ປະຫວັດຍາວນານ “ບຸນອອກພັນສາ” ເສຍດາຍປີນີ້ບໍ່ໄດ້ຈັດບຸນໃຫຍ່

157

ບຸນອອກພັນສາປະວໍລະນາທີ່ທຸກໆປີຈະຈັດຂຶ້ນໃນວັນ 15 ຄໍ່າເດືອນ 11 ລາວ ເຊິ່ງປີນີ້ກົງກັບວັນທີ 21 ຕຸລາ 2021 ຖືເປັນບາງບຸນໃຫຍ່ ໃນຮີດ 12 ຂອງລາວໄດ້ໝູນວຽນມາອີກຄັ້ງໜຶ່ງ ເຖິງວ່າປີນີ້ປະເທດເຮົາຈະບໍໄດ້ມີໂອກາດຈັດງານບຸນນີ້ໃຫ້ຍິ່ງໃຫຍ່ຄືທີ່ຜ່ານໆມາກ່ອນມີໂຄວິດ ແຕ່ເປັນຄົນລາວຊາວພຸດຕ້ອງຮູ້ຈັກປະຫວັດຄວາມເປັນມາຂອງງານບຸນນີ້.
ວັນບຸນອອກພັນສາ ມີປະຫວດທີ່ໜ້າສົນໃຈ ແລະ ມີຫຼາຍເຫດການທີ່ເກີດຂຶ້ນໃນວັນນີ້ ບໍ່ວ່າຈະເປັນ, ການຕັກບາດ, ໄຫຼເຮືອໄຟ, ລອຍກະທົງ, ໃຕ້ທູບທຽນ, ວຽນທຽນ ແລະ ໃນມື້ຕໍ່ມາກໍມີການຊ່ວງເຮືອ ທີ່ເອີ້ນວ່າບຸນຊ່ວງເຮືອນັ້ນເອງ.


ຄຳວ່າອອກພັນສານັ້ນໄດ້ແກ່ການອະນຸຍາດໃຫ້ພະພິກຂຸສົງອອກຈາກເຂດຈຳກັດຫຼັງຈາກການເຂົ້າຈຳພັນສາ ຄົບ 3 ເດືອນ ເພື່ອອອກໄປປະຕິບັດໜ້າທີ່ຢູ່ບ່ອນອື່ນໄດ້ ເອີ້ນອີກຢ່າງໜິ່ງວ່າ ການອອກຈາກລະດູຝົນ.

ມູນເຫດແມ່ນເພື່ອເປີດໂອກາດໃຫ້ພະສົງລະກະກິດທາງສາສະໜາ ເຊັ່ນໄປເທດສັ່ງສອນປະຊາຊົນ ບວດກຸນລະບຸດ ສືບອາຍຸພະພຸດສະສາສະໜາເປັນຕົ້ນ ໄດ້ທໍາກິດສ່ວນຕົວ ເຊັ່ນ ໄປຢ້ຽມຢາມຍາດພີ່ນ້ອງພໍ່ແມ່ ອຸປັດຊາອາຈານເປັນຕົ້ນ ຈຶ່ງຊົງອະຍຸຍາດໃຫ້ພັນສາກ່ອນຈະອອກຕ້ອງປະວາລານາເສຍກ່ອນ
ເມື່ອເຖິງມື້ຂຶ້ນ 14 ຄໍ່າຂອງເດືອນ 11 ຊາວພຸດທັງຫຼາຍພາກັນຈັດຫາວັດຖຸທານຕ່າງໆມາໄວ້ຖວາຍທານຕາມກຳລັງສັດທາຂອງຕົນ
ເມື່ອເຖິງມື້ເພັງ15 ຄໍ່າ ເດືອນ 11 ເວລາ 7 ໂມງເຊົ້າ ຊາວພຸດທັງຫຼາຍກໍມາເຕົ້າໂຮມກັນຖວາຍຂອງທານ ທີ່ໄດ້ກະກຽມໄວ້ ດ້ວຍການຕັກບາດຢູ່ໃນວັດພ້ອມທັງຖວາຍຜ້າຈີວອນ ຫຼື ຜ້າຈຳນຳພັນສາໃຫ້ແກ່ພະພິກຂຸສົງ.


ຕອນກາງຄືນໍມີການວຽນທຽນ, ໄຕ້ໂຄມໄຟ, ລອຍກະທົງ, ໄຫຼເຮືອໄຟ ແລະ ງົບງັນຕ່າງໆຕາມປະເພນີບຸນ
ພໍຮອດມື້ຕໍ່ມາ ມື້ແຮມ 1 ຄໍ່າ ກໍມີການຈັດຊ່ວງເຮືອລະຫວ່າງຊຸມຊົນຕ່າງໆ ແລະ ຄົບງັນກັນຕາມປະເພນີ ຕະຫຼອດທັງຄືນ. ຈຸດປະສົງ ຂອງການຊ່ວງເຮືອ ແລະ ການໄຫຼເຮືອໄຟ ແມ່ນເພື່ອສົມມາຄາລະວະ ພ້ອມທັງບວງສວງຂໍໂຊກຂໍລາບຈາກ ພະຍານາກ ແລະ ເທວະດາ ອົງທີ່ໄດ້ປົກປັກຮັກສາ ແມ່ນໍ້າ ລຳເຊຕະຫຼອດຮອດຫ້ວຍຮ່ອງຄອງບຶງ ບ່ອນທີ່ຊາວພຸດທັງຫຼາຍໄດ້ທຳມາຫາກິນຢ່າງສະຫງົບສຸກແຕ່ບູຮານນະການມາ.


