7ສະໝຸນໄພພື້ນບ້ານ ແກ້ເບົາຫວານ ແລະ ຄວາມດັນ

689

ພະຍາດເບົາຫວານເປັນພະຍາດຊ້ຳເຮື້ອທີ່ປິ່ນປົວບໍ່ຫາຍ ເຊິ່ງຄົນເຈັບຈະມີອາການນ້ຳຕານໃນເລືອດສູງ ເພາະຮ່າງກາຍບໍ່ສາມາດນຳນ້ຳຕານໃນເລືອດທີ່ໄດ້ຈາກອາຫານໄປໃຊ້ໄດ້ປົກກະຕິ, ສາເຫດເກີດຈາກຮ່າງກາຍມີຄວາມບົກພ່ອງຈາກຕັບອ່ອນເພຍ, ເກີດຈາກການລັ່ງອິນຊູລີນຜິດປົກກະຕິ ເຊິ່ງອິນຊູລີນມີໜ້າທີ່ນຳນ້ຳຕານໃນເລືອດໄປສູ່ເນື້ອເຍື່ອຕ່າງໆໃນຮ່າງກາຍ ເພື່ອສ້າງພະລັງງານໃຫ້ຮ່າງກາຍ ເມື່ອອິນຊູລີນບໍ່ພຽງພໍກໍຈະເຮັດໃຫ້ນ້ຳຕານໃນເລືອດສູງຂຶ້ນນັ້ນເອງ.

ເຊິ່ງຄົນເຈັບມັກຈະເກີດພະຍາດແຊກຊ້ອນຕ່າງໆຕາມມາ ເຊັ່ນ: ພະຍາດຄວາມດັນ, ພະຍາດຫຼອດເລືອດໃນຫົວໃຈ, ຫຼອດເລືອດໃນສະໝອງ, ໝາກໄຂ່ຫຼັງອັກເສບ, ອາການມຶນຊາ, ປະສາດເສື່ອມ, ຕາມົວ, ເກີດຕໍ້ຫີນ, ຕໍ້ແວ່ນ ເຊິ່ງພະຍາດທີ່ມັກເປັນຄູ່ກັບພະຍາດເບົາຫວານຄືຄວາມດັນເລືອດ. ໃນປັດຈຸບັນການປິ່ນປົວເບົາຫວານ ແລະ ຄວາມດັນເລືອດ ແພດຈະໃຫ້ຢາມາກິນເພື່ອຊ່ວຍປະຄອງ ແລະ ບັນເທົາອາການ.

ສະນັ້ນ, ຄົນເຈັບເບົາຫວານ ແລະ ຄວາມດັນເລືອດ ລ້ວນແຕ່ສະແຫວງຫາວິທີຈະປິ່ນປົວພະຍາດນີ້ດ້ວຍການໃຊ້ສະໝຸນໄພຖືເປັນແນວທາງການປິ່ນປົວອີກທາງໜຶ່ງທີ່ໄດ້ຮັບຄວາມນິຍົມ ເຊິ່ງມີສະໝຸນໄພຫຼາຍຊະນິດທີ່ມີລາຍງານຈາກການສຶກສາວ່າ ມີສິດຫຼຸດລະດັບນ້ຳຕານໃນເລືອດ, ຕ້ານອະນຸມູນອິດສະຫຼະ, ຫຼຸດໄຂມັນໃນເລືອດ, ເຮັດໃຫ້ການໄຫຼວຽນຂອງຫຼອດເລືອດດີຂຶ້ນ ເຊິ່ງສະໝຸນໄພທີ່ນິຍົມໃນການນຳມາປິ່ນປົວພະຍາດເບົາຫວານ ແລະ ຄວາມດັນເລືອດ ແມ່ນຫຍັງ? ມື້ນີ້ພວກເຮົາຈະພາທ່ານມາຮູ້ຈັກກັບສະໝຸນໄພແກ້ເບົາຫວານ ແລະ ຄວາມດັນເລືອດ ດັ່ງຕໍ່ໄປນີ້:

1 ໝາກມະລະຂີ້ນົກ ຫຼື ຜັກໄຊ: ເປັນພືດຊະນິດເຄືອ ແລະ ເປັນຜັກພື້ນບ້ານ ອາດຈະນຳມາລວກກິນກັບແຈ່ວແຊບໆ ພ້ອມທັງມີວິຕາມິນ ເອ ແລະ ຊີ ສູງ ມີສັບພະຄຸນໃນການຫຼຸດນ້ຳຕານໃນເລືອດ.

2 ໃບຢານາງ: ມີສັບພະຄຸນເປັນຢາເຢັນ ເມື່ອເຮົາກິນເຂົ້າໄປຈະເຮັດໃຫ້ຮ່າງກາຍເຢັນລົງ, ເຮັດໃຫ້ລະບົບໃນຮ່າງກາຍສາມາດຜະລິດອິນຊູລີນມາເຜົາຜານນ້ຳຕານໄດ້ເປັນປົກກະຕິຈຶ່ງເປັນສະໝຸນໄພແກ້ເບົາຫວານໄດ້ນັ້ນເອງ.

