ສ່ອງບັ້ນສອບເສັງນັກຮຽນເກັ່ງລະດັບຊາດ ກ່ອນມື້ປະກາດຜົນ 29 ມີນາ

488

ນັກສອບເສັງ, ຄູ – ອາຈານລວມທັງຜູ້ປົກຄອງ ແລະ ຍາດພີ່ນ້ອງຕ່າງກໍຄອງຄອຍຜົນການສອບເສັງນັກຮຽນເກັ່ງ ທີ່ຈະປະກາດໃນວັນທີ 29 ມີນາ ທີ່ຈະມາເຖິງນີ້ ຄະນະລໍຖ້າຜົນການສອບເສັງບັນດານ້ອງນັກຮຽນ ຈຳນວນ 144 ຄົນ ກຳລັງຢູ່ໃນໄລຍະທັດສະນະສຶກສາ ໂດຍສະເພາະແມ່ນຖາມ – ຕອບຄຳຖາມວິທະຍາສາດ ແລະ ຄວາມຮູ້ຮອບຕົວ ສ່ວນດ້ານການສະໜັບສະໜູນແມ່ນຍັງຄົງໄດ້ຮັບການເກື້ອກູນຈາກທັງພາກລັດ ແລະ ເອກະຊົນ.

ທ່ານ ນາງ ປອ. ສີສຸກ ວົງວິຈິດ ຫົວໜ້າກົມສາມັນສຶກສາ ກະຊວງສຶກສາທິການ ແລະ ກີລາ ໃຫ້ສຳພາດວ່າ: ການສອບເສັງນັກຮຽນເກັ່ງລະດັບຊາດຊັ້ນມັດທະຍົມສຶກສາ ໃນສົກປີ 2018 – 2019 ນີ້, ດ້ານລະບຽບແບບແຜນການສອບເສັງແມ່ນອີງຕາມລະບຽບການຂອງກະຊວງສຶກສາທິການ ແລະ ກີລາ ໂດຍປີນີ້ໄດ້ມີການຈັດສອບເສັງໄວກວ່າກຳນົດ ຊຸມປີຜ່ານມາແມ່ນຈະຈັດເສັງນັກຮຽນເກັ່ງລະດັບຊາດຫຼັງປີໃໝ່ລາວ ເຊິ່ງເຫດຜົນແມ່ນຍ້ອນດ້ານດິນຟ້າອາກາດຂອງແຕ່ລະພາກມີການຜັນປ່ຽນ ໂດຍສະເພາະແມ່ນຝົນຕົກເຮັດໃຫ້ການເດີນທາງໄປ – ມາພົບຄວາມຫຍຸ້ງຍາກ. ສະນັ້ນ, ຜ່ານການກວດກາຕິດຕາມສະພາບດິນຟ້າອາກາດໃນໄລຍະນີ້ຖືວ່າມີຄວາມເໝາະສົມ ແລະ ອາກາດກໍບໍ່ຮ້ອນປານໃດ.

ການສອບເສັງນັກຮຽນເກັ່ງລະດັບຊາດໃນປີນີ້ຖືວ່າໄດ້ມີການສະໜັບສະໜູນຈາກຫຼາຍພາກສ່ວນທີ່ກ່ຽວຂ້ອງພໍສົມຄວນນອກຈາກພາກລັດກໍຄືກະຊວງສຶກສາທິການ ແລະ ກີລາ ແລ້ວທາງ ບໍລິສັດ ເບຍລາວ ກໍໄດ້ສະໜັບສະໜູນງົບປະມານດ້ານທຶນການສຶກສາ ແລະ ລາງວັນໃຫ້ແກ່ບັນດານັກຮຽນເກັ່ງທີ່ເສັງໄດ້ໃນລະດັບຊາດ ໂດຍມີລາງວັນທີ 1 ຮອດທີ 3 ແລະ ລາງວັນຊົມເຊີຍຂອງແຕ່ລະວິຊາ. ນອກຈາກນັ້ນ, ລັດຖະບານລາວຍັງໄດ້ສະໜັບສະໜູນທຶນການສຶກສາໃຫ້ແກ່ນັກຮຽນເກັ່ງລະດັບຊາດ ຊັ້ນ ມ 7 ທີ່ຈະເຂົ້າຮຽນຕໍ່ໃນມະຫາວິທະຍາໄລ ໂດຍຍົກເວັ້ນການສອບເສັງ ແລະມີທຶນການສຶກສາໃຫ້ຕະຫຼອດໄລຍະສຶກສາຮໍ່າຮຽນ.

