ການຕັ້ງເປົ້າໝາຍ ແລະ ການວາງແຜນໄລຍະຍາວ

376

ອົງກອນຂະໜາດນ້ອຍ ແລະ ໃຫຍ່ ແມ່ນລ້ວນແຕ່ມີຈຸດດີ ແລະ ຈຸດອ່ອນທີ່ແຕກຕ່າງກັນໄປຕາມສະພາບຕົວຈິງຂອງອົງກອນ, ສັງຄົມ ແລະ ການປ່ຽນແປງຂອງໂລກ ເຊິ່ງບໍ່ມີອົງກອນໃດທີ່ຈະສົມບູນໝົດທຸກຢ່າງ, ແຕ່ສິ່ງສຳຄັນຕ້ອງມີເປົ້າໝາຍໄລຍະຍາວ ເປັນຕົ້ນແມ່ນການເຮັດວຽກໃນຄັ້ງທຳອິດ ແລະ ໃນເວລາທີ່ຍັງໜຸ່ມນ້ອຍນັ້ນກໍຄື “ ຮຽນຮູ້ ແລະ ສ້າງສົມປະສົບການ ” ເພື່ອຄວາມກ້າວໜ້າທີ່ຍິ່ງໃຫຍ່ກວ່າໃນອະນາຄົດ. ທ່ານ ໂຄໂນຊຸເກະ ມັດສຸຊິຕະ ກ່ອນທີ່ຈະເປັນປະທານ ບໍລິສັດ ພານາໂຊນິກ ( Panasonic ) ແລະ ຖືກຄົນຍີ່ປຸ່ນ ຂະໜານນາມວ່າ “ ເທບແຫ່ງການບໍລິຫານ ” ກໍເຄີຍເປັນກຳມະກອນຢູ່ບໍລິສັດຜະລິດເຄື່ອງໃຊ້ໄຟຟ້າຂະໜາດນ້ອຍແຫ່ງໜຶ່ງທີ່ມີຊື່ວ່າ ໂອຊາກະ ອິເລັກທຣິກໄລທ໌ ໃນຕຳແໜ່ງຜະລິດສາຍໄຟມາກ່ອນ, ແຕ່ທ່ານເຮັດວຽກໂດຍມີເປົ້າໝາຍໄລຍະຍາວກໍຄືການໄດ້ມີໂອກາດໃນການຮຽນຮູ້ກ່ຽວກັບການຜະລິດເຄື່ອງໃຊ້ໄຟຟ້າ ເຊິ່ງທ່ານກ່າວວ່າ: “ ກ່ອນຈະເດີນທາງເຖິງຈຸດໝາຍປາຍທາງທີ່ຢູ່ຫ່າງອອກໄປເຖິງພັນລີ້ນັ້ນ ຂ້າພະເຈົ້າກ້າວຂາຍ່າງບາດທຳອິດໄປຢ່າງຊ້າໆແຕ່ໝັ້ນຄົງ ໂດຍຜ່ານຜ່າອຸປະສັກນາໆປະການ, ພົບກັບຄວາມຜິດຫວັງ ແລະ ຄວາມສົມຫວັງໃນທຸກໆບາດກ້າວທີ່ຜ່ານມາ ຖ້າມີບາດກ້າວທຳອິດກໍຕ້ອງມີບາດກ້າວຕໍ່ໆໄປ ”.

ທ່ານ ແຈັກ ເວລຊ໌ ອະດີດປະທານ ບໍລິສັດ ຈີອີ ເຊິ່ງຖືກຍົກຍ້ອງຈາກວາລະສານ ຟໍຈູນ ວ່າ: “ ເປັນຜູ້ບໍລິຫານແຫ່ງທົດສະວັດ ” ໃນປີ 2000 ເຊິ່ງທ່ານໄດ້ຂຽນປຶ້ມຊື່ວ່າ “ ສູ່ໄຊຊະນະ ( winning ) ” ປາກົດວ່າເປັນປຶ້ມທີ່ຂາຍດີຂອງໂລກ ໂດຍໃນເລື່ອງແມ່ນເປັນການແນະນຳຄົນໜຸ່ມໃນການເຮັດວຽກໃຫ້ປະສົບຄວາມສຳເລັດ ໂດຍສະເພາະແມ່ນການເລືອກບໍລິສັດ ຫຼື ອົງກອນຂະໜາດນ້ອຍວ່າ: “ ບໍລິສັດນ້ອຍຫຼາຍແຫ່ງແມ່ນໃຫ້ປະສົບການ ແລະ ໂອກາດໃນການຮຽນຮູ້ທີ່ບໍ່ມີໃຜສູ້ໄດ້, ທ່ານມີໂອກາດໃນການບໍລິຫານຄົນ, ບໍລິຫານໂຄງການ ຫຼື ບໍລິຫານໜ່ວຍງານໄດ້ໄວຂຶ້ນ ຍັງບໍ່ນັບລວມໂອກາດໃນການເຈລະຈາຕ່າງໆ ແລະ ການທີ່ໄດ້ເຮັດວຽກທີ່ໃກ້ຊິດກັບຜູ້ບໍລິຫານສູງສຸດ ແລະ ຄະນະກຳມະການຕ່າງໆຫຼາຍກວ່າ ເມື່ອທ່ານມີຄວາມພ້ອມທີ່ຈະກ້າວຕໍ່ໄປເຖິງວ່າທ່ານຈະບໍ່ໄດ້ໃບຜ່ານງານຈາກບໍລິສັດທີ່ມີຊື່ສຽງ, ແຕ່ທ່ານກໍສາມາດສະສົມປະສົບການຢ່າງຫຼວງຫຼາຍທີ່ຈະຊ່ວຍໃຫ້ທ່ານປະສົບຄວາມສຳເລັດໃນອະນາຄົດ ”.