3 ກະທຽມ: ມີຄຸນສົມບັດຊ່ວຍຫຼຸດ ຄວາມດັນເລືອດລົງໄດ້ ຄວນກິນຫົວກະທຽມແກ່ ຫາກກິນສົດຈະໄດ້ຮັບຄຸນປະໂຫຍດຫຼາຍກວ່າກະທຽມສຸກແລ້ວ.

4 ຫົວສີໃຄ: ເປັນສະໝຸນໄພແກ້ເບົາຫວານ ແລະ ຄວາມດັນທີ່ເຮົາຮູ້ຈັກກັນດີ ແລະ ນິຍົມນຳມາປະກອບອາຫານ ເຊິ່ງຫົວສີໃຄຈະມີສັບພະຄຸນໃນການຂັບປັດສາວະ, ຂັບລົມ ແລະ ຍັງຊ່ວຍຫຼຸດຄວາມດັນເລືອດໄດ້ອີກດ້ວຍ.

5 ຜັກຕຳນິນ: ໃນຜັກຕຳນິນມີປະໂຫຍດທີ່ຫຼາກຫຼາຍເປັນຢາພື້ນບ້ານໃຊ້ປິ່ນປົວພະຍາດເບົາຫວານ, ສາມາດໃຊ້ໄດ້ທັງຮາກ, ເຄືອ, ໃບ ເຊິ່ງມີສູດຫຼາກຫຼາຍ ໂດຍສະເພາະແມ່ນຊາວບ້ານໃຊ້ຜັກຕຳນິນເປັນຢາປະຈຳແກ້ພະຍາດເບົາຫວານ.

6 ຜັກຊຽງດາ: ມີລັກສະນະເປັນເຄືອສີຂຽວ ມີລົດຊາດຂົມອ່ອນໆ ແລະ ມີສານຕ້ານອະນຸມູນອິດສະຫຼະສູງ ເປັນຜັກທີ່ໝໍຢາພື້ນບ້ານໃຊ້ເປັນຜັກເພື່ອເພີ່ມກຳລັງ ທັງຍັງສາມາດໃຊ້ເປັນຢາຫຼຸດນ້ຳໜັກໄດ້ ເນື່ອງຈາກວ່າຜັກຊຽງດາ ຊ່ວຍໃຫ້ມີການນຳນ້ຳຕານໄປເຜົາຜານຫຼາຍກວ່າການໄປສ້າງເປັນໄຂມັນສະສົມ ເຊິ່ງມີການສຶກສາຄົນເຈັບຈາກພະຍາດເບົາຫວານທີ່ໃຊ້ຜັກຊຽງດາຊ່ວຍໃນການປິ່ນປົວ ສາມາດຫຼຸດປະລິມານການໃຊ້ຢາຫຼວງໄດ້ ແລະ ບາງລາຍສາມາດໃຊ້ຜັກຊຽງດາຢ່າງດຽວໃນການຄວບຄຸມລະດັບນ້ຳຕານໃນເລືອດໄດ້.

7 ຜັກອີ່ເລີດ: ເປັນຜັກພື້ນບ້ານ ເຊິ່ງເປັນສະໝຸນໄພແກ້ເບົາຫວານ ແລະ ຄວາມດັນ ນິຍົມນຳມາກິນສົດ ໃນສູດຢາສະໝຸນໄພພື້ນບ້ານສາມາດນຳໃບອີ່ເລີດມາຕົ້ມເພື່ອຫຼຸດເບົາຫວານໄດ້ ເນື່ອງຈາກໃບອີ່ເລີດມີສັບພະຄຸນໃນການຫຼຸດລະດັບນ້ຳຕານໃນເລືອດໄດ້ເປັນຢ່າງດີ ທັງມີ ສານຕໍ່ຕ້ານອະນຸມູນອິດສະຫຼະສູງ, ມີ ແຄລຊຽມ, ວິຕາມິນ ເອ ແລະ ຊີ ສູງ.

ການເລືອກໃຊ້ສະໝຸນໄພໃນການປິ່ນປົວພະຍາດຄວາມດັນເລືອດ ແລະ ເບົາຫວານ ເຖິງແມ່ນວ່າຈະເປັນທາງເລືອກໜຶ່ງສຳລັບຄົນເຈັບ ແຕ່ສິ່ງສຳຄັນທີ່ຕ້ອງລະມັດລະວັງຄືສະໝຸນໄພບາງຊະນິດອາດສົ່ງຜົນເປັນພິດຕໍ່ຮ່າງກາຍ ຖ້າຫາກໃຊ້ບໍ່ຖືກຕ້ອງ. ດັ່ງນັ້ນ, ຄວນປຶກສາແພດ ຫຼື ຜູ້ຊ່ຽວຊານກ່ອນທີ່ຈະເລືອກໃຊ້ສະໝຸນໄພແກ້ເບົາຫວານ ແລະ ຄວາມດັນ ເຫຼົ່ານີ້ ລວມເຖິງການເລືອກກິນຜະລິດຕະພັນອາຫານເສີມ ຄວນເປັນສານສະກັດຈາກສະໝຸນໄພ ແລະ ຜ່ານການກວດກາຈາກອົງການອາຫານ ແລະ ຢາ ຮັບຮອງຄວາມປອດໄພ.