ການທີ່ຊາວພຸດທັງຫຼາຍ ແຫ່ວຽນທຽນ,ເຮັດເຮືອໄຟໂຄກ ແລະ ໄຕ້ທູບ ໄຕ້ທຽນ… ແມ່ນຖືເອົາຕາມແບບຢ່າງຂອງເທບພະບຸດ ແລະ ເທບພະທິດາທັງຫຼາຍ ທີ່ແຫ່ພະສຳມາສຳພຸດທະເຈົ້າ ເມື່ອຄັ້ງພະອົງສະເດັດຈາກຊັ້ນດາວະດິງ ຄືໝາຍເຖິງເມືອງສະຫວັນຊັ້ນຟ້າ ລົງມາສູ່ເມືອງມະນຸດ ໃນມື້ແຮມ 1 ຄໍ່າ ເດືອນ 11, ລົງມາຕາມຂັ້ນໄດແກ້ວ, ຂັ້ນໄດຄຳ ແລະຂັ້ນໄດເງິນ. ພະອົງສະເດັດ ລົງຕາມຂັ້ນໄດຄຳ, ສ່ວນ ເທບພະບຸດ ເທບພະທິດາ ແລະສາວົກທັງຫຼາຍ ແມ່ນ ລົງຕາມຂັ້ນໄດເງິນ ແລະ ຂັ້ນໄດແກ້ວ ທີ່ຕັ້ງຢູ່ສອງຟາກຂ້າງຂອງຂັ້ນໄດຄຳ. ການແຫ່ພະອົງໃນຄັ້ງນັ້ນ ເປັນຂະບວນການແຫ່ ທີ່ຍິ່ງໃຫຍ່ ແລະຕະຫຼອດເສັ້ນທາງ ພະອົງມີລັດສະໝີເປັ່ງປະກາຍສະຫວ່າງ ສະໄຫວໄປທົ່ວໂລກເຮັດໃຫ້ເທບພະບຸດ ເທບທິດາ ທີ່ຢູ່ເມືອງສະຫວັນຊັ້ນຟ້າ, ມະນຸດ ທີ່ຢູ່ໃນໂລກຂອງມະນຸດ ແລະ ສັດນະຮົກທຸກປະເພດ ທີ່ຢູ່ຊັ້ນຕໍ່າສຸດ ໄດ້ເຫັນແຈ້ງສະພາບຂອງກັນແລະ ກັນໝົດ.


ດັ່ງນັ້ນ ພວກເຮົາຊາວພຸດທັງຫຼາຍ ໂດຍຖືເອົາຕາມຄວາມເຊື່ອ ທີ່ມີມາແຕ່ກ່ອນນັ້ນ ມາປະຕິບັດກັນ ຈົນເປັນປະເພນີ ສືບຕໍ່ກັນມາເທົ່າທຸກວັນນີ້. ສໍາລັບດອກໄມ້ທີ່ເພິ່ນມັກນຳໃຊ້ ເຂົ້າໃນພິທີບຸນອອກພັນສາ ແມ່ນດອກໄມ້ທີ່ມີສີຂາວ ເປັນສ່ວນຫຼາຍ ດັ່ງ ດອກພຸດ, ດອກອິນທະຫວາ, ດອກຊ້ອນ ແລະ ສີອື່ນເຊັ່ນ: ດອກດາວເຮືອງ ….

.
ດັ່ງນີ້ເປັນຕົ້ນ ສຳລັບໃສ່ຂັນຫ້າ ຂັນແປດ, ໃສ່ບ້າງ ໃສ່ຊວຍ,ເອ້ໝາກເບັງ, ເອ້ກະໂທງ, ສ່ວນວ່າ ດອກບົວຫຼວງ ແມ່ນເພິ່ນນຳໃຊ້ ບູຊາພະ ແລະ ໃສ່ໃນບາດສະຫວັນເທົ່ານັ້ນ.
ແຕ່ສໍາລັບປີນີ້ເນື່ອງຈາກສະຖານະການໂຄວິດ 19 ແມ່ນຈະບໍ່ມີການຈັດງານບຸນ ມີພຽງໃຕ້ທູບທຽນ, ຕາມວັດວາອາລາມ ແລະ ເຮືອນຊານຂອງຕົນເທົ່ານັ້ນ
ບົດຄວາມ: ຄະນະສີລະປະ ພະນາ