ສາລະວັນ ກຽມເບ້ຍໄມ້ 6 ແສນກວ່າເບ້ຍ ທີ່ຈະປູກໃນວັນທີ 1 ມິຖຸນາ

715

ທ່ານ ອະນຸສັກ ຈຳປາຄຳ ຫົວໜ້າພະແນກກະສິກຳ ແລະປ່າໄມ້ ແຂວງສາລະວັນ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 19 ພຶດສະພາ 2020 ວ່າ: ໃນປີ 2020 ແຂວງສາລະວັນ ໄດ້ກຳນົດຕົວເລກສູ້ຊົນໃນການເກັບແກ່ນໄມ້ໃຫ້ໄດ້ 600 ກວ່າກິໂລ, ກ້າເບ້ຍໄມ້ໃຫ້ໄດ້ 7 ແສນເບ້ຍ, ປູກປ່າໃຫ້ໄດ້ 450 ເຮັກຕາ, ຟື້ນຟູປ່າໄມ້ໃນ 3 ປະເພດຄື: ປ່າສະຫງວນແຫ່ງຊາດ, ປ່າປ້ອງກັນແຫ່ງຊາດ, ປ່າຜະລິດແຫ່ງຊາດ ໃຫ້ໄດ້ 16 ພັນກວ່າເຮັກຕາ ແລະ ຂຶ້ນທະບຽນສູນປູກ ໃຫ້ໄດ້ 1 ພັນເຮັກຕາ.

ຜ່ານການຈັດຕັ້ງປະຕິບັດວຽກງານຕົວຈິງ ມາຮອດປະຈຸບັນ ສາມາດຜະລິດເບ້ຍໄມ້ໄດ້ແລ້ວ 6 ແສນກວ່າເບ້ຍ, ເບ້ຍໄມ້ຄ້າງມາແຕ່ປີ 2019 ມີ 26 ພັນກວ່າເບ້ຍ, ຜະລິດໄດ້ໃນປີນີ້ມີ 5 ແສນກວ່າເບ້ຍ ປະກອບມີເບ້ຍໄມ້ 22 ຊະນິດຄື: ໄມ້ຂະຍູງ, ໄມ້ດູ່, ໄມ້ແຕ້ຂ່າ, ໄມ້ແຄນຫີນ, ໄມ້ແດງ, ໄມ້ບາກ, ໄມ້ສົ້ມພາດ, ໄມ້ແຕ້ໜາມ, ໄມ້ຄູນ, ໄມ້ດູ່ລາຍ,ໄມ້ກະເລົາ, ໄມ້ດູ່ເລືອດ ແລະ ອື່ນໆ.

ສ່ວນເປົ້າໝາຍຈະປູກໃນວັນທີ 1 ມິຖຸນານີ້ ເນື່ອງໃນວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ທີ່ຈະໄດ້ກວມເອົາເປົ້າໝາຍຈະປູກ 450 ເຮັກຕາ, ໃນ 51 ຈຸດ ຂອງ 8 ຕົວເມືອງ ໂດຍຈະເລັງໃສ່ປູກໃນຂອບເຂດປ່າສະຫງວນແຫ່ງຊາດ, ປ່າປ້ອງກັນແຫ່ງຊາດ, ປ່າຜະລິດແຫ່ງຊາດຂອງແຂວງ, ເມືອງ ແລະຂອງບ້ານ ທີ່ໄດ້ກຳນົດໄວ້.

ໂດຍ: ທິດລານີ ໂຄດໂຍທາ.