ທີ່ຈິງແລ້ວອົງກອນນ້ອຍ ຫຼື ອົງກອນໃຫຍ່ກໍລ້ວນແຕ່ດີໄປຄົນລະຢ່າງ ແຕ່ສິ່ງສຳຄັນໃນການເລືອກວຽກນັ້ນແມ່ນຄວນໃຫ້ຖືກກັບຈຸດແຂງ ຫຼື ຄວາມຮັກຂອງຕົນເອງຄືດັ່ງ ທ່ານ ວໍເຣນ ບັຟເຟດ ມະຫາເສດຖີອັນດັບສອງຂອງໂລກກ່າວວ່າ: “ ສິ່ງທີ່ສຳຄັນບໍ່ແມ່ນລາຍຮັບທີ່ດີຂຶ້ນ ຫຼື ໜ້ອຍລົງ, ແຕ່ເປັນຄວາມສຸກທີ່ເຮົາໄດ້ຮັກວຽກທີ່ເຮັດແລະ ເຕີບໃຫຍ່ຂຶ້ນເລື້ອຍໆ, ຂໍແຕ່ມຸ່ງໝັ້ນທີ່ຈະຮຽນຮູ້ ແລະ ສະສົມປະສົບການຈາກນ້ອຍໄປຫາໃຫຍ່ ແລ້ວທ່ານຈະປະສົບຜົນສຳເລັດໃນທີ່ສຸດ ”.

ในภาพอาจจะมี หนึ่งคนขึ้นไป และผู้คนกำลังนั่ง

ນອກຈາກນັ້ນແລ້ວການເລືອກວຽກກໍຕ້ອງແມ່ນຕົນເອງເປັນຄົນເລືອກເອງ ເຖິງວ່າໃນຊີວິດຈິງຂອງຄົນເຮົາຍັງມີຄົນຈຳນວນໜຶ່ງທີ່ຈຳເປັນຕ້ອງເຮັດວຽກເພື່ອຕອບສະໜອງຄວາມຕ້ອງການ ຫຼື ຄວາມຝັນຂອງຄົນອື່ນ ເຊັ່ນ: ພໍ່, ແມ່, ຜົວ ຫຼື ເມຍ, ຄູ – ອາຈານ ຫຼື ໝູ່ເພື່ອນເປັນຕົ້ນ. ນອກຈາກນັ້ນ, ຍັງມີບາງຄົນທີ່ຍັງຢຶດຕິດກັບຄ່ານິຍົມຂອງຊື່ສຽງອົງກອນທີ່ຖືກປູກຝັງມາແຕ່ສະໄໝຍັງຮຽນໜັງສືຢູ່ທີ່ໂຮງຮຽນ ກໍຄືການເລືອກຮຽນຢູ່ໂຮງຮຽນທີ່ດີທີ່ສຸດ ແລະ ເມື່ອຊອກວຽກເຮັດງານທຳກໍຢາກເຮັດວຽກຢູ່ໃນອົງກອນໃຫຍ່ທີ່ມີຊື່ສຽງທີ່ສຸດ, ແຕ່ຖ້າບໍ່ໄດ້ເຮັດວຽກນຳອົງກອນໃຫຍ່ດັ່ງກ່າວແລ້ວກໍຈະເກີດ ຄວາມຜິດຫວັງ ແລະ ມີອາການໂສກເສົ້າ ເຊິ່ງຄ້າຍຄືກັບຕອນທີ່ຜິດຫວັງຍ້ອນເສັງເຂົ້າໂຮງຮຽນທີ່ໃຫຍ່ໆມີຊື່ສຽງບໍ່ໄດ້, ແຕ່ ຄວາມຈິງແລ້ວຄວາມຜິດຫວັງດັ່ງກ່າວມັນເປັນພຽງສິ່ງສູນເປົ່າ ເນື່ອງຈາກຄວາມຈິງກໍຄືບໍ່ມີບໍລິສັດໃດທີ່ຈະສູງກວ່າ ຫຼື ຕ່ຳກວ່າທີ່ສຸດ ເພາະວ່າບ່ອນເຮັດວຽກທີ່ສຳຄັນທີ່ສຸດຢູ່ໃນຊີວິດຂອງຄົນເຮົານັ້ນບໍ່ແມ່່ນບ່ອນເຮັດວຽກແຫ່ງທຳອິດ, ແຕ່ມັນຄືບ່ອນເຮັດວຽກແຫ່ງສຸດທ້າຍຕ່າງຫາກ.

ในภาพอาจจะมี หนึ่งคนขึ้นไป

ສະນັ້ນ, ຕອນທີ່ຍັງໜຸ່ມນ້ອຍ ແລະ ຍັງມີເວລາຫຼາຍທ່ານຄວນຈະມີເປົ້າໝາຍໄລຍະຍາວ ໂດຍການຊອກເຮັດວຽກບ່ອນທີ່ຕົນເອງຈະໄດ້ມີໂອກາດໃນການຮຽນຮູ້ ແລະ ໄດ້ປະສົບການ ເພື່ອຄວາມສຳເລັດໃນໄລຍະຍາວ ແມ່ນດີກວ່າທີ່ຈະຊອກເຮັດວຽກເພື່ອເງິນ ແລະ ຊື່ສຽງໃນໄລຍະສັ້ນ ຄືດັ່ງ ທ່ານ ໂຣເບີດ ກີໂຢຊາກິ ເສດຖີຄົນອາເມຣິກາ ກ່າວວ່າ: ເມື່ອຕອນຍັງໜຸ່ມນ້ອຍທ່ານຄວນຮຽນຮູ້ບໍ່ແມ່ນການຫາເງິນ.