ການຄ້າແຈ້ງ! ເອົາໃຈໃສ່ກວດກາສະກັດກັ້ນການນຳເຂົ້າຊີ້ນໝູ

403

ຕໍ່ກັບບັນຫາການປ້ອງກັນການແຜ່ລະບາດເຊື້ອພະຍາດອະຫິວາໝູແຜ່ລະບາດເຂົ້າສູ່ລາວ ແລະ ການນຳເຂົ້າຊີ້ນໝູ ແລະ ຜະລິດຕະພັນໝູຈາກ ສປ ຈີນ ແລະ     ສສ ຫວຽດນາມ ຫຼັງລັດຖະບານແຈ້ງການຫ້າມນຳເຂົ້າ ເນື່ອງຈາກເກີດການລະບາດຂອງພະຍາດອະຫິວາໝູອາຟຣິກກາ ຢູ່ໃນ 2 ປະເທດດັ່ງກ່າວ. ຫຼ້າສຸດ, ຫ້ອງການກະຊວງອຸດສາຫະກຳ ແລະ ການຄ້າ ອອກແຈ້ງການເລກທີ 0558/ຫອຄ,ກຄພນ ລົງວັນທີ 20 ມີນາ 2019 ເຖິງຫົວໜ້າພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງວຽງຈັນ ເລື່ອງ: ຕິດຕາມ, ກວດກາ ແລະ ສະກັດກັ້ນການນຳເຂົ້າໝູ ແລະ ຜະລິດຕະພັນໝູທຸກຊະນິດ ທີ່ນຳເຂົ້າຈາກປະເທດ ສປ ຈີນ ແລະ ສສ ຫວຽດນາມ.

ເພື່ອເປັນການສະກັດກັ້ນການລັກລອບນຳເຂົ້າ ໝູ ແລະ ຜະລິດຕະພັນໝູທຸກຊະນິດ ຈາກປະເທດ ສປ ຈີນ ແລະ ສສ ຫວຽດນາມ ທັງເປັນການປ້ອງກັນການແຜ່ລາມຂອງພະຍາດອະຫິວາໝູອາຟຣິກກາ ທີ່ຈະເປັນຜົນກະທົບຕໍ່ການລ້ຽງໝູ ແລະ ຜູ້ຊົມໃຊ້ພາຍໃນ.

ຫ້ອງການກະຊວງອຸດສາຫະກຳ ແລະ ການຄ້າ ອອກແຈ້ງການເຖິງພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງ ເພື່ອຈັດຕັ້ງປະຕິບັດ ດັ່ງນີ້:

1). ໃຫ້ພະແນກອຸດສາຫະກຳ ແລະ ການຄ້າ ຊີ້ນຳຂະແໜງການຄ້າພາຍໃນ ແຕ່ງຕັ້ງເຈົ້າໜ້າທີ່ກວດກາການຄ້າລົງສົມທົບກັບຫ້ອງການອຸດສາຫະກຳ ແລະ ການຄ້າເມືອງ, ນະຄອນຫຼວງ ທີ່ມີທາງຜ່ານ, ເຄື່ອນໄຫວຕິດຕາມ, ກວດກາການລັກລອບນຳເຂົ້າຊີ້ນໝູ ແລະ ຜະລິດຕະພັນໝູທຸກຊະນິດ.

2). ກໍລະນີພົບເຫັນມີການລັກລອບນຳເຂົ້າໝູ ແລະ ຜະລິດຕະພັນໝູທຸກຊະນິດຈາກຕ່າງປະເທດ ໃຫ້ຢຶດ ຫຼື ອາຍັດໄວ້ທັນທີ. ຈາກນັ້ນ, ສົມທົບກັບພາກສ່ວນກ່ຽວຂ້ອງ ເປັນຕົ້ນຂະແໜງສັດຕະວະແພດ ເພື່ອໃຊ້ມາດຕະການຕາມລະບຽບກົດໝາຍຢ່າງເຂັ້ມງວດ.

3). ໃນກໍລະນີເຈົ້າໜ້າທີ່ກວດກາພົບເຫັນແລ້ວປ່ອຍປະລະເລີຍ ຫຼື ອຳນວຍ ຄວາມສະດວກໃຫ້ແກ່ການເຄື່ອນຍ້າຍໝູ, ຜະລິດຕະພັນໝູທີ່ລັກລອບຂຶ້ນມານັ້ນຕ້ອງປະຕິບັດວິໄນຕາມລະບຽບກົດໝາຍຢ່າງເຂັ້ມງວດ.

