ແຂວງຫົວພັນປະກາດຈົບຊັ້ນມັດທະຍົມຕອນຕົ້ນບຳລຸງ

423

ພິທີປະກາດຊັ້ນ ມ.ຕົ້ນບຳລຸງທົ່ວແຂວງຫົວພັນ ໄດ້ຈັດຂຶ້ນໃນວັນທີ 26 ພະຈິກ ຜ່ານມາທີ່ຫໍວັດທະນະທຳແຂວງຫົວພັນ, ໂດຍໃຫ້ກຽດເຂົ້າຮ່ວມ ແລະ ມອບໃບຢັ້ງຢືນຂອງ ທ່ານ ຮສ.ປອ ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກິລາ ແລະຮັບແມ່ນທ່ານ ວັນໄຊ ແພງຊຸມມາ ເຈົ້າແຂວງຫົວພັນ, ມີບັນດາເຈົ້າແຂວງ-ຮອງເຈົ້າແຂວງ, ຫົວໜ້າ-ຮອງຫົວໜ້າພະແນກສຶກສາທິການ ແລະ ກິລາອ້ອມຂ້າງ, ຫົວໜ້າ-ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ພະນັກງານ, ທະຫານ-ຕຳຫຼວດ, ພໍ່ແມ່ປະຊາຊົນ ແລະ ນ້ອງນັກຮຽນ

ໂອກາດນີ້,ທ່ານມົນທອງ ລຽນຕິຄຸນ ຫົວໜ້າພະແນກສຶກສາທິການ ແລະ ກິລາແຂວງຫົວພັນ ໄດ້ລາຍງານໃຫ້ຮູ້ວ່າ: ແຂວງຫົວພັນ ມີທັງໝົດ 10 ເມືອງ,ມີ 727 ບ້ານ ໃນນີ້ມີບ້ານພັດທະນາ 269ບ້ານ ເທົ່າກັບ 37% ແລະ ບ້ານທຸກຍາກ75 ບ້ານ ເທົ່າກັບ 10,32%, ມີ 50.870 ຄົວເຮືອນ,ມີຄອບຄົວພັດທະນາ 1.640 ຄອບຄົວ ເທົ່າກັບ 3,22% ແລະ ມີຄອບຄົວທຸກຍາກ 6.836 ຄອບຄົວ ເທົ່າກັບ 13,44% ມີພົນລະເມືອງທັງໝົດ 309.897 ຄົນ, ຍິງ 151.263 ຄົນ. ໃນນີ້ວຽກງານການສຶກສານອກໂຮງຮຽນ ແຂວງໄດ້ຈັດຕັ້ງການຮຽນການສອນລຶບລ້າງຄວາມບໍ່ຮູ້ໜັງສື ແລະ ບຳລຸງຊັ້ນປະຖົມໃຫ້ປະຊາຊົນ ໃນເກນອາຍຸ 15-40 ປີ ແຕ່ປີ 1980 ເປັນຕົນມາ, ມີຜູ້ຮຽນໜັງສືທັງໝົດ 57.164 ຄົນ, ຍິງ29.058 ຄົນ ແລະ ປະກາດຊັ້ນປະຖົມບຳລຸງທົ່ວແຂວງຢ່າງເປັນທາງການ ໃນປີ 2013 ເປັນແຂວງທີ 10ຂອງປະເທດ ແລະ ກໍໄດ້ສືບຕໍ່ຈັດຕັ້ງການຮຽນການສອນໃຫ້ແກ່ປະຊາຊົນ ຜູ້ບໍ່ທັນຈົບປະຖົມຢ່າງຕໍ່ເນື່ອງຕະຫຼອດມາ ພ້ອມກັນນັ້ນກໍສ້າງເງື່ອນໄຂໃຫ້ເຂົາເຈົ້າໄດ້ສືບຕໍ່ຮຽນຊັ້ນມັດທະຍົມຕອນຕົ້ນບຳລຸງ ເກນອາຍຸ 15-35ປີ ນັບແຕ່ສົກຮຽນ 2010-2011 ຈົນຮອດປັດຈຸບັນກໍຖືວ່າສຳເລັດຢ່າງເປັນທາງການ. ຕໍ່ຂະບວນການຮຽນການສອນໄລຍະດັ່ງກ່າວ ສາມາດປະກາດຈົບຊັ້ນມ.ຕົ້ນບຳລຸງໄດ້ 727 ບ້ານ, ມີຜູ້ຮຽນຈົບທັງໝົດ 12.009 ຄົນ, ຍິງ 4.803 ຄົນ ສະເລ່ຍເທົ່າກັບ 96,65%, ຍິງ 96,70% ແລະ ໄດ້ມີພິທີປະກາດຈົບຊັ້ນມ.ຕົ້ນບຳລຸງທົ່ວແຂວງ ຢ່າງເປັນທາງການໃນວັນທີ 26 ພະຈິກ2019 ເປັນແຂວງທີ 9 ຂອງປະເທດ

