ໃບສີດາ ມີປະໂຫຍດຫຼາຍກວ່າທີ່ຄິດ

610

ໝາກສີດາ ເປັນໝາກໄມ້ທີ່ອຸດົມໄປດ້ວຍກາກໄຍອາຫານ ລວມເຖິງມີສານຕໍ່ຕ້ານອະນຸມູນອິດສະຫຼະສູງ ທີ່ເປັນປະໂຫຍດຕໍ່ຮ່າງກາຍ. ນອກນັ້ນ, ຍັງສາມາດຊ່ວຍຫຼຸດຮິ້ວຮອຍ ເຮັດໃຫ້ຜິວພັນເປັ່ງປັ່ງສົດໃສນຳອີກ. ບໍ່ພຽງແຕ່ເທົ່ານັ້ນໃບໝາກສີດາກໍມີປະໂຫຍດຕໍ່ສຸຂະພາບເຊັ່ນກັນ ເຊິ່ງມັນມີສັບພະຄຸນໃນການຊ່ວຍດັບກິ່ນປາກ, ແກ້ອາການເຈັບທ້ອງ, ຖອກທ້ອງ ແລະ ຮັກສາໄດ້ຫຼາຍພະຍາດໄດ້ອີກດ້ວຍ.

ສັບພະຄຸນຂອງໃບໝາກສີດາຊ່ວຍລະງັບກິ່ນປາກ ທ່ານຮູ້ບໍວ່າໃນໃບໝາກສີດາມີນ້ຳມັນຫອມລະເຫີຍຫຼາຍຊະນິດຈຶ່ງສາມາດຊ່ວຍລະງັບກິ່ນປາກໄດ້ດີ ໂດຍສະເພາະບັນຫາກິ່ນປາກທີ່ເກີດຈາກແຂ້ວແມງ, ເຫືອກອັກເສບ, ເສດອາຫານເນົ່າຄ້າງ ຫຼື ກິ່ນປາກຈາກການຮັບປະທານອາຫານທີ່ມີກິ່ນແຮງທັງໝົດ ລວມເຖິງກິ່ນເຫຼົ້າ ແລະ ຢາສູບ ເຊິ່ງວິທີໃຊ້ ກໍພຽງນຳໃບໝາກສີດາສົດປະມານ 3-5 ໃບ ລ້າງໃຫ້ສະອາດແລ້ວນຳມາຫຍ້ຳແລ້ວຄາຍຖິ້ມ ກໍຈະເຮັດໃຫ້ບັນຫາເຫຼົ່ານີ້ໝົດໄປ.

ປິ່ນປົວພະຍາດເຫືອກອັກເສບ ແລະ ບັນເທົາອາການປວດແຂ້ວຈາກເຫືອກອັກເສບ ຈາກການສຶກສາຂອງມະຫາວິທະຍາໄລດັງ ພົບວ່າ ຜູ້ປ່ວຍຈຳນວນ 70 ຄົນທີ່ໃຊ້ນ້ຳຢາບ້ວນປາກທີ່ມີສ່ວນປະສົມຂອງສານສະກັດຈາກໃບໝາກສີດາສາມາດຫຼຸດອາການອັກເສບຂອງເຫືອກ ແລະ ບັນເທົາອາການປວດແຂ້ວຈາກເຫືອກອັກເສບໄດ້ຮ້ອຍລະ 19.8 ເນື່ອງຈາກໃນໃບໝາກສີດາມີລິດຕ້ານອາການອັກເສບໄດ້

ຫຼຸດການປັ້ນຂອງລຳໄສ້, ແກ້ເຈັບທ້ອງ, ຖອກທ້ອງ ໃບໝາກສີດາມີ ເຄວີຣ໌ຊິທິນ (Quercetin) ແລະ Quercetin-3arabinoside ມີລິດຢັບຢັ້ງແອຊິຕິນໂຄລີນ (Acetylcholine) ຈຶ່ງຊ່ວຍໃຫ້ຢຸດຖ່າຍ ແລະ ສາມາດຂ້າເຊື້ອແບກເຕີເຣຍ ເຊື້ອໄວຣັດ ແລະ ມີລິດຂ້າເຊື້ອພະຍາດທີ່ເປັນສາເຫດຂອງອາການເຈັບທ້ອງ ຖອກທ້ອງໄດ້ ເຊິ່ງວິທີຮັບປະທານໃບໝາກສີດາເປັນຢາແກ້ເຈັບທ້ອງ ແມ່ນໃຫ້ນຳໃບໝາກສີດາ 10-15 ໃບມາລ້າງນ້ຳໃຫ້ສະອາດ ຈາກນັ້ນ, ຕຳພໍແຫຼກ ແລ້ວນຳໄປຕົ້ມກັບນ້ຳ 1 ແກ້ວໃຫຍ່ ປະສົມເກືອເລັກນ້ອຍໆ ແລ້ວນຳມາຈິບເປັນຊາໃບໝາກສີດາ