4). ມອບໃຫ້ກົມການຄ້າພາຍໃນ, ພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງ ເປັນເຈົ້າການຕິດຕາມ, ກວດກາ ແລະ ຊີ້ນຳການຈັດຕັ້ງປະຕິບັດວຽກງານຂອງເຈົ້າໜ້າທີ່ກວດກາການຄ້າ
ຕາມແຈ້ງການສະບັບນີ້ຢ່າງເຂັ້ມງວດ.

ຕໍ່ກັບປະເດັນດັ່ງກ່າວ ທ່ານ ວົງໄຊ  ຄຸດສະແຫວງ ຮອງຫົວໜ້າຂະແໜງການຄ້າພາຍໃນແຂວງບໍ່ແກ້ວ ໃຫ້ສຳພາດວ່າ: ການຫ້າມນຳເຂົ້າໝູ ແລະ ຜະລິດຕະພັນໝູທຸກຊະນິດ ລວມທັງຜະລິດຕະພັນປຸງແຕ່ງເບື້ອງຕົ້ນຈາກ ສປ ຈີນ ແລະ ສສ ຫວຽດນາມ ທີ່ລັດຖະບານ ກໍຄືກົມລ້ຽງສັດ ແລະ ການປະມົງ ກະຊວງກະສິກຳ ແລະ ປ່າໄມ້ ອອກວັນທີ 25 ກຸມພາ 2019 ຜ່ານມາ ພາຍຫຼັງທີ່ໄດ້ຮັບແຈ້ງການທາງພະແນກການຄ້າແຂວງ ກໍໄດ້ອອກແຈ້ງການເຖິງບັນດາຫ້ອງການໆຄ້າເມືອງ ເພື່ອຄຸມເຂັ້ມບໍ່ໃຫ້ມີການລັກລອບນຳເຂົ້າຢ່າງເດັດຂາດ ແລະ ຖ້າຫາກເຈົ້າໜ້າທີ່ກວດພົບຈະໄດ້ລົງໂທດຕາມລະບຽບກົດໝາຍ. ທັງນີ້, ກໍເພື່ອປ້ອງກັນບໍ່ໃຫ້ພະຍາດອະຫິ ວາໝູອາຟຣິກກາ ແຜ່ລະບາດເຂົ້າສູ່ ສປປ ລາວ ເພາະເປັນພະຍາດທີ່ອັນຕະລາຍ ແລະ ຮ້າຍແຮງຫຼາຍ.

ສ່ວນດ້ານການສະໜອງຊີ້ນໝູພາຍໃນຕະຫຼາດແຂວງບໍ່ແກ້ວ ຂອງພວກເຮົາແມ່ນຍັງບໍ່ພຽງພໍກັບຄວາມຕ້ອງການ ເຊິ່ງຕ້ອງໄດ້ນຳເຂົ້າຈາກປະເທດໄທ ເຖິງ 60% ແລະ ນໍາເຂົ້າຢ່າງຖືກຕ້ອງຕາມກົດໝາຍ. ທັງນີ້, ສໍາລັບດ້ານລາຄາເຖິງແມ່ນຈະມີການນຳເຂົ້າສິນຄ້າຈາກຕ່າງປະເທດເປັນສ່ວນໃຫຍ່ກໍຕາມ ແຕ່ລາຄາກໍຍັງຢູ່ໃນເກນຄວບຄຸມຂອງລັດກຳນົດ ໂດຍຊີ້ນໝູປະເພດ 1 ລາຄາ 35 ກີບຕໍ່ກິໂລ ແລະ ຊີ້ນໝູປະເພດ 2 ລາຄາ 30 ກີບຕໍ່ກິໂລ. ພ້ອມນີ້, ເລື່ອງຂ່າວການລະບາດພະຍາດອະຫິວາໝູອາຟຣິກກາ ທີ່ປະເທດຈີນ ແລະ ສສ ຫວຽດນາມ ຍັງບໍ່ສົ່ງຜົນຕໍ່ການບໍລິໂພກຊີ້ນໝູພາຍໃນແຂວງເທື່ອ ເຊິ່ງຍັງມີການຊື້ – ຂາຍກັນເປັນປົກກະຕິ.

