ເອົາມາຝາກ!! 8 ວິທີກັບການຫຼຸດຜ່ອນຄວາມຕຶງຄຽດ

413

ຂຶ້ນຊື່ວ່າຄວາມຄຽດບໍ່ວ່າຈະເກີດຈາກໜ້າທີ່ວຽກງານ ຫຼື ຈາກເລື່ອງຕ່າງໆ ກໍ່ລ້ວນແຕ່ສົ່ງຜົນເສຍໃຫ້ທັງສຸຂະພາບທາງຈິດໃຈ ແລະ ສຸຂະພາບທາງຮ່າງກາຍເຊັ່ນກັນ. ຖ້າວ່າປ່ອຍໃຫ້ເກີດຄວາມຄຽດຫຼາຍເກີນໄປກໍ່ອາດຈະການເປັນບັນຫາແນ່ນອນ. ເຊິ່ງໃນມື້ນີ້ເຮົາຈະແນະນຳວິທີງ່າຍໆທີ່ຊ່ວຍຫຼຸດຜ່ອນຄວາມຄຽດໄດ້ ເຊິ່ງຈະມີແນວໃດອ່ານໄປພ້ອມກັນເລີຍ

ຫາຍໃຈເຂົ້າ – ອອກເລິກໆ: ໃຫ້ທົດລອງສັງເກດເບິ່ງໂຕເອງວ່າ ເວລາໃດກໍ່ແລ້ວແຕ່ທີ່ເລີ່ມ ຮູ້ສຶກຄຽດກັບເລື່ອງໃດເລື່ອງໜຶ່ງ ລັກສະນະການຫາຍໃຈກໍ່ມັກຈະຕິດຂັດ. ດັ່ງນັ້ນ, ເມື່ອເລີ່ມຮູ້ສຶກຄຽດຂໍໃຫ້ຫາຍໃຈເຂົ້າ – ອອກເລິກໆ ຊ້າໆ ຈະຊ່ວຍໃຫ້ຮູ້ສຶກດີຂຶ້ນ.

ພັກຜ່ອນດື່ມຊາຈັກໜ້ອຍໜຶ່ງ: ຈາກການສຶກສາຂອງມະຫາວິທະຍາໄລ ຄຣໍເລຣກລອນດອນ (College London) ໄດ້ພົບວ່າ ການດື່ມຊາເປັນປະຈຳທຸກມື້ຈະຊ່ວຍໃຫ້ເຊົາຈາກຄວາມຕຶງຄຽດໄດ້ໄວ້ຂຶ້ນ. ນອກຈາກນັ້ນ, ຍັງຊ່ວຍໃຫ້ເກີດຄວາມຮູ້ສຶກຜ່ອນຄາຍຫຼາຍຂຶ້ນອີກ.

ຈັດຕາຕະລາງຊີວິດໃໝ່: ຖ້າວ່າຊີວິດມັກຈະມີຄວາມສັບສົນວຸ້ຍວາຍຫຼາຍເກີນໄປ ໃຫ້ລອງຈັດຕາຕະລາງຊີວິດໂຕເອງໃໝ່ ໂດຍການກຳນົດການເຮັດກິດຈະກຳຕ່າງໆ. ໃນແຕ່ລະມື້ໃຫ້ມີຄວາມພໍດີບໍ່ຫຍຸ້ງ ຫຼື ວ່າງເກີນໄປ ແລະ ໃຫ້ມີເວລາເຫຼືອໄວ້ໃຫ້ໂຕເອງໄດ້ພັກຜ່ອນນຳ.

