ແກະສະຫຼັກໝາກແຄນຕາລຸບ ສາມາດເພີ່ມມູນຄ່າຂາຍໄດ້

527

ໝາກແຄນຕາລຸບ ( cantaloupe ) ເປັນໝາກໄມ້ຊະນິດໜຶ່ງທີ່ນິຍົມບໍລິໂພກຫຼາຍສົມຄວນໃນລາວເຮົາ, ຂະນະດຽວກັນກໍມີການປູກເພື່ອເປັນສິນຄ້າແຜ່ຫຼາຍເຊັ່ນດຽວກັນ ເມື່ອເປັນແນວນັ້ນຜູ້ປະກອບການຈະເຮັດແນວໃດເພື່ອໃຫ້ສິນຄ້າຂອງຕົນເອງມີ ຄວາມແຕກຕ່າງທີ່ໜ້າສົນໃຈ, ເປັນທີ່ຕ້ອງການຂອງລູກຄ້າ ພ້ອມທັງເພີ່ມມູນຄ່າໃຫ້ກັບຜະລິດຕະພັນນັ້ນ ກໍຕ້ອງມີການສ້າງຈຸດພິເສດໃດໜຶ່ງຂຶ້ນມາ ເພື່ອໃຫ້ເປັນທີ່ຕື່ນຕາຕື່ນໃຈແກ່ລູກຄ້າ ເຊິ່ງມື້ນີ້ຜູ້ຂຽນໄດ້ນໍາເອົາວິທີການແກະສະຫຼັກໝາກແຄນຕາລຸບ ໃນແບບສະບັບຂອງ ປາຫວານ ຟາມ ມາໃຫ້ທ່ານຜູ້ອ່ານທີ່ປະກອບອາຊີບນີ້ໄດ້ລອງນໍາໄປປະຕິບັດນໍາກັນ.

ທ່ານ ນາງ ວຽງສະຫວັນ ເຈົ້າຂອງ ປາຫວານ ຟາມ ໄດ້ໃຫ້ສໍາພາດກັບທີມຂ່າວ ເສດຖະກິດ – ການຄ້າ ໃນອາທິດຜ່ານມາວ່າ: ການແກະສະຫຼັກໝາກແຄນຕາລຸບ ເຮົາສາມາດເຮັດໄດ້ຫຼາຍລວດລາຍເພື່ອເພີ່ມມູນຄ່າໃຫ້ກັບສິນຄ້າ ມີທັງແກະສະຫຼັກເປັນຊື່, ຄໍາເວົ້າຕາມເທດສະການໃດໜຶ່ງເຫຼົ່ານີ້ເປັນຕົ້ນ ເຊິ່ງລາຄາກໍຂຶ້ນກັບຄວາມຍາກງ່າຍຂອງແບບທີ່ລູກຄ້າຕ້ອງການ ເພາະວ່າສ່ວນຫຼາຍແມ່ນແກະຕາມທີ່ລູກຄ້າສັ່ງ, ຖ້າມີອັກສອນໜ້ອຍກໍລາຄາຖືກ ແຕ່ຖ້າອັກສອນຫຼາຍລາຄາກໍແພງຂຶ້ນ ເຊິ່ງມີລາຄາເລີ່ມຕົ້ນແຕ່ 5 ພັນກີບຂຶ້ນໄປ, ສໍາລັບວິທີການແກະສະຫຼັກມີຂັ້ນຕອນງ່າຍໆ ດັ່ງລຸ່ມນີ້:

ອຸປະກອນ: ນໍາໃຊ້ມີດ ຫຼື ວັດສະດຸສໍາລັບແກະສະຫຼັກທົ່ວໄປ, ກຽມໝາກແຄນຕາລຸບໃຫ້ພ້ອມ ເຊິ່ງຕ້ອງມີອາຍຸຫຼັງຈາກປະສົມເກສອນແລ້ວປະມານ 10 – 20 ວັນ ກ່ອນທີ່ໝາກແຄນຕາລຸບ ຈະແຕກລາຍຕາມທໍາມະຊາດຂອງມັນ ເພາະວ່າເມື່ອມັນອອກລາຍແລ້ວເຮົາຈະບໍ່ສາມາດແກະສະຫຼັກໄດ້.

ວິທີເຮັດ: ເມື່ອກຽມທຸກຢ່າງພ້ອມແລ້ວກໍໃຫ້ລົງມືແກະສະຫຼັກຕາມລາຍທີ່ກໍານົດໄວ້ ຫຼື ຕາມລູກຄ້າສັ່ງ ເຊິ່ງຕ້ອງໄດ້ເອົາໃຈໃສ່ຢ່າງພິຖີພິຖັນ, ຄ່ອຍໆວາດໂຄງໄປກ່ອນ ແລ້ວຕາມດ້ວຍການເກັບລາຍລະອຽດຄືນ ພຽງເທົ່ານີ້ເຮົາກໍຈະໄດ້ໝາກແຄນຕາລຸບ ທີ່ມີລາຍສວຍງາມ ແລະ ຍັງເພີ່ມມູນຄ່າໃຫ້ກັບມັນນໍາອີກ.

ຂອບໃຈ: ໜັງສືພິມເສດຖະກິດ-ການຄ້າ