ອາດສະພອນ ມີແຜນຜະລິດເຂົ້ານາປີໃນເນື້ອທີ່ 19.500 ເຮັກຕາ

567

ໃນວັນທີ 20 ພຶດສະພາ 2020 ນີ້ ທ່ານ ສີວິໄລ ສີທຳມະວັນ ຫົວໜ້າຫ້ອງການກະສິກຳປ່າໄມ້ ເມືອງອາດສະພອນ ແຂວງສະຫວັນນະເຂດ ໄດ້ໃຫ້ສຳພາດຕໍ່ຜູ້ສື່ຂ່າວ ວ່າ: ປະຈຸບັນຊາວນາ-ຊາວກະສິກອນ ທົ່ວເມືອງອາດສະພອນ ພວມກຳລັງ ຫັນລົງສູ່ການຜະລິດເຂົ້ານາປີ ໂດຍທົ່ວເມືອງມີແຜນຜະລິດເຂົ້ານາປີ ໃນເນື້ອທີ່ທັງໝົດ 19.500 ເຮັກຕາ

ພ້ອມນີ້ ປະຊາຊົນສ່ວນໜຶ່ງກໍ່ໄດ້ຫັນມາເຮັດນາຫວ່ານ ແລະ ນາຢອດເມັດແຫ້ງ ເພື່ອປະຢັດຕົ້ນທຶນການຜະລິດຂອງຕົນ, ໃນນີ້ນາຫວ່ານ ມີ 975 ເຮັກຕາ ແລະ ຢອດເມັດແຫ້ງ ມີ 975 ເຮັກຕາ, ສຳລັບປະຊາຊົນທີ່ຊົມໃຊ້ລະບົບຊົນລະປະທານ ຫຼືມີໜອງ-ຝາຍ ກໍ່ສາມາດຕົກກ້າໄດ້ຕາມເງື່ອນໄຂຂອງໃຜລາວ ຮອດປະຈຸບັນທົ່ວເມືອງຕົກກ້າໄດ້ແລ້ວ 2%

ນອກຈາກປູກເຂົ້າແລ້ວ ປະຊາຊົນຍັງໄດ້ປູກພືດລະດູຝົນໃນເນື້ອທີ່ 2.950 ເຮັກຕາ ພືດທີ່ປູກມີ: ສາລີ, ໝາກໂມ, ໝາກຖົ່ວ, ໝາກແຕງ, ໝາກອຶ,ໝາກບວບ, ໝາກເຜັດ, ໝາກເຂືອ, ໝາກນັດ, ມັນຕົ້ນ, ຖົ່ວດິນ, ເຝືອກ-ມັນ, ໄມ້ໃຫ້ໝາກ ແລະ ຜັກຕ່າງໆ. ສຳລັບການຜະລິດເຂົ້ານາປີນີ້ ຫ້ອງການກະສິກຳປ່າໄມ້ເມືອງ ກໍ່ໃດ້ກຽມແນວພັນເຂົ້າ ທ່າສະໂນ8, ທ່າສະໂນ11, ທ່າດອກຄຳ8, ທ່າດອກຄຳ11 ແລະ ເຂົ້າ ກຂ6 ເຊິ່ງມີທັງໝົດ05 ໂຕນ ເປັນພັນປັບປຸງ 100% ເພື່ອສະໜອງແນວພັນໃຫ້ພໍ່ແມ່ປະຊາຊົນຕື່ມອີກ.
ຂ່າວ: ສົມຈິດ ແກ້ວສີຖາທິລາດ