ສິງກະໂປ ກັກຜູ້ໂດຍສານ ເກືອບ 3.000 ຄົນ ຫຼັງຈາກມີຜູ້ຕິດເຊື້ອເທິງເຮືອສຳລານ

220

ເຮືອສຳລານລຳໃຫຍ່ຂອງສິງກະໂປ ພ້ອມຜູ້ໂດຍສານ ແລະ ລູກເຮືອເກືອບ 3.000 ຄົນ ເດີນທາງກັບມາຈອດທຽບທ່າກ່ອນກຳນົດ ຫຼັງຈາກກວດພົບຜູ້ຕິດເຊືອໂຄວິດ-19 ຢ່າງໜ້ອຍ 1 ຄົນ.

ສຳນັກຂ່າວຕ່າງປະເທດລາຍງານຈາກປະເທດສິງກະໂປ ເມື່ອວັນພຸດ ທີ 14 ກໍລະກົດ ວ່າ ການທ່ອງທ່ຽວສິງກະໂປ ແລະ ກະຊວງສາທາລະນະສຸກສິງກະໂປ ຖະແຫຼງການ ເມື່ອວັນພຸດ ວ່າ ເຮືອສຳລານ “World Dream” ຂອງບໍລິສັດ Genting Dream ພ້ອມຜູ້ໂດຍສານ 1.646 ຄົນ ແລະ ລູກເຮືອ 1.249 ຄົນ ອອກເດີນທາງຈາກສິງກະໂປ ເມື່ອວັນອາທິດ ທີ່ຜ່ານມາ ໂດຍມີກຳ ນົດລອຍຢູ່ກາງທະເລໄລຍະ 4 ວັນ.

ຢ່າງໃດກໍ່ຕາມ, ເຮືອໄດ້ເດີນທາງກັບມາຈອດທຽບທ່າ ເມື່ອໄລຍະເຊົ້າຂອງວັນພຸດຕາມເວລາທ້ອງຖິ່ນກຳ ໄວກວ່າກຳນົດ 3 ຊົ່ວໂມງ ເນື່ອງຈາກຜູ້ໂດຍສານຄົນໜຶ່ງ ອາຍຸ 40 ປີ ມີຜົນກວດພີຊີອາຂອງໂຄວິດ-19 ເປັນບວກ. ເບື້ອງຕົ້ນ, ເຈົ້າໜ້າທີ່ເທິງເຮືອແຍກກັກບໍລິເວຜູ້ຕິດເຊື້ອ ແລະ ຜູ້ສຳຜັດໃກ້ຊິດອີກ 3 ຄົນ ເຊິ່ງຜົນຍັງຢືນຢັນເປັນລົບ.

ທັງນີ້, ກ່ອນອອກເດີນທາງ ຜູ້ຕິດເຊື້ອຄົນດັ່ງກ່າວໄດ້ຮັບການສັກວັກແຊັງຄົບ 2 ໂດສ ລ່ວງໜ້າພາຍໃນເວລາທີ່ກຳນົດ ແລະ ຜ່ານການກວດຄັດກອງຢ່າງໄວ ກ່ອນເຂົ້າຫ້ອງຜູ້ໂດຍສານ. ຂະນະທີ່ ນັບຈາກນີ້ຈົນກວ່າຈະມີການປ່ຽນແປງ ມີພຽງລູກເຮືອທີ່ມີໜ້າທີ່ຈຳເປັນເທົ່ານັ້ນຈະໄດ້ຮັບອະນຸຍາດໃຫ້ເຄື່ອນໄຫວວຽກພາຍໃນເຮືອ ສ່ວນທີ່ເຫຼືອຕ້ອງກັກໂຕຢູ່ພາຍໃນພື້ນທີ່ຂອງຕົນເອງເຊັ່ນດຽວກັບຜູ້ໂດຍສານ.