ດ້ານແຂວງອຸດົມໄຊ ສຳລັບການຫ້າມນຳເຂົ້າຊີ້ນໝູ ແລະ ຜະລິດຕະພັນໝູນັ້ນ ທ່ານ ສົມເພັງ ຕອມກັນຍາ ຫົວໜ້າພະແນກອຸດສາຫະກຳ ແລະ ການຄ້າແຂວງ ໃຫ້ສຳພາດວ່າ: ການປະຕິບັດກໍບໍ່ຫຍຸ້ງຍາກປານໃດ ເນື່ອງຈາກວ່າແຂວງຂອງພວກເຮົາບໍ່ມີຊາຍແດນຕິດກັບຈີນ. ສະນັ້ນ, ການນຳເຂົ້າຕ້ອງໄດ້ຜ່ານແຂວງຜົ້ງສາລີ ຫຼື ບໍ່ແກ້ວ ເຊິ່ງບັນດາແຂວງດັ່ງກ່າວກໍໄດ້ມີການຫ້າມນຳເຂົ້າ ແລະ ສະກັດກັ້ນຢູ່ແລ້ວ. ແຕ່ຢ່າງໃດກໍຕາມ, ພາຍຫຼັງມີແຈ້ງການຫ້າມນຳເຂົ້າຈາກລັດຖະບານ ທາງການນຳແຂວງອຸດົມໄຊ ກໍໄດ້ມີການແຕ່ງຕັ້ງຄະນະສະເພາະກິດໃນການເຮັດວຽກສະກັດກັ້ນດັ່ງກ່າວ ໂດຍມີທ່ານຫົວໜ້າຫ້ອງວ່າການປົກຄອງແຂວງເປັນຄະນະ, ປະສານກັບພະແນກກະສິກຳ ແລະ ປ່າໄມ້ ໃນການເຮັດວຽກ.

ທັງນີ້, ພາຍຫຼັງທີ່ຫ້າມນໍາເຂົ້າຊີ້ນໝູ ແລະ ຜະລິດຕະພັນໝູຈາກຕ່າງປະເທດ ການສະໜອງພາຍໃນແຂວງກໍຍັງບໍພຽງພໍ ເຊິ່ງບາງເດືອນກໍໄດ້ມີການນຳໝູມາຈາກຕ່າງແຂວງ ເຊັ່ນ: ແຂວງວຽງຈັນ ແລະ ນະຄອນຫຼວງວຽງຈັນ ເປັນຕົ້ນ ເຮັດໃຫ້ການຄຸ້ມຄອງດ້ານລາຄາຫຍຸ້ງຍາກ ເນື່ອງຈາກຜູ້ປະກອບການບາງລາຍສະເໜີໃຫ້ເພີ່ມລາຄາຂຶ້ນ. ຢ່າງໃດກໍຕາມ, ລາຄາຊີ້ນໝູທີ່ຂາຍຕາມທ້ອງຕະຫຼາດກໍຍັງຢູ່ໃນລາຄາທີ ກຳນົດ ຄື: ຊີ້ນປະເພດ 1 ຂາຍໃນລາຄາ 35 ກີບຕໍ່ກິໂລ ແລະ ຊີ້ນປະເພດສອງ 30 ກີບຕໍ່ກິໂລ ໂດຍທາງການຄ້າແຂວງຍັງບໍ່ອະນຸຍາດໃຫ້ປັບຂຶ້ນ.

ສ່ວນແຂວງຜົ້ງສາລີ ທ່ານ ທອງສະຫວັນ ທຳມະວົງ ຫົວໜ້າພະແນກອຸດສາຫະກຳ ແລະ ການຄ້າ ແຂວງຜົ້ງສາລີ ໃຫ້ສຳພາດວ່າ: ການຫ້າມນຳເຂົ້າຜະລິດພັນໝູ ຫຼື ໝູຈາກ ສປປ ຈີນ ແລະ ສສ ຫວຽດນາມນັ້ນ ທາງແຂວງພວກເຮົາແມ່ນໄດ້ຢຸດການນຳເຂົ້າຕັ້ງແຕ່ຕົ້ນເດືອນກັນຍາ 2018 ຈົນຮອດປັດຈຸບັນ ເນື່ອງຈາກກະຊວງກະສິກໍາ ແລະ ປ່າໄມ້ ໄດ້ອອກແຈ້ງການສະບັບເລກທີ 0945 ລົງວັນທີ 5 ກັນຍາ 2018 ກ່ຽວກັບການໂຈະຊົ່ວຄາວການນໍາເຂົ້າ, ໝູພໍ່ – ແມ່ພັນ, ໝູນ້ອຍ ແລະ ຜະລິດຕະພັນຊີ້ນໝູທຸກຊະນິດຈາກ ສປ ຈີນ ເຂົ້າສູ່ ສປປ ລາວ ເນື່ອງຈາກອົງການສຸຂະພາບສັດສາກົນ OIE ໄດ້ລາຍງານ ແລະ ແຈ້ງໃຫ້ຊາບວ່າໄລຍະນີ້ພະຍາດອະຫິວາໝູອາຟຣິກກາ ລະບາດຫຼາຍຢູ່ໃນຟາມລ້ຽງໝູຂອງແຂວງຫຼຽວໝິງ ສປ ຈີນ.