້າກໍໄດ້ຈັດຕັ້ງປະຕິບັດໄປພ້ອມໆກັນ ຄາດວ່າໃນປີ 2019 ທາງບໍລິສັດຈະສູ້ຊົນຈັດຕັ້ງປະຕິບັດວຽກງານຂອງໂຄງການໃຫ້ສໍາເລັດ 54%.

ໂຄງການພັດທະນາແຄມຂອງ ນອກຈາກເປັນການປ້ອງກັນຄວາມເສຍຫາຍຈາກນໍ້າຖ້ວມ ແລະ ຕາຝັ່ງເຈື່ອນແລ້ວ ຍັງເປັນການກໍ່ສ້າງພື້ນຖານໂຄງລ່າງດ້ານການທ່ອງທ່ຽວ ແນໃສ່ເພື່ອສົ່ງເສີມອຸດສາຫະກໍາການທ່ອງທ່ຽວ ແລະ ສ້າງເປັນບ່ອນພັກຜ່ອນ, ອອກກໍາລັງກາຍຂອງມວນຊົນຊາວແຂວງຈໍາປາສັກ ເຊິ່ງໜ້າວຽກຕົ້ນຕໍຂອງໂຄງການປະກອບມີ: ການກໍ່ສ້າງປ້ອງກັນຕາຝັ່ງເຈື່ອນ ແລະ ຄູປ້ອງກັນນໍ້າຖ້ວມ, ສວນສາທາລະນະ, ຍົກລະດັບທາງ ແລະ ລະບົບລະບາຍນໍ້າ ລວມມູນຄ່າ 65.653.000 ໂດລາສະຫະລັດ. ໃນນັ້ນ, ທຶນກູ້ຢືມຈາກກອງທຶນຮ່ວມມືເພື່ອການພັດທະນາເສດຖະກິດ ສ.ເກົາຫຼີ ຈໍານວນ 53.058.000 ໂດລາສະຫະລັດ ແລະ ພາຍໃນສົມທົບ 12.595.000 ໂດລາສະຫະລັດ, ໂຄງການດັ່ງກ່າວຈະສຳເລັດພາຍໃນປີ 2021.