ໃສ່ຜ້າປິດປາກ-ປິດດັງ ດີທີ່ສຸດ

480

ນັບແຕ່ເດືອນມັງກອນ ຮອດວັນທີ 05 ພຶດສະພາ 2020 ໄດ້ເກັບຕົວຢ່າງມາກວດທັງໝົດ 2.505 ຕົວຢ່າງ ກວດພົບເຊື້ອສະສົມ 19 ຄົນ (24 ມື້ ແລ້ວທີ່ບໍ່ມີຜູ້ຕິດເຊື້ອເພິ່ມ) ປະຈຸບັນມີຜູ້ນອນຕິດຕາມຢູ່ໂຮງໝໍມິດຕະພາບ 10 ຄົນ ລວມທັງຜູ້ຕິດເຊື້ອນ້ຳເບີ 14 ທີ່ເອົາກັບຄືນມານອນຕິດຕາມອາການຢູ່ໂຮງໝໍ…ນັ້ນຄືຄຳຖະແຫຼງຂອງຄະນະສະເພາະກິດໃນວັນທີ 06 ພຶດສະພາ 2020.

ມາຮອດມື້ນີ້ (06 ພຶດສະພາ 2020) ຖືວ່າເປັນເວລາ 3 ວັນແລ້ວທີ່ພວກເຮົາປະຕິບັດມາດຕະການຜ່ອນຜັນ ເຊິ່ງຈະແກ່ຍາວໄປຮອດວັນທີ 17 ພຶດສະພາ ຈຶ່ງຈະສິ້ນສຸດ. ແຕ່ຫຼາຍຄົນສັງເກດເຫັນວ່າ ການປະຕິບັດມາດຕະການປ້ອງກັນການຕິດເຊື້ອຂອງມວນຊົນບໍ່ເຂັ້ມງວດ ເປັນຕົ້ນແມ່ນ: ການປະຕິບັດໄລຍະຫ່າງ, ການໃສ່ຜ້າປິດປາກ-ປິດດັງ ເວລາອອກຈາກເຮືອນ ຫຼື ເວລາຢູ່ສະຖານທີ່ບໍລິການຕ່າງໆ
ການໃສ່ຜ້າປິດປາກ-ປິດດັງ ຫຼື ບາງຄົນກໍ່ເອີ້ນວ່າ ໜ້າກາກອະນາໄມ ຖືວ່າເປັນການປ້ອງກັນໄວຣັດ Covid -19 ເຂົ້າສູ່ຮ່າງກາຍໄດ້ຢ່າງມີຜົນ, ສະນັ້ນ ທາງເລືອກທຳອິດ ແມ່ນໜ້າກາກອະນາໄມການແພດ, ໜ້າກາກ N95 ຫຼື KN95, ໜ້າກາກອະນາໄມປະເພດອື່ນບໍ່ດີເທົ່າກັບໜ້າກາກ 3 ປະເພດນີ້; ການທີ່ໃສ່ໜ້າກາກຫຼາຍຊັ້ນ ແມ່ນບໍ່ສາມາດເພິ່ມປະສິດທິພາບໃນການປ້ອງກັນໄດ້ ແຕ່ເຮັດໃຫ້ຫາຍໃຈຍາກຊ້ຳ.

ການຖືເບົານັ້ນ ຖືວ່າເປັນອັນຕະລາຍຕໍ່ຕົນເອງ; ຕໍ່ຄອບຄົວ ແລະ ຕໍ່ສັງຄົມ; ເຖິງແມ່ນວ່າສະພາບລະບາດຂອງພະຍາດ Covid -19 ຢູ່ປະເທດເຮົາຜ່ອນຄາຍລົງກໍ່ຕາມ ແຕ່ພວກເຮົາບໍ່ຄວນປະໝາດ ແລະ ຍັງຕ້ອງລະວັງຢ່າງໃກ້ຊິດ ເພື່ອສະກັດກັ້ນບໍ່ໃຫ້ມີການລະບາດຄືນຄັ້ງທີສອງ. ສະນັ້ນ ຈຶ່ງຮຽກຮ້ອງໃຫ້ທຸກພາກສ່ວນ ໝົດທຸກຄົນໃນສັງຄົມເອົາໃຈໃສ່ຮ່ວມແຮງຮ່ວມໃຈກັນຈັດຕັ້ງປະຕິບັດໃຫ້ຖືກຕ້ອງ ແລະ ເຂັ້ມງວດ. ການທີ່ຈະປ້ອງກັນການລະບາດຄືນມາຮອບໃໝ່ ຫຼື ຈະເພິ່ມການຜ່ອນຜັນມາດຕະການອື່ນໆ ຫຼັງຈາກວັນທີ 17 ພຶດສະພາ ນີ້ ແມ່ນຂຶ້ນກັບພວກເຮົາໝດທຸກຄົນ.
ຮ່ວມແຮງຮວມໃຈຕ້ານພະຍາດ Covid -19 ແມ່ນໜ້າທີ່ ແລະ ພັນທະຂອງໝົດທຸກຄົນ.
ໂດຍ: ທິດດີ