ກ້າເບ້ຍໄມ້ຂາຍສ້າງອາຊີບໝັ້ນທ່ຽງພັດທະນາຄອບຄົວ

683

ອາຊີບກ້າເບ້ຍໄມ້ແມ່ນໜຶ່ງອາຊີບທີ່ສາມາດສ້າງລາຍຮັບໃຫ້ກັບປະຊາຊົນບ້ານຕາດທອງ ເມືອງສີໂຄດຕະບອງ ນະຄອນຫຼວງວຽງຈັນ. ດັ່ງນັ້ນ, ຫຼາຍຄອບຄົວຈຶ່ງໄດ້ໃຫ້ຄວາມນິຍົມປະກອບອາຊີບເຮັດສວນກ້າເບ້ຍໄມ້ ສົ່ງຂາຍພາຍໃນເມືອງກໍຄືພາຍໃນນະຄອນຫຼວງວຽງຈັນ.

ນາງ ນຸດ ເໝືອນສິດທິດາ ເຈົ້າຂອງສວນກ້າເບ້ຍໄມ້ ປ້າຄຳ ໄດ້ກ່າວວ່າ: ກ່ອນຈະຫັນມາເຮັດສວນກ້າເບ້ຍໄມ້ນັ້ນໃນເມື່ອກ່ອນແມ່ນໄດ້ເປັນແມ່ເຮືອນ ເຊິ່ງບໍ່ມີລາຍຮັບ. ດັ່ງນັ້ນ, ຜູ້ເປັນແມ່ຍ່າທີ່ໄດ້ປະກອບອາຊີບກ້າເບ້ຍໄມ້ມາກ່ອນຈຶ່ງໄດ້ແນະນຳໃຫ້ມາຮຽນຮູ້ວິທີກ້າເບ້ຍໄມ້ຊະນິດຕ່າງໆ ໃນເບື້ອງຕົ້ນໄດ້ອາໄສມາເຮັດວຽກຊ່ວຍພາຍໃນສວນຂອງແມ່ຍ່າເພື່ອຮຽນຮູ້ທຸກວິທີການໃນການປະກອບອາຊີບເຮັດສວນກ້າເບ້ຍໄມ້ ເມື່ອມີຄວາມຊຳນິຊຳນານແລ້ວ ທາງຜູ້ເປັນແມ່ຍ່າຈຶ່ງໄດ້ມອບກິດຈະການກ້າເບ້ຍໄມ້ໃຫ້ຮັບຜິດຊອບສືບຕໍ່ຈາກຄອບຄົວ ໄດ້ເລີ່ມລົງມືເຮັດສວນກ້າເບ້ຍໄມ້ໃນປີ 2014 ໃນເນື້ອທີ່ 1 ເຮັກຕາ ສວນກ້າເບ້ຍໄມ້ມີຫຼາຍຊະນິດມີທັງໄມ້ປະດັບ, ໄມ້ໃຫ້ໝາກ ແລະ ໄມ້ອຸດສາຫະກຳ ປະມານ 40 – 50 ຊະນິດ ຂາຍເລີ່ມແຕ່ລາຄາ 2 ພັນກີບ ຫາ 1 ແສນກີບ.

ໃນການເຮັດສວນກ້າເບ້ຍໄມ້ແມ່ນໄດ້ຮັບການສະໜັບສະໜູນດ້ານວິຊາການບັນດາຊ່ຽວຊານຈາກພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ກໍຄືຫ້ອງການກະສິກຳ ແລະ ປ່າໄມ້ ເມືອງສີໂຄດຕະບອງ ໄດ້ໃຫ້ທິດຊີ້ນຳກ້າປະເພດເບ້ຍໄມ້ທີ່ຊາວກະສິກອນ ກໍຄືຊາວສວນ ແລະ ປະຊາຊົນທົ່ວໄປກຳລັງນິຍົມກັນປູກ. ພ້ອມນັ້ນ, ຍັງໄດ້ເຊີນເຂົ້າຮ່ວມງານວາງສະແດງເບ້ຍໄມ້ໃນແຕ່ລະປີ ເຊິ່ງໄດ້ເຮັດໃຫ້ຮ້ານຂາຍເບ້ຍໄມ້ຂອງຂ້າພະເຈົ້າໄດ້ເປັນທີ່ຮູ້ຈັກຂອງສັງຄົມຢູ່ນະຄອນຫຼວງວຽງຈັນຢ່າງກວ້າງຂວາງ ສົ່ງຜົນໃຫ້ມີລູກຄ້າປະຈຳທາງພາກລັດ ແລະ ເອກະຊົນ ລວມທັງປະຊາຊົນທົ່ວໄປ ໃນການຈຳໜ່າຍເບ້ຍໄມ້ນັ້ນໄລຍະທີ່ໄດ້ຂາຍດີແມ່ນໄລຍະເດືອນພຶດສະພາຕໍ່ໃສ່ເດືອນມິຖຸນາ ເພາະໄລຍະດັ່ງກ່າວແມ່ນຢູ່ໃນໄລຍະສ້າງຂະບວນການສະເຫຼີມສະຫຼອງວັນປູກຕົ້ນໄມ້ແຫ່ງຊາດ.

ນາງ ນຸດ ເໝືອນສິດທິດາ ໄດ້ກ່າວຕື່ມວ່າ: ສຳລັບການຈຳໜ່າຍເບ້ຍໄມ້ແມ່ນສາມາດສ້າງລາຍຮັບໃຫ້ກັບຄອບຄົວ ສະເລ່ຍ 30 ລ້ານກີບຕໍ່ປີ ເຊິ່ງເງິນສ່ວນນີ້ແມ່ນໄດ້ນໍາໄປປະກອບໃຊ້ປັບປຸງຊີວິດການເປັນຢູ່ຂອງຄອບຄົວໃຫ້ນັບມື້ເຂັ້ມແຂງຂຶ້ນເທື່ອລະກ້າວ ເວົ້າສະເພາະປັດຈຸບັນນີ້ແມ່ນສາມາດກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໄດ້ ສໍາລັບລູກຄ້າທ່ານໃດທີ່ສົນໃຈຊື້ເບ້ຍໄມ້ທີ່ສົມບູນ ແລະ ແຂງແຮງກໍສາມາດມາຊື້ໄດ້ທີ່ຮ້ານຈຳໜ່າຍ ປ້າຄຳຫຼ້າ ທີ່ບ້ານໜອງດາ ແລະ ຢູ່ສວນຕາດທອງ ເມືອງສີໂຄດຕະບອງ ນະຄອນຫຼວງວຽງຈັນ ມີເບ້ຍໄມ້ຫຼາຍຊະນິດໃຫ້ເລືອກຊື້ເພື່ອນຳໄປປູກ.

ຫຼາຍຄອບຄົວທີ່ມີເນື້ອທີ່ດິນເປົ່າວ່າງທີ່ບໍ່ຮູ້ຈະປະກອບອາຊີບສ້າງລາຍຮັບຫຍັງ ກໍຄວນທົດລອງຫັນມາປະກອບອາຊີບນີ້ ເພາະໃຊ້ຕົ້ນທຶນຕໍ່າອາໄສແຕ່ ຄວາມດຸໝັ່ນໃນການກ້າເບ້ຍໄມ້, ບົວລະບັດຮັກສາດ້ວຍການຫົດນໍ້າ, ຫຼົກຫຍ້າພຽງເທົ່ານີ້ກໍສາມາດປະກອບອາຊີບນີ້ສ້າງລາຍຮັບໄດ້ປີໜຶ່ງຫຼາຍສິບລ້ານກີບ.

Laoedaily