ສູນພາສາ ມີໄຊ ຈະເນັ້ນສອນທັກສະການເວົ້າ ເພື່ອເຮັດໃຫ້ນັກຮຽນນຳໃຊ້ພາສາອັງກິດໄດ້ຈິງ

188

ທ່ານເຄີຍ ຫຼື ບໍ່ ເມື່ອໄປຮຽນພາສາແລ້ວ ສາມາດອ່ານໄດ້, ຂຽນໄດ້ ເຂົ້າໃຈຫຼັກໄວຍະກອນ ແຕ່ຂາດຄວາມກ້າໃນການສະແດງອອກ, ບໍ່ກ້າໃນການເວົ້າຜິດ ເວົ້າຖືກ, ອາຍທີ່ຈະເວົ້າກັບເຈົ້າຂອງພາສາ. ສູນພາສາ ມີໄຊ ທີ່ເປີດໃໝ່ຈະເຂົ້າມາຊ່ວຍຈຸດດັ່ງກ່າວ ໂດຍສູນຈະສອນທັກສະການເວົ້າ ຄຽງຄູ່ການສອນດ້ານອື່ນ ເພື່ອເຮັດໃຫ້ນັກຮຽນນຳໃຊ້ພາສາໄດ້ຈິງ.

ໃນວັນທີ 26 ທັນວາ 2020 ຜ່ານມາ ໄດ້ມີພິທີເປີດສູນພາສາ ມີໄຊ ຂຶ້ນຢ່າງເປັນທາງການຢູ່ທີ່ວິທະຍາໄລການເງິນມີໄຊ, ບ້ານດົງໂດກ ເມືອງໄຊທານີ ນະຄອນຫຼວງວຽງຈັນ ໂດຍເປັນເຂົ້າຮ່ວມຂອງ ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ນະຄອນຫຼວງວຽງຈັນ, ມີ ທ່ານ ນາງ ໂອລີລັກ ໂສມອຸໄລ ຜູ້ອຳນວຍການວິທະຍາໄລ ການເງິນມີໄຊ ພ້ອມດ້ວຍຜູ້ຕ່າງໜ້າຈາກກະຊວງສຶກສາທິການ ແລະ ກິລາ, ຄະນະກົມສື່ມວນຊົນ ປກສ, ຄະນະບໍລິຫານງານໂທລະພາບນະຄອນຫຼວງວຽງຈັນ ແລະ ຄູອາຈານ, ສື່ມວນຊົນເຂົ້າຮ່ວມ.

ທ່ານ ນາງ ໂອລີລັກ ໂສມອຸໄລ ກ່າວວ່າ: ການຈັດງານໃນມື້ນີ້ ແມ່ນເພື່ອເປີດສູນພາສາ ມີໄຊ ຢ່າງເປັນທາງການ ແລະ ເປັນງານກິນລ້ຽງສັງສັນສົ່ງທ້າຍປີເກົ່າ 2020, ຕ້ອນຮັບປີໃໝ່ 2021 ທີ່ຈະມາເຖິງ ແລະ ມີຫຼາຍຄົນມັກຖາມວ່າເປັນຫຍັງຕ້ອງເປັນສູນພາສາ ເພາະປົກກະຕິແລ້ວ ວິທະຍາໄລ ການເງິນມີໄຊ ກໍມີການສອນພາສາໄລຍະສັ້ນຢູ່ແລ້ວ. ແຕ່ແນວຄວາມຄິດການເປີດສູນພາສານີ້ຂຶ້ນມາ ແມ່ນໄດ້ມາຈາກການປະເມີນການຮຽນ-ການສອນຂອງນັກຮຽນໄລຍະສັ້ນ ເຫັນວ່າຜົນໄດ້ຮັບຍັງບໍ່ໄດ້ຕາມຄາດໝາຍຄື ນັກຮຽນຍັງບໍ່ສາມາດນຳໃຊ້ພາສາອັງກິດເຂົ້າໃຈຕົວຈິງ ໂດຍສະເພາະແມ່ນການສື່ສານ ເຊິ່ງຕາມການປະເມີນເຫັນວ່ານັກຮຽນບາງຄົນສາມາດອ່ານໄດ້, ຂຽນໄດ້ ເຂົ້າໃຈຫຼັກໄວຍະກອນ ແຕ່ຂາດຄວາມກ້າໃນການສະແດງອອກ, ຂາດຄວາມກ້າໃນການເວົ້າຜິດ ເວົ້າຖືກ ແລະ ອາຍທີ່ຈະເວົ້າກັບອາຈານເຈົ້າຂອງພາສາ.

ດັ່ງນັ້ນ, ຈຶ່ງມີການປຶກສາຫາລືແບບໃໝ່ ໂດຍມີການປະສານສົມທົບກັບການສອນທັກສະໃນການປາກເວົ້າ ເພື່ອເຮັດໃຫ້ນັກຮຽນນຳໃຊ້ພາສາອັງກິດໃນຕົວຈິງ ກໍຄືການເຮັດວຽກສື່ສານໄດ້ຢ່າງມີປະສິດທິພາບ ແລະ ພ້ອມທັງຂໍຝາກສູນພາສາມີໄຊ ເປັນສ່ວນໜຶ່ງໃນການພັດທະນາບຸກຄະລາກອນຂອງຊາດ ໃຫ້ມີຄວາມຮູ້ຄວາມສາມາດທຽບເທົ່າກັບບັນດາປະເທດອ້ອມຂ້າງ, ທ່ານ ນາງ ໂອລີລັກ ໂສມອຸໄລ ກ່າວ.

ສູນພາສາ ມີໄຊ ຈະມີ 3 ຫຼັກສູນການຮຽນຄື ພາສາອັງກິດຊີວິດປະຈຳວັນ, ພາສາອັງກິດສຳລັບການພັດທະນາ ແລະ ພາສາອັງກິດສຳລັບສື່ມວນຊົນ ແຕ່ລະດັບເລີ່ມຕົ້ນ ຫາ ລະດັບສູງ. ເວລາຮຽນແມ່ນເລີ່ມແຕ່ 17:30-19:00 ໂມງ