ຄຳມ່ວນພ້ອມເປີດຮຽນພ້ອມຈັດບ່ອນນັ່ງໃຫ້ນັກຮຽນຫ່າງກັນ

651

ທ່ານ ສີໄຮ ແກ້ວໄກຖິ່ນ ຫົວໜ້າພະແນກສຶກສາທິການ ແລະ ກິລາ ແຂວງຄຳມ່ວນ ໃຫ້ສຳພາດກ່ຽວກັບ ການກະກຽມຄວາມພ້ອມໃຫ້ແກ່ເປີດການຮຽນ-ການສອນ ພາຍຫຼັງທີ່ໄດ້ປິດການຮຽນ-ການສອນແຕ່ວັນທີ 19 ມີນາ 2020. ໂດຍອີງຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ກໍ່ຄືຄຳ ແນະນຳຂອງກະຊວງ ສຶກສາທິການ ແລະ ກິລາ ທີ່ໄດ້ກຳນົດເປີດການຮຽນ-ການສອນ ໃນຊັ້ນສຸດທ້າຍຂອງສາຍສາມັນຄື: ຂັ້ນປໍ5, ມໍ4 ແລະ ມໍ7 ເຊິ່ງໃນ 3 ຂັ້ນຮຽນນີ້ແມ່ນຈະໄດ້ເປີດການຮຽນ-ການສອນໃນວັນທີ 18 ພຶດສະພາ ທີ່ຈະມາເຖິງນີ້.


ເພື່ອຮອງຮັບໃຫ້ແກ່ສະພາບການດັ່ງກ່າວ ທາງພະແນກສຶກສາທິການ ແລະ ກິລາແຂວງກໍ່ໄດ້ນຳເອົາ ແຈ້ງການ, ຄຳແນະນຳຕ່າງໆ ລົງເຜີຍແຜ່ຜັນຂະຫຍາຍໃຫ້ບັນດາເມືອງ ແລະ ຜູ້ບໍລິຫານການສຶກສາໃນແຕ່ລະຂັ້ນ ເພື່ອເອົາໃຈ ໃສ່ປະສານສົມທົບກັບອຳນາດການປົກຄອງຂັ້ນຕ່າງໆ ເພື່ອກະກຽມ, ສ້ອມແປງໂຮງຮຽນ, ໂຕະ, ຕັ່ງ, ກະດານດຳທີ່ມີ ການເປ່ເພ ພ້ອມທັງສີດຢາຂ້າເຊື້ອ ບັນດາໂຮງຮຽນທີ່ໄດ້ກຳນົດເປັນສູນກັກກັນຊົ່ວຄາວແຮງງານທີ່ກັບຈາກຕ່າງປະເທດ ເພື່ອຮັບປະກັນຕາມມາດຕະການປ້ອງກັນ, ຕ້ານການແຜ່ລະບາດ ແລະ ຮັບປະກັນກຽມຄວາມພ້ອມໃຫ້ທັນກັບ ສະພາບການ, ຊຸກຍູ້ໃຫ້ບັນດາໂຮງຮຽນສ້າງອ່າງລ້າງມືຕາມເງື່ອໄຂຂອງແຕ່ລະໂຮງຮຽນ ພ້ອມທັງຈັດສັນຄືນໃໝ່ ນັກຮຽນທີ່ບັນຈຸເຂົ້າແຕ່ລະຫ້ອງຮຽນບໍ່ໃຫ້ເກີນ 30 ຄົນຕໍ່ 1 ຫ້ອງ ເພື່ອຮັກສາໄລຍະຫ່າງ, ຊຸກຍູ້ໃຫ້ບັນດາຄູ-ອາຈານເພື່ອແນະນຳໃຫ້ນັກຮຽນໃນການປະຕິບັດຕາມລະບຽບມາດຕະການຕ້ານ ແລະ ສະກັດກັ້ນການແຜ່ລະບາດ ຂອງພະຍາດໂຄວິດ-19.


ທ່ານຫົວໜ້າພະແນກສຶກສາທິການ ແລະ ກິລາກ່າວຕື່ມວ່າ: ສຳລັບນັກຮຽນໃນຂັ້ນປໍ1-ປ4, ມໍ1-ມໍ3 ແລະ ມໍ5-ມໍ6 ແມ່ນຍັງບໍ່ໄດ້ກຳນົດເປີດຢ່າງເປັນທາງການ ໃຫ້ເອົາໃຈໃສ່ຄົ້ນຄວ້າສຶກສາຮ່ຳຮຽນດ້ວຍຕົວເອງ ຢູ່ເຮືອນ ຫຼືຮຽນຜ່ານສື່ອອນລາຍຕາມເງືອນໄຂ ຖ້າມີຂໍ້ຂ້ອງໃຈແມ່ນສາມາດປະສານຫາຄູ-ອາຈານປະຈຳວິຊາຜ່ານທາງໂທລະສັບ ຫຼືສື່ຕ່າງໆຕາມທີ່ໄດ້ແຈ້ງກ່ອນໜ້ານັ້ນ ເພື່ອລໍຖ້າແຈ້ງການຂອງກະຊວງສຶກສາທິການ ແລະ ກິລາວາງອອກໃນໄລຍະຕໍ່ໄປ.