ມະຫາວິທະຍາໄລກຸງເທບ ແນະນຳ 6 ສາຂາວິຊາ ທີ່ເໝາະກັບນັກສຶກສາລາວ

351

ມະຫາວິທະຍາໄລກຸງເທບ ໄດ້ຈັດງານ BU OPEN DAY ທີ່ນະຄອນຫຼວງວຽງຈັນ ເພື່ອເປັນການໃຫ້ຂໍ້ມູນການຮຽນ ແລະ ແນະນຳ 6 ສາຂາວິຊາຮຽນທີ່ເໝາະກັບນັກສຶກສາລາວ ພ້ອມທັງເປັນການເປີດໂອກາດໃຫ້ນັກຮຽນລາວ ໄດ້ສອບຖາມອາຈານຕົວຈິງແຕ່ລະຄະນະວິຊາທີ່ຕົນເອງສົນໃຈ.

ພິທີດັ່ງກ່າວຈັດຂຶ້ນໃນວັນທີ 2 ມີນາ 2019 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ພາຍໃຕ້ການຮ່ວມມືຂອງມະຫາວິທະຍາໄລກຸງເທບ ແລະ Classy Education ໂດຍມີຄະນະອາຈານ, ນັກຮຽນ – ນັກສຶກສາ, ພໍ່ແມ່ຜູ້ປົກຄອງ, ນັກສຶກສາອາສາສະໝັກຈາກລາວ ແລະ ໄທ ເຂົ້າຮ່ວມ.

ທ່ານ ຈາຣຸວັດ ກຽດຕິວົງ ຜູ້ອໍານວຍການຝ່າຍພັດທະນາເຄືອຂ່າຍຕ່າງປະເທດ ມະຫາວິທະຍາໄລກຸງເທບ ໄດ້ກ່າວວ່າ: ງານ BU OPEN DAY ຄັ້ງນີ້ ຖືເປັນຄັ້ງທຳອິດທີ່ທາງ ມະຫາວິທະຍາໄລກຸງເທບ ໄດ້ຈັດຂຶ້ນຢູ່ຕ່າງປະເທດ ນັ້ນກໍຄື ສປປ ລາວ ຈຸດປະສົງຫຼັກກໍແມ່ນເປັນການພົບປະຄູ – ອາຈານໃນແວດວົງການສຶກສາ, ນ້ອງນັກຮຽນ ແລະ ພໍ່ແມ່ຜູ້ປົກຄອງ. ພ້ອມດຽວກັນ, ກໍເປັນການແນະນຳຫຼັກສູດ, ໃຫ້້ຂໍ້ມູນລາຍລະອຽດກ່ຽວກັບສາຂາວິຊາຮຽນຕ່າງໆ ລວມໄປເຖິງການວາງແຜນການສຶກສາໃຫ້ພໍ່ແມ່ຜູ້ປົກຄອງ, ນ້ອງໆນັກຮຽນ – ນັກສຶກສາໄດ້ມີທາງເລືອກທີ່ດີໃນການສຶກສາຕໍ່ ບໍ່ວ່າຈະເປັນລະດັບປະລິນຍາຕີ, ປະລິນຍາໂທ ຫຼື ປະລິນຍາເອກ ໃນຫຼາກຫຼາຍຫຼັກສູດທັງພາສາໄທ, ພາສາອັງກິດ ( International ) ແລະ ພາສາຈີນ.

ພາຍໃນງານໄດ້ມີຄູ – ອາຈານ ແລະ ນັກສຶກສາຈາກມະຫາວິທະຍາໄລກຸງເທບ ມາໃຫ້ຄຳແນະນຳສາຂາວິຊາຮຽນທີ່ແທດເໝາະກັບຄົນລາວ ແລະ ມີທ່າແຮງທີ່ດີໃນອະນາຄົດ ລວມມີ 6 ຄະນະວິຊາ ຄື: ຄະນະສະຖາປັດຕະຍະກໍາ, ຄະນະນິເທດສາດ, ຄະນະບໍລິຫານທຸລະກິດ, ຄະນະມະນຸດສາດ ແລະ ການຈັດການທ່ອງທ່ຽວ, ຄະນະເຕັກໂນໂລຊີສື່ສານ ແລະ ນະວັດຕະກໍາ ແລະ ຄະນະວິສະວະກໍາສາດ.

ສຳລັບງານຄັ້ງນີ້ໄດ້ຮັບຄວາມສົນໃຈຈາກມວນຊົນເປັນຈຳນວນຫຼວງຫຼາຍ ໂດຍສະເພາະແມ່ນຄູ – ອາຈານ, ນັກຮຽນ – ນັກສຶກສາ, ພໍ່ແມ່ຜູ້ປົກຄອງທີ່ໄດ້ມາຮ່ວມຮັບຟັງການນໍາສະເໜີຂໍ້ມູນຕ່າງໆ ແລະ ເຮັດກິດຈະກໍາຖາມ – ຕອບ ເພື່ອຊ່ວຍໃນການຕັດສິນໃຈໄປຮຽນທີ່ ມະຫາວິທະຍາໄລກຸງເທບ. ພິເສດຜູ້ທີ່ມາສະໝັກພາຍໃນງານແມ່ນໄດ້ຮັບທຶນການສຶກສາຄົນລະ 10.000 ບາດ ແລະ ມີການສອບເສັງວັດລະດັບພາສາອັງກິດ, ໄທ. ນອກນັ້ນ, ຍັງໄດ້ສໍາຜັດ ແລະ ເຫັນຜົນງານບາງສ່ວນຂອງແຕ່ລະສາຂາຮຽນ.

ຂະນະດຽວກັນນັ້ນ, ນັກສຶກສາ ແລະ ນ້ອງນັກຮຽນທີ່ມາຮ່ວມງານໃຫ້ສໍາພາດ ວ່າ: ການທີ່ໄດ້ມາງານນີ້ແມ່ນເຮັດໃຫ້ຮູ້ຈັກຕົວເອງຫຼາຍຂຶ້ນ ໄດ້ຮູ້ວ່າເຮົາມັກຫຍັງ? ຕ້ອງການຫຍັງ? ແລະ ໄດ້ຄໍາແນະນໍາຈາກອາຈານຮຸ່ນເອື້ອຍອ້າຍຄົນລາວທີ່ສຶກສາຢູ່ມະຫາວິທະຍາໄລກຸງເທບຫຼາຍຢ່າງ ເພື່ອຊ່ວຍໃນການຮຽນ ແລະ ເຮັດໃນສິ່ງທີ່ຕົນເອງມັກ.

ຖ້ານ້ອງໆນັກຮຽນ – ນັກສຶກສາທີ່ສົນໃຈຢາກໄປຮຽນຕໍ່ ຫຼື ຢາກຮູ້ຂໍ້ມູນລາຍລະອຽດກ່ຽວກັບ ມະຫາວິທະຍາໄລກຸງເທບ ສາມາດຕິດຕໍ່ພົວພັນໄດ້ທີ່ www.bu.ac.th ຫຼື E-mail: supajee.l@bu.ac.th ຫຼື ເຂົ້າໄປສອບຖາມໂດຍກົງທີ່ບູດຂອງ ມະຫາວິທະຍາໄລກຸງເທບ ໄດ້ທີ່ງານ TOP THAI BAND 2019 ເຊິ່ງຈະຈັດຂຶ້ນຢູ່ສູນການຄ້າ ລາວ – ໄອເຕັກ ໃນວັນທີ 5 – 11 ມີນາ 2019.