ປັບປ່ຽນທັດສະນະຄະຕິ: ການມີທັດສະນະຄະຕິໃນດ້ານລົບຕໍ່ສິ່ງໃດສິ່ງໜຶ່ງທີ່ຕ້ອງຜະເຊີນຢູ່ຕະຫຼອດເວລາຍ່ອມບໍ່ມີຜົນດີແນ່ນອນ. ດັ່ງນັ້ນ, ໃຫ້ປັບປ່ຽນທັດສະນະຄະຕິທີ່ຜິດໆກັບສິ່ງເຫຼົ່ານັ້ນໃໝ່ເຊັ່ນ: ຖ້າຄິດວ່າວຽກທີ່ເຮັດນັ້ນຍາກ, ເຮັດບໍ່ໄດ້ ກໍ່ໃຫ້ຄິດໃໝ່ວ່າ: ວຽກນັ້ນເປັນສິ່ງທີ່ທ້າທາຍຕ້ອງລອງສູ້ ເຖິງຈະຮູ້ວ່າມັນຍາກກໍ່ຕາມ.

ໃຊ້ນ້ຳຫອມກິ່ນສົດຊື່ນ: ມີຜົນວິໄຈວ່າ ການໃຊ້ນ້ຳຫອມກິ່ນກຸຫຼາບຈະເຮັດໃຫ້ລະບົບການຫາຍດີຂຶ້ນ. ນອກຈາກນັ້ນ, ຍັງຊ່ວຍຫຼຸດຜ່ອນຄວາມດັນເລືອດ ແລະ ກໍ່ໃຫ້ເກີດຄວາມຮູ້ສຶກຜ່ອນຄາຍອີກດ້ວຍ.

ປ່ຽນສະຖານທີ່ເຮັດວຽກໃຫ້ເບິ່ງແປກໃໝ່: ລອງອະນາໄມໂຕະເຮັດວຽກ, ປັບແສງສະຫວ່າງຂອງໜ້າຈໍຄອມພິວເຕີ, ຊອກຮູບ ຫຼື ຕົ້ນໄມ້ນ້ອຍໆມາວ່າງ ສິ່ງເຫຼົ່ານີ້ສາມາດເຮັດໃຫ້ເກີດຄວາມຮູ້ສຶກແປກຕາໃນການເຮັດວຽກ ແລະ ຍັງຊ່ວຍກະຕຸ້ນບໍ່ໃຫ້ຄຽດກັບການເຮັດວຽກໄດ້ເປັນຢ່າງດີ.

ນັ່ງສະມາທິ: ການນັ່ງສະມາທິຈະຊ່ວຍໃຫ້ຮູ້ສຶກສະຫງົບ, ມີສະຕິ, ມີສະມາທິທີ່ໝັ້ນຄົງ ແລະ ສາມາດເຮັດໃຫ້ເຊົາຕຶງຄຽດໂດຍບໍ່ຮູ້ໂຕ.

ຊອກຫາປຶ້ມດີໆມາອ່ານຈັກຫົວ ຫຼື ເບິ່ງໜັງຕະລົກ: ຊອກຫານິທານ ຫຼື ໜັງສືທີ່ມັກອ່ານ ເພື່ອບັນເທົາຄວາມຕຶງຄຽດທີ່ເກີດຂຶ້ນ. ປ່ອຍຄວາມຄິດຈິດໃຈໄປກັບຈິນຕະນາການໃນໂລກຂອງໜັງສື ເຊິ່ງຈະເຮັດໃຫ້ຜ່ອນຄາຍໄປໃນໂຕ. ຖ້າວ່າເປັນຄົນທີ່ບໍ່ຄ່ອຍຈະມັກອ່ານໃຫ້ປ່ຽນມາເບິ່ງໜັງຕະລົກ ເຊິ່ງເປັນອີກໂຕເລືອກໜຶ່ງທີ່ຈະເຮັດໃຫ້ເຊົາຄຽດໄດ້ ເມື່ອໄດ້ຍິ້ມໄດ້ຫົວຈະຊ່ວຍໃຫ້ຈິດໃຈເບິກບານມ່ວນຊື່ນ ແລະ ບໍ່ຮູ້ສຶກຄຽດ.