ສຳລັບທິດທາງແຜນການ ແລະຄາດໝາຍສູ້ຊົນຮອດປີ 2025 ຈະສືບຕໍ່ສ້າງທຸກເງື່ອນໄຂ ແລະ ປຸກລະດົມໃຫ້ເດັກນ້ອຍ ເກນອາຍຸ 3-5ປີ ເຂົ້າຮຽນອະນຸບານ ແລະຫ້ອງກຽມປະຖົມ ໃຫ້ໄດ້75% ແລະເດັກ5ປີໃຫ້ໄດ້ 85%; ອັດຕາເຂົ້າຮຽນຊັ້ນປະຖົມສຸດທິ ໃຫ້ໄດ້ 99%; ອັດຕາເຂົ້າຮຽນລວມຊັ້ນມ.ຕົ້ນ98%; ອັດຕາເຂົ້າຮຽນລວມຊັ້ນມ.ປາຍ 65%; ຂະຫຍາຍສູນການສຶກສານອກໂຮງຮຽນຢູ່ເມືອງໃຫ້ໄດ້ຕື່ມ3 ເມືອງ ຄື: ເມືອງຊຳໃຕ້, ເມືອງຮ້ຽມແລະ ເມືອງຊ່ອນ ເພື່ອດຳເນີນການຮຽນການສອນບຳລຸງຊັ້ນມ.ປາຍ ແລະຝຶກອົບຮົມວິຊາຊີບ; ສືບຕໍ່ດຳເນີນການຮຽນການສອນລຶບລ້າງຄວາມບໍ່ຮູ້ນັງສືຊັ້ນປະຖົມ, ມ.ຕົ້ນ ແລະ ມ.ປາຍ ໃຫ້ນັກຮຽນທີ່ປະລະການຮຽນຈາກສາຍສາມັນ; ເອົາໃຈໃສ່ຝຶກອົບຮົມວິຊາຊີບຂັ້ນພືນຖານໃຫ້ແກ່ຊາວໜຸ່ມ, ແມ່ຍິງ ແລະ ຜູ້ດ້ອຍໂອກາດ ເປັນຕົນແມ່ນປູກຝັງ, ລ້ຽງສັດ,ຕັດຫຍິບ ແລະອື່ນໆ

ພ້ອມນັ້ນໃນພິທີຍັງໄດ້ປະດັບຫຼຽນໄຊແຮງງານຊັ້ນ 1, ຊັ້ນ 2, ຊັ້ນ 3, ຫຼຽນກາແຮງງານ, ມອບໃບຍ້ອງຍໍຂັ້ນລັດຖະບານ, ຂັນກະຊວງສຶກສາທິການ ແລະ ກິລາ, ຂັ້ນແຂວງ ແລະ ຂັ້ນພະແນກສຶກສາທິການ ແລະ ກິລາແຂວງ ໃຫ້ກັບກົມກອງ ແລະ ບຸກຄົນທີ່ມີຜົນງານດີເດັ່ນປະກອບສ່ວນໃນຂະບວນການຮຽນການສອນຊັ້ນມ.ຕົ້ນບຳລຸງຈົນມີຜົນສຳເລັດເປັນກ້າວໆ ແລະສາມາດປະກາດເປັນແຂວງຈົບຊັ້ນມ.ຕົ້ນບຳລຸງຢ່າງເປັນທາງການ

ພາບ-ຂ່າວ: ລູກນ້ຳເຊ ອິນທະດາລິນ