ວິເສດສຸດ!! ຄູ່ຝາແຝດ ຄວ້າຫຼຽນຄຳນັກຮຽນເກັ່ງລະດັບຊາດໝົດສອງ

503

ແອັດມິນຊ່ວງນີ້ອິນແຮງກັບກະແສເສັງນັກຮຽນເກັ່ງລະດັບຊາດ ທີ່ພິເສດໄປກວ່ານັ້ນແມ່ນອ້າຍເອື້ອຍນ້ອງໃນສາຍເລືອດດຽວກັນ ອົດບໍ່ໄດ້ທີ່ນຳເອົາເລື່ອງລາວມະຫັດສະຈັນເຫຼົ່ານັ້ນມາຝາກທ່ານຜູ້ອ່ານ ມື້ນີ້ເຮົາມາຮູ້ຈັກກັບຄູ່ສອງນ້ອງເອຶ້ອຍຝາແຝດທີ່ພາກັນຕັ້ງໃຈເຝິກຝົນ ຫຼໍ່ຫຼອມຕົນເອງ ຈົນສາມາດຄວ້າໄດ້ຫຼຽນຄຳລະດັບຊາດ ຊັ້ນມໍ4​ ໃນສົກຮຽນປີ 2018-2019  ວິຊາຄະນິດສາດ ແລະ ວິຊາພາສາລາວ-ວັນນະຄະດີ ໄປຄອງຈົນສຳເລັດ, ທັງສອງໄດ້ສ້າງປະຫວັດສາດໜ້າໃໝ່ໃຫ້ແກ່ໂຮງຮຽນນິຣະດາ ຈອມເພັດ ເມືອງສີສັດຕະນາກ ນະຄອນຫຼວງວຽງຈັນຢ່າງສົມກຽດ.

ຄົນທຳອິດ ແມ່ນນາງ ພອນໄພລັກ ໄຊນະນະ ນັກຮຽນເກັ່ງຫຼຽນຄຳ ສາຍພາສາລາວ-ວັນນະຄະດີ ເສັງນັກຮຽນເກັ່ງລະດັບຊາດໄດ້ຄະແນນເຖິງ 7,85, ຄົນທີ 2 ​ແມ່ນ ທ້າວ ມັກມີຜົນ ໄຊຊະນະ ນັກຮຽນເກັ່ງວິຊາ ຄະນິດສາດ ໄດ້ສ້າງຄະແນນໄວ້ທີ່ 9,25.

ນ້ອງທັງສອງຄົນຍັງໃຫ້ສຳພາດວ່າ: ການຈະເປັນນັກຮຽນເກັ່ງນີ້ ບໍ່ແມ່ນເລື່ອງຍາກ ແລະ ກໍ່ບໍ່ເປັນເລື່ອງງ່າຍ  ຂໍພຽງເຮົາຕັ້ງໃຈເຝິກຝົນຫຼໍ່ຫຼອມຕົນເອງ, ຕັ້ງໃຈຮຽນ ແລະ ໃຊ້ເວລາວ່າງໃຫ້ເປັນປະໂຫຍດ ເປັນຕົ້ນ ແມ່ນ ການໄປເຂົ້າຫ້ອງສະໝຸດ ເພື່ອໄປສຶກສາຊອກຮູ້ຮໍ່າຮຽນເອົາຄວາມຮູ້ໃໝ່, ເວລາຮຽນຕ້ອງຕັ້ງໃຈຟັງ ອາຈານອະທິບາຍ ຖ້າບໍ່ເຂົ້າໃຈໃຫ້ຮີບຖາມກັບອາຈານຄືນ, ຫຼັງຈາກທີ່ຮຽນຢູ່ໂຮງຮຽນມາແລ້ວ ເວລາກັບບ້ານກໍ່ຕ້ອງໝັ່ນເລົ່າບົດຮຽນ ແລະ ທວນຄືນບົດຮຽນທີ່ອາຈານສອນມາ ເພື່ອຄວາມເຂົ້າໃຈທີ່ຊັດແຈ້ງ ແລະເລິກເຊິ່ງກວ່າ.

ນ້ອງທັງສອງຍັງໄດ້ກ່າວອີກວ່າ: ຫຼັງຈາກທີ່ໄດ້ຫຼຽນຄຳນັກຮຽນເກັ່ງລະດັບຊາດມາແລ້ວ ດ້ວຍອາຍຸທີ່ຍັງນ້ອຍ ແລະທັງສອງຍັງບໍ່ຈົບສາມັນ ສະນັ້ນຍັງບໍ່ຕັ້ງຄວາມຝັນເລື່ອງອາຊີບ ແຕ່ນ້ອງທັງສອງຄົນກໍ່ມີຄວາມຕັ້ງໃຈວ່າອີກ 2-3 ປີຂ້າງໜ້າຫວັງວ່າຈະໄດ້ມີໂອກາດກັບມາຢືນຢູ່ເວທີນັກຮຽນເກັ່ງລະດັບຊາດຊັ້ນ ມໍ 7 ອີກຄັ້ງ. ສ່ວນລາຍລະອຽດ ການສຳພາດເຈາະເລິກນ້ອງທັງສອງພ້ອມດ້ວຍ ຄູອາຈານ ແລະຜູ້ປົກຄອງນ້ອງທັງສອງແມ່ນສາມາດຕິດຕາມຜ່ານວິດີໂອເຕັມຂອງຫ້ອງຂ່າວເສດຖະກິດ-ການຄ້າໃນໄວໆນີ້.