ວຸ້ນນົມສົດໃສ່ໝາກໄມ້ລວມເພີ່ມຄວາມສົດຊື່ນໃຫ້ແກ່ຮ່າງກາຍ

47

ມື້ນີ້ຈະປຸງແຕ່ງອາຫານປະເພດຂອງຫວານ ໂດຍຈະເຮັດວຸ້ນນົມສົດປະສົມໝາກໄມ້ລວມ ເພື່ອເພີ່ມລົດຊາດໃຫ້ຕ່າງຈາກວຸ້ນລົດຊາດເກົ່າໆ ແລະ ໝາກໄມ້ຍັງໃຫ້ກາກໃຍແກ່ຮ່າງກາຍຊ່ວຍໃຫ້ລະບົບຍ່ອຍອາຫານໄດ້ດີອີກດ້ວຍ.

ສ່ວນປະສົມ.

– ຜົງວຸ້ນ 2+1/2 ບ່ວງແກງ.

– ນ້ຳສະອາດ 4 ຖ້ວຍນ້ອຍ.

– ນ້ຳຕານ 1/2 ຖ້ວຍນ້ອຍ.

– ນົມສົດລົດຈືດ 2 ຖ້ວຍນ້ອຍ.

– ເກືອ 1/2 ບ່ວງກາເຟ.

– ໝາກລຳໄຍແກະແກ່ນອອກ 100 ກຣາມ.

– ໝາກກີວີ 2 ໜ່ວຍ.

– ໝາກກ້ຽງ 2 ໜ່ວຍ.

– ໝາກມັງກອນ 1 ໜ່ວຍ.

– ອະງຸ່ນຂຽວ ຫຼື ແດງກໍໄດ້ 100 ກຣາມ.

อาจเป็นรูปภาพของ ของหวาน และผลไม้

ວິທີປຸງແຕ່ງ:

1. ເລີ່ມຈະການປອກໝາກໄມ້ແລ້ວຊອຍເປັນຕອນ 4 ຫຼ່ຽມນ້ອຍ ໃສ່ກັບເຂົ້າຕູ້ເຢັນໄວ້ ແລ້ວເອົານໍ້າ ແລະ ຜົງວຸ້ນໃສ່ໝໍ້ຄົນໃຫ້ເຂົ້າກັນກ່ອນຈຶ່ງຄ້າງໄຟປານກາງຕົ້ມຈົນໃຫ້ວຸ້ນລະລາຍໃສ່ ນ້ຳຕານ, ເກືອ ແລະ ນົມລົງຕົ້ມຕໍ່ຈົນຟົດ ( ໃນເວລາທີ່ເລີ່ມຕົ້ມວຸ້ນໃຫ້ຄົນຕະຫຼອດຈົນຟົດເພື່ອໃຫ້ຜົງວຸ້ນລະລາຍ ແລະ ບໍ່ໃຫ້ວຸ້ນຕິດກົ້ນໝໍ້ນຳ ).

อาจเป็นรูปภาพของ สตรอว์เบอร์รี, ของหวาน และสถานที่ในร่ม

2. ເມື່ອຟົດກໍປົງລົງຖອກໃສ່ພິມແບບຕ່າງໆຕາມໃຈມັກບໍ່ວ່າຈະໃສ່ຈອກ ຫຼື ຖ້ວຍນ້ອຍກໍໄດ້ແລ້ວນໍາໄປແຊ່ເຢັນ ເຊິ່ງວິທີໃສ່ໝາກໄມ້ຈະມີຢູ່ 2 ວິທີ ຄື: ປະວຸ້ນໄວ້ໃຫ້ອຸ່ນກ່ອນແລ້ວເອົາໝາກໄມ້ໃສ່ພິມຈຶ່ງຖອກວຸ້ນໃສ່ໝາກໄມ້ຈະຢູ່ທາງໃນວຸ້ນເລີຍ ແລະ ອີກວິທີ ຄື: ຖອກວຸ້ນໃສ່ພິມປະໄວ້ໃຫ້ເຢັນໜ້ອຍໜຶ່ງ ຫຼື ເນື້ອວຸ້ນຍັງບໍ່ແຂງໂຕຈຶ່ງໃສ່ໝາກໄມ້ ເຊິ່ງໝາກໄມ້ຈະຄ່ອຍໄຫຼລົງໄປຢູ່ທາງໃນວຸ້ນເຊັ່ນກັນ. ຖ້າໝາກໄມ້ຍັງເຫຼືອໃຫ້ນຳໄປແຊ່ເຢັນເວລາເສີບກໍເອົາໝາກໄມ້ທີ່ເຫຼືອມາໂຮຍໜ້າກິນແລ້ວຈະຮູ້ສຶກສົດຊື່ນຈາກນົມສົດ ແລະ ໝາກໄມ້.

ໝາຍເຫດ: ສຳລັບໝາກໄມ້ແນະນຳໃຫ້ໃຊ້ເປັນໝາກໄມ້ສົດຈະດີກວ່າໝາກໄມ້ກະປ໋ອງ ແລະ ມີຄຸນຄ່າທາງອາຫານຫຼາຍກວ່າ ເຊິ່ງໝາກໄມ້ແມ່ນສາມາດເລືອກໃຊ້ຕາມແຕ່ລະດູການ.