ນອກນັ້ນ, ຍັງມີບັນດາກິດຈະກຳຕ່າງໆ ເປັນຕົ້ນແມ່ນພານັກຮຽນເກັ່ງ ຈຳນວນ 144 ຄົນ ທີ່ເປັນຕົວແທນຂອງແຕ່ລະແຂວງໃນຂອບເຂດທົ່ວປະເທດ ໄປທັດສະນະທ່ອງທ່ຽວຢ້ຽມຢາມຫໍພິພິທະພັນ ທ່ານ ໄກສອນ ພົມວິຫານ, ທາດຫຼວງວຽງຈັນ, ເຂົ້າແລກປ່ຽນບົດຮຽນການຮຽນ – ການສອນລະບົບສາກົນຂອງບັນດາໂຮງຮຽນນານາຊາດ ແລະ ໃນວັນທີ 28 ມີກິດຈະກຳຖາມ – ຕອບຄຳຖາມວິທະຍາສາດ ແລະ ຄວາມຮູ້ຮອບຕົວ ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ ແລະ ຄາດວ່າຈະປະກາດຜົນໃນຕອນແລງຂອງວັນທີ 29 ມີນາ 2019 ນີ້.

ທ່ານ ອາຈານ ເສັງກິຢ່າງ ຈິວຫວ່າງ ຫົວໜ້າຂະແໜງສາມັນສຶກສາ ແຂວງໄຊສົມບູນ ໃຫ້ສຳພາດວ່າ: ການເສັງນັກຮຽນເກັ່ງລະດັບຊາດໃນປີນີ້ ເປັນປີທີ 5 ທີ່ແຂວງເຮົາໄດ້ເຂົ້າຮ່ວມແຂ່ງຂັນສອບເສັງນັກຮຽນເກັ່ງໃນລະດັບຊາດ ເຊິ່ງໃນປີນີ້ຄາດວ່າແຂວງໄຊສົມບູນ ຈະສາມາດຍາດໄດ້ລາງວັນນັກຮຽນເກັ່ງ ປະມານ 1 ວິຊາ ເປັນຕົ້ນວິຊາເຄມີສາດ.

ທ່ານ ອາຈານ ເກດສະໜາ ແກ້ວສະໜິດຫົວໜ້າຂະແໜງສາມັນສຶກສາ ແຂວງຈຳປາສັກ, ຄະນະກຳມະການຈັດການສອບເສັງໃຫ້ສຳພາດວ່າ: ຕົນເອງມີຄວາມພູມໃຈທີ່ກະຊວງສຶກສາທິການ ແລະ ກີລາ
ໄດ້ຈັດການສອບເສັງນັກຮຽນເກັ່ງລະດັບຊາດໃນຄັ້ງນີ້ ເຊິ່ງຖືວ່າມີຄວາມສຳຄັນ ແລະ ຈຳເປັນເພື່ອເປັນກຳລັງໃຈໃຫ້ແກ່ບັນດາຄູ – ອາຈານຜູ້ສິດສອນ ແລະນ້ອງນັກຮຽນເກັ່ງທັງຫຼາຍໄດ້ມີໂອກາດສະແດງ ຄວາມຮູ້, ຄວາມສາມາດຂອງຕົນ ເຊິ່ງໃນປີຜ່ານມາແຂວງຈຳປາສັກສາມາດຍາດໄດ້ລາງວັນນັກຮຽນເກັ່ງລະດັບຊາດໄດ້ ຈຳນວນ 5 ຄົນ ແລະ ປີນີ້ຫວັງວ່າແຂວງເຮົາຈະສາມາດຍາດໄດ້ອີກ.