ຄົ້ນພົບໂຄງກະດູກ T-Rex ໄດໂນເສົາລ່າເໜືອທີ່ໃຫຍ່ທີ່ສຸດໃນໂລກ ຢູ່ປະເທດການາດາ

507

ສໍານັກຂ່າວຕ່າງປະເທດລາຍງານວ່າມີການຂຸດຄົ້ນພົບ ຟອສຊິລ ຂອງໄດໂນເສົາສາຍພັນລ່າເນື້ອT-Rex ຂະໜາດໃຫຍ່ທີ່ສຸດໃນໂລກທີ່ປະເທດການາດາ ເພິ່ມເປັນອີກໜຶ່ງຫຼັກຖານສໍາຄັນທີ່ພິສູດວ່າ ໄດໂນເສົາ ມີຕົວຕົນຢູ່ຈິງ ເຊິ່ງມີຂະໜາດໃຫຍ່ກວ່າທີ່ເຮົາເຄີຍເຂົ້າໃຈ.

ຟອສຊິລ ທີ່ຂຸດພົບນັ້ນ ຖືກຕັ້ງຊື່ວ່າ Scotty ຖືກຄົ້ນພົບໃນແຫຼ່ງຂຸດຟອສຊິລ ໃນປະເທດການາດາໂດຍຜູ້ຊ່ຽວຊານຄາດວ່າ ຕອນທີ່ມັນຍັງມີຊີວິດຢູ່ນໍ້າໜັກຂອງມັນອາດຈະປະມານ 19.500 ປອນ ຫຼື 8,8ໂຕ້ນ ເລີຍ.

ຕອນນີ້ໄດ້ທຳການຂຸດເອົາຊາກຟອສຊິລດັ່ງກ່າວຂຶ້ນມາແລ້ວ 65% ຂອງທັງໝົດປະກອບໄປດ້ວຍສ່ວນຫົວກະໂຫຼກ, ກະດູກຂາ, ກະດູກສະໂພກ, ແລະ ກະດູກຊີກໂຄງ.

ຢ່າງໃດກໍ່ຕາມ ຈາກການສຶກສາຟອສຊິລດັ່ງກ່າວແລ້ວເຜີຍໃຫ້ເຫັນວ່າຕອນທີ່ມັນມີຊີວິດຢູ່ນັ້ນ Scotty ມີສຸຂະພາບທີ່ບໍ່ດີ ຫຼື ການໃຊ້ຊີວິດທີ່ບໍ່ດີປານໃດ.

ສາເຫດທີ່ນັກວິໄຈຄາດການວ່າສຸຂະພາບໃນການຈະເລີນເຕີບໃຫຍ່ຂອງມັນບໍ່ຄ່ອຍດີເນື່ອງມາຈາກ ແຂ້ວ 2 ເຫຼັ້ມ ມີຈຸດທີ່ຊີ້ໃຫ້ເຫັນເຖິງການຕິດເຊື້ອແລະ ກະດູກຫາງຂອງມັນແຕກອອກມາ ເຊິ່ງຄາດວ່າອາດຈະຖືກ T-Rex ຕົວອື່ນກັດ ແລະ ມັນກໍ່ອາດຈະມີຊີວິດຢູ່ເຖິງ 28 ປີ ໃນຜືນແຜ່ນດິນຂອງການາດາ ເມື່ອປະມານ 68 ລ້ານປີກ່ອນ!

ທາງດ້ານ Scott Persons ໜຶ່ງໃນທີມກວດກາຟອສຊິລຂອງ T-rex ທີ່ຖືກຕັ້ງຊື່ໃໝ່ວ່າ Scotty ນີ້ ມາຈາກມະຫາວິທະຍາໄລ Alberta ໄດ້ອອກມາເປີດເຜີຍວ່າ “ການຄົ້ນພົບໃນຄັ້ງນີ້ ເຮັດໃຫ້ພວກເຮົາເຫັນວ່າແທ້ຈິງແລ້ວ ໄດໂນເສົາ ມີຂະໜາດໃຫຍ່ກວ່າທີ່ບັນດານັກຊີວະວິທະຍາເຄີຍສຶກສາໄວ້ກ່ອນໜ້ານີ້”.

ຄວາມຈິງແລ້ວ ກ່ອນໜ້ານີ້ກໍ່ໄດ້ມີການຂຸດຄົ້ນພົບຊາກຂອງ Scotty ມາຕັ້ງແຕ່ປີ 1991 ແລ້ວ ແຕ່ຕ້ອງໃຊ້ເວລາດົນກວ່າ 20 ປີ ກວ່າຈະຂຸດຮ່າງຂອງມັນຂຶ້ນມາໄດ້ເກືອບຄົບທັງໝົດ ແລະ ໄດ້ສຶກສາເພື່ອເຮັດຄວາມເຂົ້າໃຈກັບມັນ.

ນັບຈາກນີ້ໄປ ທີມສຶກສາກໍ່ຈະທຳການສຶກສາຟອສຊິລຂອງ Scotty ຕໍ່ໄປ ໂດຍຈະເນັ້ນໄປທີ່ກະດູກເບົ້າຕາ ແລະ ເຂົາທີ່ຢູ່ດ້ານຂ້າງຂອງກະໂຫຼກ.

“ເລື່ອງໃຫຍ່ທີ່ຜູ້ຄົນມັກຈະຖາມກັນກໍ່ຄື: ຂະໜາດຂອງມັນໃຫຍ່ສໍ່າໃດ ແຕ່ສໍາລັບຂ້ອຍແລ້ວ ເລື່ອງທີ່ໃຫຍ່ກວ່ານັ້ນກໍ່ຄື ລາຍະລະອຽດຍ່ອຍຕ່າງໆ ໃນສິ່ງທີ່ພວກເຮົາຄົ້ນພົບ ແລະ ມັນມັກຈະສ້າງຄວາມແປກໃຈໃຫ້ກັບພວກເຮົາສະເໝີ” Scott ກ່າວ.

ນັບເປັນອີກໜຶ່ງໃນການຄົ້ນພົບຄັ້ງສໍາຄັນ ທີ່ຈະເຮັດໃຫ້ພວກເຮົາຮູ້ແລ້ວວ່າ ແທ້ຈິງແລ້ວ ໄດໂນເສົາ ໃນອະດີດນັ້ນ ມີຂະໜາດໃຫຍ່ກວ່າທີ່ພວກເຮົາເຄີຍເຂົ້າໃຈຢູ່ຫຼາຍເຕີບເລີຍ.

Credit: ABC, natgeo