ວິທະຍາໄລ ລາວ-ທ໊ອບ ທົດລອງສອນອອນລາຍ ໄລຍະປິດວິທະຍາໄລຊົ່ວຄາວ

632

ຈາກເຊື້ອຈຸລະໂລກສາຍພັນໃໝ່ ( ໂຄວິດ-19 ) ໄດ້ແຜ່ລະບາດໄປທົ່ວໂລກ ເຮັດໃຫ້ສົ່ງຜົນກະທົບໜັກ ໂດຍສະເພາະການສຶກສາໃນ ສປປ ລາວ ໄດ້ມີແຈ້ງການໂຈະການແຂ່ງຂັນໄປຈົນເຖິງທ້າຍເດືອນເມສາ 2020, ຢ່າງໃດກໍຕາມ, ວິທະຍາໄລ ລາວ-ທ໊ອບ ກໍເປັນອີກວິທະຍາໄລໜຶ່ງທີ່ແຈ້ງປິດວິທະຍາໄລຊົ່ວຄາວຕາມແຈ້ງການ, ແຕ່ເນື່ອງຈາກທາງວິທະຍາໄລດັ່ງກ່າວຢາກໃຫ້ຄູ-ອາຈານ ແລະ ນັກຮຽນ ໃຊ້ເວລາວ່າງໃຫ້ເປັນປະໂຫຍດ ແລະ ຊໍ້າບົດຮຽນເກົ່າທີ່ຄ້າງຢູ່ ຈຶ່ງໄດ້ເປີດທົດລອງສອນຜ່ານລະບົບອອນລາຍ ( ໄລຟ໌ສົດ ) ພາຍໃນໄລຍະເວລາ 2 ອາທິດ.

ທ່ານ ປອ. ພັນທະວິໄລ ນວນຮຸ່ນ ຮອງອໍານວຍການຂອງວິທະຍາໄລ ລາວ-ທ໊ອບ ໃຫ້ສໍາພາດວ່າ: ດັ່ງທີ່ຮູ້ລັດຖະບານລາວ ໄດ້ສັ່ງໂຈະການຮຽນ-ການສອນຊົ່ວຄາວ ເນື່ອງຈາກການລະບາດຂອງ ໂຄວິດ-19. ທັງນັ້ນ, ຖ້າວິທະຍາໄລຂອງພວກເຮົາສົ່ງໂຈະເລີຍ ກໍຈະສົ່ງຜົນກະທົບຫຼາຍຢ່າງ. ດັ່ງນັ້ນ, ຈຶ່ງຄິດແບບຟອມການຮຽນ-ການສອນແບບອອນລາຍ ເພື່ອໃຫ້ນັກຮຽນສາມາດຮຽນຢູ່ເຮືອນ ໃນໄລຍະທີ່ປິດໂຮງຮຽນຊົ່ວຄາວ ເພື່ອຊໍ້າບົດຮຽນເກົ່າທີ່ຍັງຄ້າງຢູ່ ໂດຍເລີ່ມສອນແບບອອນລາຍນັບຕັ້ງແຕ່ວັນທີ 23 ມີນາ 2020 ຈົນເຖິງວັນທີ 9 ເດືອນເມສາ 2020 ເພາະຕາມກໍານົດແມ່ນພວກເຮົາຈະປິດເທີມໃນວັນທີ 9 ເມສາ 2020.

ທ່ານ ປອ. ພັນທະວິໄລ ນວນຮຸ່ນ ກ່າວອີກວ່າ: ຢ່າງໃດກໍຕາມການສອນອອນລາຍກໍເປັນໂອກາດດີທີ່ພວກເຮົາຈະໄດ້ການສອນແບບໃໝ່ ແລະ ໃຫ້ຄູອາຈານໄດ້ອັບເກຼດໃນການແຕ່ງບົດສອນ ແລະ ວິທີສອນແບບໃໝ່. ຂະນະທີ່ນັກຮຽນຈະໄດ້ທົດທອງສິ່ງໃໝ່ໆ, ສ່ວນວິທະຍາໄລຂອງພວກເຮົາຈະໄດ້ທົດລອງການສອນແບບດັ່ງກ່າວເພື່ອນໍາໄປໃຊ້ໃນອະນາຄົດ.

ຂ່າວຈາກ: ຂ່າວເສດຖະກິດ-ການຄ້າ Lao Economic Daily
ຮູບປະກອບຈາກ: Lao-Top College