ຜູ້ບໍລິຫານເທສລາ ຢືນຢັນ ຈະຂະຫຍາຍການລົງທຶນລົດໄຟຟ້າໃນຈີນ ຕໍ່ໄປ

121

ສຳ​ນັກ​ຂ່າວ​ຕ່າງ​ປະ​ເທດ​ລາຍ​ງານ​ວ່າ ທ່ານ ອີ​ລອນ ມັ​ສ ຜູ້​ບໍ​ລິ​ຫານ​ບໍ​ລິ​ສັດ​ເທ​ສ​ລາ ​ອິ້ງ, ຜູ້​ຜະ​ລິດ​ລົດ​ໄຟ​ຟ້າ (EV) ລາຍ​ໃຫ​ຍ່ຂອງ​ສະ​ຫະ​ລັດ ກ່າວ​ວ່າ: ບໍ​ລິ​ສັດ​ຈະ​ສືບ​ຕໍ່​ຂະ​ຫຍາຍ​ການ​ລົງ​ທຶນ​ໃນ ສ​ປ ຈີນ​ຕໍ່​ໄປ ເນື່ອງ​ຈາກວ່າ ຈີນ​ໄດ້​ລະ​ດົມ​ຊັບ​ພະ​ຍາ​ກອນ ແລະ ທຸ່ມ​ເທ​ຄວາມ​ພະ​ຍາ​ຍາມ​ໃນ​ການ​ພັດ​ທະ​ນາ​ເຕັກ​ໂນ​ໂລ​ຊີດີ​ຈີ​ຕ໋ອນ​ໃໝ່ໆ ມາ​ໃຊ້​ໃນ​ອຸດ​ສາ​ຫະ​ກຳ​ຕ່າງໆ ລວມ​ທັງ​ອຸດ​ສາ​ຫະ​ກຳ​ລົດ​ຍົນ ເຊິ່ງ​ເຮັດ​ໃຫ້​ຈີນ​ກ້າວ​ຂຶ້ນ​ເປັນ​ຜູ້​ນຳ​ໂລກ​ດ້ານ​ການ​ຫັນ​ເປັນ​ດີ​ຈີ​ຕ໋ອນ, ເທ​ສ​ລາ ຈຶ່ງ​ມີ​ແຜນ​ສືບ​ຕໍ່​ຂະ​ຫຍາຍ​ການ​ລົງ​ທຶນ​​ໃນຈີນ ລວມ​ທັງ​ການ​ວິ​ໄຈ ແລະ ພັດ​ທະ​ນາ​ເຕັກ​ໂນ​ໂລ​ຊີ​ໃນ​ຈີນ.

ຄຳ​ເຫັນ​ຂອງ​ຜູ້​ບໍ​ລິ​ຫານ​ເທ​ສ​ລາ ມີ​ຂຶ້ນ​ໃນ​ກອງ​ປະ​ຊຸມ World Internet Conference ຈັດ​ໂດຍ​ສຳ​ນັກ​ງານ​ໄຊ​ເບີ​ສະ​ເປ​ຊ​ຂອງ​ຈີນ ແລະ ເປັນ​ຄັ້ງ​ທີ 2 ທີ່​ທ່ານ ອີ​ລອນ ມັ​ສ ສະ​ແດງ​ຄວາມ​ຍ້ອງ​ຍໍ​ຈີນ​ວ່າ ເປັນ​ຜູ້​ນຳ​ໂລກ​ດ້ານ​ດີ​ຈີ​ຕ໋ອນ ໂດຍ​ກ່ອນ​ໜ້າ​ນີ້ ຜູ້​ບໍ​ລິ​ຫານ​ເທ​ສ​ລາ ກ່າວ​ໃນ​ງານ  World New Energy Vehicle Congress ວ່າ ຜູ້​ຜະ​ລິດ​ລົດ​ໄຟ​ຟ້າ​ໃນ​ຈີນ ມີ​ຄວາມ​ສາ​ມາດ​ໃນ​ການ​ແຂ່ງ​ຂັນ​ລະ​ດັບ​ໂລກ.

 

ເທ​ສ​ລາ ໄດ້​ເລີ່ມ​ສ້າງ​ຕັ້ງ​ໂຮງ​ງານ​ຂະ​ໜາດ​ໃຫຍ່​ທີ່​ນະ​ຄອນ​ຊຽງ​ໄຮ ໃນ​ປີ 2019 ໂດຍ​ເມື່ອ​ເດືອນ​ສິງ​ຫາ​ຜ່ານ​ມາ ບໍ​ລິ​ສັດ​ມີ​ຍອດ​ຂາຍ​ລົດ​ໄຟ​ຟ້າ​ທີ່​ຜະ​ລິດ​ໃນ​ຈີນ​ປະ​ມານ 44.264 ຄັນ, ໃນ​ນີ້ ມີ​ລົດ​ສົ່ງ​ອອກ 31.379 ຄັນ ເພີ່ມ​ຂຶ້ນ​ຈາກ​ເດືອນ​ກໍ​ລະ​ກົດ​ທີ່​ມີ​ຍອດ​ຂາຍ​ຢູ່​ທີ່ 32.968 ຄັນ ແລະ ເດືອນ​ມິ​ຖຸ​ນາ​ຢູ່​ທີ່ 33.155 ຄັນ.