ບຸນມະໂຫລານສົ່ງເສີມການອ່ານ ຈະຈັດຂຶ້ນທ້າຍອາທິດນີ້

364

ງານບຸນມະໂຫລານ ສົ່ງເສີມການອ່ານ ນະຄອນຫຼວງວຽງຈັນ ຄັ້ງທີ 1 ກຽມຈັດຂຶ້ນທ້າຍອາທິດນີ້ ໂດຍຈະມີບັນດາບໍລິສັດ ແລະ ຫ້າງຮ້ານເຂົ້າຮ່ວມຫຼາຍກວ່າ 200 ຫົວໜ່ວຍ ຄາດຈະມີປຶ້ມອ່ານຈາກພາຍໃນ ແລະ ຕ່າງປະເທດຫຼາຍກວ່າ 1 ລ້ານຫົວ. ນອກນີ້, ຍັງຈະມີກິດຈະກຳເພື່ອຊ່ວຍເຫຼືອໂຮງຮຽນທີ່ຍັງທຸກຍາກຂາດເຂີນຕື່ມອີກ.

ພິທີຖະແຫຼງຂ່າວຈັດຂຶ້ນໃນວັນທີ 1 ມີນາຜ່ານມາ ທີ່ຫ້ອງຮັບແຂກສໍານັກງານປົກຄອງ ນວ ໃຫ້ກຽດຖະແຫຼງໂດຍ ທ່ານ ພອນພະຈັນ ແພງພູວັນ ຮອງຫົວໜ້າພະແນກ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ມີທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກີລາ, ທ່ານ ວຽງສະໄໝ   ພະສະເຫຼີມສຸກ ຮອງຫົວໜ້າຫ້ອງວ່າການນະຄອນຫຼວງວຽງຈັນ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວ, ທ່ານ ພອນພະຈັນ ແພງພູວັນ ກ່າວວ່າ: ການຈັດງານບຸນມະໂຫລານ ສົ່ງເສີມການອ່ານ ນະຄອນຫຼວງວຽງຈັນຄັ້ງນີ້ ເພື່ອເປັນການລະດົມໃຫ້ຄົນລາວເລັ່ງເຫັນເຖິງຄວາມສໍາຄັນຂອງການອ່ານ ແລະ ສົ່ງເສີມໃຫ້ອ່ານໜັງສືຢ່າງຕໍ່ເນື່ອງ ລວມເຖິງການຊ່ວຍເຫຼືອຂອງພໍ່ແມ່ຜູ້ປົກຄອງ,  ຄູ – ອາຈານ, ນ້ອງນັກຮຽນ – ນັກສຶກສາຮັບຮູ້ ແລະ ເຂົ້າໃຈເຕັກນິກວິທີການສົ່ງເສີມການອ່ານແກ່ເດັກນ້ອຍເຍົາວະຊົນຢ່າງເໝາະສົມ ແລະ ໄດ້ຜົນ. ນອກຈາກນີ້, ຍັງໄດ້ເປີດໂອກາດໃຫ້ຄົນລາວໄດ້ສໍາຜັດກັບປຶ້ມຈາກນາໆຊາດ ເພື່ອເປີດໂລກະທັດ ແລະ ເບິ່ງເຫັນການພັດທະນາອຸດສາຫະກໍາປຶ້ມໃນຕ່າງປະເທດ.

ຂະນະດຽວກັນ, ກໍຖືເປັນການເປີດໂອກາດໃຫ້ຄົນຕ່າງຊາດສໍາຜັດກັບປຶ້ມອ່ານຂອງລາວ ແລະ ຍັງເປັນສື່ກາງໃນການສ້າງໂອກາດໃຫ້ກັບນັກຂຽນ ແລະ ສໍານັກພິມຂອງລາວ ໃນການຈໍາໜ່າຍລິຂະສິດໃຫ້ກັບຕ່າງປະເທດ. ນອກນັ້ນ, ຍັງເຮັດໃຫ້ສໍານັກພິມມີຄວາມຕື່ນຕົວປັບປຸງ ແລະ ພັດທະນາການຜະລິດປຶ້ມອ່ານໃຫ້ມີຄຸນນະພາບທີ່ຫຼາກຫຼາຍສີສັນ, ທີ່ເປັນປະໂຫຍດຕໍ່ຜູ້ອ່ານ ແລະ ພັດທະນາເສດຖະກິດ – ສັງຄົມຂອງປະເທດຊາດໃຫ້ເຂັ້ມແຂງຂຶ້ນເປັນກ້າວໆ.

ພາຍໃນງານດັ່ງກ່າວ ຍັງມີກິດຈະກໍາທີ່ຫຼາກຫຼາຍເປັນຕົ້ນແມ່ນ: ວາງສະແດງສື່ສິ່ງພິມຕ່າງໆ ເປັນຕົ້ນ: ປຶ້ມອ່ານຈາກພາຍໃນ ແລະ ຕ່າງປະເທດຫຼາຍກວ່າ 1 ລ້ານຫົວ, ມີບໍລິສັດ ແລະ ຫ້າງຮ້ານເຂົ້າຮ່ວມຫຼາຍກວ່າ 200 ບູດ, ມີກິດຈະກຳຖາມ – ຕອບ ຄວາມຮູ້ຮອບຕົວ, ສໍາລັບນັກຮຽນ ແລະ ກີລາຕ່າງໆ, ແຈກຢາຍປຶ້ມຕ່າງໆມູນຄ່າ 1 ລ້ານກີບ, ໃຫ້ໂຮງຮຽນຕ່າງໆໃນນະຄອນຫຼວງ ແລະ ເຂດຫ່າງໄກສອກຫຼີກ. ນອກຈາກນີ້, ຜູ້ເຂົ້າຮ່ວມຈະໄດ້ພົບກັບນັກຂຽນ, ນັກແຕ່ງ ແລະ ນັກເວົ້າທີ່ມີປະສົບການສູງຈາກພາຍໃນ ແລະ ຕ່າງປະເທດ. ສະນັ້ນ, ຂໍເຊີນຊວນມວນຊົນ ແລະ ບຸກຄົນທົ່ວໄປ ທັງພາຍໃນ ແລະ ຕ່າງປະເທດ.

ງານດັ່ງກ່າວແມ່ນຈະໄດ້ຈັດຂຶ້ນໃນລະຫວ່າງວັນທີ 7 – 17 ມີນາ 2019 ທີ່ລານກາງແຈ້ງດ້ານໜ້າຂອງສູນການຄ້າສາກົນ ( World Trade Centre ), ຖະໜົນຄູວຽງ ບ້ານໜອງຈັນ ເມືອງສີສັດຕະນາກ ນະຄອນຫຼວງວຽງຈັນ ເລີ່ມເວລາ 9:00 – 21:30 ໂມງ ສະເພາະວັນ ສຸກ – ອາທິດ ປິດ 22:30 ໂມງ ແລະ ຄາດວ່າຈະມີຜູ້ເຂົ້າຮ່ວມງານ ປະມານ 5 ພັນ – 10 ພັນຄົນຕໍ່ມື້.