ລູກຫຼານຜູ້ປະສົບໄພຢູ່ສະໜາມໄຊ ໄດ້ຝຶກອົບຮົມວິຊາຊີບ 2 ຫຼັກສູດ

567

ໃນວັນທີ 27 ກັນຍາ ຜ່ານມາ, ລູກຫຼານຜູ້ປະສົບໄພ ຈາກສັນເຂື່ອນໄຟຟ້າ ເຊປຽນ-ເຊນ້ຳນ້ອຍແຕກ ທີ່ເມືອງສະໜາມໄຊ ແຂວງອັດຕະປື ຈຳນວນ 44 ຄົນ ໄດ້ເຂົ້າຝຶກອົບຮົມໄລຍະສັ້ນຊັ້ນຕົ້ນ 3 ເດືອນ ຢູ່ໂຮງຮຽນເຕັກນິກວິຊາຊີບແບບປະສົມແຂວງ ອັດຕະປື ລວມມີ 2 ຫຼັກສູດຄື: ຫຼັກສູດຕັດຫຍິບເສືອຜ້າ ຈຳນວນ 23 ຄົນ ແລະ ຫຼັກສູດສ້ອມແປງລົດ 21 ຄົນໂດຍໄດ້ຮັບທຶນສະໜັບສະໜູນ ຈາກບໍລິສັດ ຜູ້ພັດທະນານາໂຄງການກໍ່ສ້າງເຂື່ອນໄຟຟ້າ ເຊປຽນ-ເຊນ້ຳນ້ອຍ (PNPC-SK).

ເຊິ່ງການຈັດຕັ້ງການຮຽນຝຶກອົບຮົມໄລຍະສັ້ນ ແມ່ນໄດ້ເລີ່ມມາແຕ່ ວັນທີ 25 ກັນຍາ-ເດືອນ ທັນວາ 2019.

ໃນພິທີ, ທ່ານ ບຸນໂຮມ ພົມມະສານ ເຈົ້າເມືອງສະໜາມໄຊ ໄດ້ກ່າວວ່າ: ການຝຶກຮຽນວິຊາຊີບ ແມ່ນການພັດທະນາຍົກລະດັບສີມືແຮງງານ ແລະ ການສົ່ງເສີມລູກຫຼານຄອບຄົວຜູ້ທີ່ປະສົບໄຟພິບັດນັ້ນ ໄດ້ຮັບການພັດທະນາ ແລະ ນຳໃຊ້ວິຊາທີ່ໄດ້ຜ່ານການຝຶກນີ້ ໄປນຳໃຊ້ເຂົ້າໃນການແກ້ໄຂຊີວິດການເປັນຢູ່ໃຫ້ດີຂຶ້ນ.

ດັ່ງນັ້ນ, ນັກສຳມະນາກອນທີ່ເຂົ້າຝຶກວິຊາຊີບໃນຄັ້ງນີ້ ຈົ່ງໄດ້ເອົາໃຈໃສ່ສຶກສາຮໍ່າຮຽນໃຫ້ສຳເລັດ ແລະ ປະຕິບັດລະບຽບຂອງໂຮງຮຽນ ແລະ ຍາດແຍງເອົາຄວາມຮູ້ຈາກຄູອາຈານນັ້ນ ໃຫ້ໄດ້ຕາມຄວາມຕ້ອງການໃນລະດັບທີ່ແນ່ນອນ.