ຫຼຸດນ້ຳຕານໃນເລືອດ ຈາກການທົດລອງພົບວ່າ ສານສະກັດໃບໝາກສີດາ ສາມາດຫຼຸດລະດັບນ້ຳຕານໃນເລືອດຂອງໜູທີ່ຖືກສີດສານໃຫ້ໃກ້ຄຽງພະຍາດເບົາຫວານໄດ້ ໂດຍສານສະກັດໃບໝາກສີດາສາມາດຫຼຸດລະດັບນ້ຳຕານໃນເລືອດໄດ້ເຖິງ 24 ຊັ່ວໂມງ

ຕ້ານເຊລມະເຮັງ ຜົນການວິໄຈພົບວ່າ ສານສະກັດຈາກໃບໝາກສີດາມີຄວາມເປັນພິດຕໍ່ເຊລມະເຮັງ ໄຟໂບນຊາຣ໌ໂຄມາ (Fibrosarcoma) ແລະ ຊ່ວຍຕ້ານເຊື້ອເຊລມະເຮັງເຕົ້ານົມໄດ້

ຫຼຸດອາການປວດປະຈຳເດືອນ ໃບໝາກສີດາທີ່ສະກັດຈາກສານເອທານອົລ ຈະມີສານ ຟລາໂວນອຍປະສົມຢູ່ນຳ ເຊິ່ງສານນີ້ຈະຊ່ວຍຕ້ານອະນຸມູນອິດສະຫຼະ ແລະ ຫຼຸດອາການປວດປະຈຳເດືອນໄດ້ ໂດຍແນະນຳໃຫ້ນຳໃບໝາກສີດາສົດລ້າງສະອາດໄປແຊ່ນ້ຳໄວ້ ແລ້ວນໍາມາຈິບເທື່ອລະນ້ອຍ ແຕ່ສັບພະຄຸນຂອງໃບໝາກສີດາຂໍ້ນີ້ ອາດໃຊ້ບໍ່ໄດ້ຜົນກັບຜູ້ທີ່ກິນຢາຄຸມກຳເນີດ ຫຼື ຜູ້ທີ່ໄດ້ຮັບການຖືຮັກສາດ້ວຍຮໍໂມນ

ຮັກສາສິວ ໃບໝາກສີດາມີລິດຕ້ານອາການອັກເສບ ຊ່ວຍກຳຈັດເຊື້ອແບກເຕີເຣຍ ແລະ ຫຼຸດຮອຍດ່າງດຳຈາກສິວໄດ້ ໂດຍນຳໃບໝາກສີດາລ້າງສະອາດມາຕຳໃຫ້ລະອຽດ ຈາກນັ້ນປະສົມນ້ຳຕົ້ມສຸກລົງໄປນ້ອຍໆ ເພື່ອໃຫ້ໄດ້ນ້ຳມາແຕ້ມສິວ ແລະ ຮອຍດຳຈາກສິວ

ເປັນຢາຫ້າມເລືອດ ໃຊ້ໃບໝາກສີດາສົດລ້າງນ້ຳໃຫ້ສະອາດ ຈາກນັ້ນນຳມາຕຳຈົນແຫຼກແລ້ວຄ່ອຍນຳໄປແປະທີ່ແຜ ເລືອດຈະຢຸດໄຫຼ ແລະ ໃບໝາກສີດາຈະຊ່ວຍຫຼຸດອາການອັກເສບ

ຊ່ວຍຂັບລົມໃນກະເພາະອາຫານ ນໍ້າມັນຫອມລະເຫຍ ທີ່ມີຢູ່ໃນໃບໝາກສີດາບໍ່ພຽງແຕ່ຊ່ວຍດັບກິ່ນປາກໄດ້ເທົ່ານັ້ນ ແຕ່ຢັງຊ່ວຍຂັບລົມໃນກະເພາະອາຫານ ແລະ ລໍາໄສ້ໄດ້ອີກ ເຮັດໃຫ້ບໍ່ເກີດອາການ ແໜ້ນທ້ອງ