ນາຍົກ ເນັ້ນໃຫ້ຂະແໜງສຶກສາທຸກຂັ້ນ ເອົາໃຈໃສ່ພັດທະນາລະບົບການສຶກສາ ແລະ ຄູ ໃຫ້ທັນຍຸກທັນໄໝ

764

ທ່ານ ທອງລຸນ ສີສຸລິດ ນາຍົກລັດຖະມົນຕີ ກ່າວເນື່ອງໃນໂອກາດເຂົ້າຮ່ວມພິທີສະເຫລີມສະຫລອງວັນຄູແຫ່ງຊາດ (7 ຕຸລາ 2019) ຄົບຮອບ 25 ປິ ທີ່ມະຫາວິທະຍາໄລແຫ່ງຊາດ ໃນຕອນບ່າຍຂອງວັນທີ 4 ຕຸລາ 2019 ຮຽກຮ້ອງມາຍັງຜູ້ບໍລິຫານການສຶກສາທຸກຂັ້ນ ໃຫ້ເອົາໃຈໃສ່ສືບຕໍ່ພັດທະນາລະບົບການສຶກສາ ແລະ ພັດທະນາຄູ ໃຫ້ທັນຍຸກທັນໄໝ ແລະ ມີການພັດທະນາຢ່າງຕໍ່ເນື່ອງ ເພື່ອຮັບປະກັນໃຫ້ແທດເໝາະກັບຄວາມຮຽກຮ້ອງຕ້ອງການໃນການພັດທະນາເສດຖະກິດ-ສັງຄົມຂອງປະເທດ.

ພ້ອມໄດ້ສະແດງຄວາມຂ່ຳນັບຊົມເຊີຍວັນຄູແຫ່ງຊາດ ຄົບຮອບ 25 ປີ ແລະ ຝາກຄຳຢື້ຢາມຖາມຂ່າວ ຄູ-ອາຈານ ໃນຂອບເຂດທົ່ວປະເທດ ແລະ ໄດ້ຕາງໜ້າໃຫ້ສູນກາງພັກ, ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ມາຍັງຂະແໜງການສຶກສາ ກໍຄືບັນດາຄູ-ອາຈານ ທີ່ໄດ້ເສຍສະຫລະທຸກກຳລັງໃນການພັດທະນາການສຶກສາ ແລະ ຊັບພະຍາກອນມະນຸດ ເພື່ອປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ.

Cr: ຂປລ