ທັກຟອຍຂາຍ ສ້າງລາຍຮັບ 20ລ້ານກີບຕໍ່ປີ

468

ການພັດທະນາຄອບຄົວ ກໍ່ແມ່ນວຽກງານໜຶ່ງ ທີ່ມີຄວາມສຳຄັນຫຼາຍ ໃນການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະແມ່ນການພັດທະນາທາງດ້ານເສດຖະກິດຄອບຄົວ ໃຫ້ຫຼຸດພົ້ນອອກຈາກຄວາມທຸກຍາກ ເປັນຄອບຄົວພັດທະນາ ທີ່ມີຄວາມເຂັ້ມແຂງ ສາມາດສ້າງລາຍຮັບກຸ້ມຕົນເອງ ແລະ ກາຍເປັນຕົວແບບ 4 ບຸກ ດ້ານວິຊາຊີບ-ສ້າງວຽກເຮັດງານທຳ ເຊັ່ນດຽວກັນກັບ ສະຫາຍ ສົມມີ ປັນຍາສີ ອາຍຸ 29 ປີ ທີ່ນອກຈາກຈະເປັນພະນັກງານຄູແລ້ວຍັງຫັນມາເຮັດອາຊີບເສີມດ້ວຍການທັກຟອຍຂາຍ ສ້າງລາຍຮັບປີລະ 20ລ້ານກີບ.

ສະຫາຍ ສົມມີ ປັນຍາສີ ເປັນພະນັກງານຄູ ສອນຢູ່ໂຮງຮຽນ ມ ສ ສຶກສາສົງແຂວງຄຳມ່ວນ; ໄດ້ສ້າງຄອບຄົວ ແລະ ມີລູກ 1 ຄົນ, ເຊິ່ງສະຫາຍກໍ່ເປັນສະມາຊິກຊາວໜຸ່ມຕົວແບບຜູ້ດີເດັ່ນຜູ້ໜຶ່ງ ທີ່ມີຄວາມດຸໝັ່ນຫ້າວຫັນ ໃນການຊອກຫາແຫຼ່ງລາຍຮັບ ໃຫ້ແກ່ຄອບຄົວ, ໂດຍຖືເອົາອາຊີບການທັກຟອຍ ເປັນອາຊີບເສີມ ເພື່ອເຮັດໃຫ້ຊີວິດການເປັນຢູ່ດີຂຶ້ນ ສ້າງລາຍຮັບໃຫ້ແກ່ຄອບຄົວ ບວກກັບມູນເຊື້ອທີ່ເຄີຍສືບທອດກັນມາຈາກຮຸ້ນຕໍ່ຮຸ້ນຂອງຄອບຄົວຕົນເອງ.

ນອກຈາກນີ້ ສະຫາຍ ສົມມີ ປັນຍາສີ ຍັງໄດ້ໃຫ້ສຳພາດ ຕໍ່ທີມງານສື່ມວນຊົນ ຊາວໜຸ່ມແຂວງ ຄໍາມ່ວນວ່າ: ການທັກຟອຍຂາຍ ແມ່ນໃຊ້ເວລາວ່າງນອກໂມງການ ແລະ ວັນເສົາ, ອາທິດ ເປັນສ່ວນໃຫຍ່, ໃນເບື້ອງຕົ້ນໄດ້ລົງທຶນເຮັດຍູກວດ ແຕ່ປີ 2016 ດ້ວຍຕົ້ນທຶນພຽງແຕ່ 2.000.000 ກີບ, ຕໍ່ມາ ອີງໃສ່ຄວາມຕ້ອງການ ຂອງສັງຄົມ ຈຶ່ງໄດ້ລົງທຶນເພີ່ມຕື່ມອີກເລັກໜ້ອຍ ເຊີ່ງສາມາດສ້າງລາຍຮັບໃຫ້ຄອບຄົວເພີ່ມຂື້ນເລື້ອຍໆ, ສຳລັບວັດຖຸດິບທີ່ເອົາມາເຮັດຍູກວດ ແມ່ນຊື້ມາຈາກທ້ອງຖິ່ນອື່ນ ເພື່ອມາປະກອບທັກຟອຍ ເຊັ່ນ: ຕົ້ນແຂມ, ກ້ານຕານ, ລຳໄຜ່ ແລະ ເຊຶອກຢາງ, ການນຳໃຊ້ຕົ້ນທຶນກໍ່ບໍ່ຫລາຍປານໃດ ໂດຍຍູກວດທີ່ຕົນເອງທັກຂາຍມີຢູ່ 3 ປະເພດຄື: ຟອຍແຂມ, ຟອຍກ້ານຕານ, ແລະ ຟອຍໄມ້ໄຜ່, ເຊິ່ງໃນໜື່ງມື້ສາມາດທັກໄດ້ 10-15 ກ້ານ ຂາຍໃນລາຄາ 5.000 ກີບຕໍ່ກ້ານ ໂດຍສະເລ່ຍໜື່ງປີສາມາດສ້າງລາຍຮັບໄດ້ເກືອບ 20 ລ້ານກີບຕໍ່ປີ, ດ້ານການຈຳໜ່າຍຂາຍອອກສູ່ຕະຫຼາດ ແມ່ນພາຍຫຼັງທີ່ສຳເລັດແລ້ວ ມີແມ່ຄ້າມາຮັບຊື້ຢູ່ເຮືອນເລີຍ ແຮງງານຫຼັກແມ່ນສະມາຊິກພາຍໃນຄອບຄົວ 5 ຄົນ ເຮັດຊ່ວຍກັນ.

ສະຫາຍ ສົມມີ ປັນຍາສີ ໄດ້ໃຫ້ຂໍ້ມູນຕື່ມອີກວ່າ ນອກຈາກທັກຍູກວດແລ້ວ ກໍ່ຍັງໄດ້ລ້ຽງເປັດ, ລ້ຽງໄກ່, ລ້ຽງໝູ ແລະ ລ້ຽງຈີ້ງລີດ ໄວ້ເພື່ອເປັນສະບຽງອາຫານພາຍໃນຄອບຄົວ ໂດຍບໍ່ຈຳເປັນຕ້ອງໄປຊື້ມາຈາກບ່ອນອື່ນ ຈິ່ງເຮັດໃຫ້ຄອບຄົວມີຢູ່ມີກິນ ນີ້ແມ່ນສະແດງໃຫ້ເຫັນເຖິງຄວາມດຸໝັ່ນຂະຫຍັ່ນພຽນ ແລະ ອົດທົນ ຂອງສະມາຊິກຊາວໜຸ່ມ.

ພ້ອມດຽວກັນນັ້ນ ສະຫາຍ ສົມມີ ປັນຍາສີ ຍັງໄດ້ຝາກບົດຮຽນດັ່ງກ່າວນີ້ ເຖິງບັນດາສະຫາຍສະມາຊິກຊາວ ໜຸ່ມໃນທົ່ວປະເທດ ຈົ່ງພ້ອມກັນເອົາໃຈໃສ່ສ້າງເສດຖະກິດຄອບຄົວ ໃຫ້ມີຄວາມເຂັ້ມແຂງ ໂດຍສະເພາະການເຮັດຫັດຖະກໍາ ແລະ ກະສິກຳ ແຕ່ຕ້ອງໄດ້ທຸ້ມເທທັງແຮງກາຍ ແລະ ແຮງໃຈ ຈື່ງສາມາດເຫັນໄດ້ຜົນສຳເລັດເປັນຮູບປະທຳ ຢ່າງພາກພູມໃຈ.

ທີ່ມາ: khammouane News