ເຊື້ອເດລຕ້າ ຍັງລະບາດຢ່າງໜັກໃນອັງກິດ ແລະ ມີທ່າອ່ຽງເລື່ອນມາດຕະການຜ່ອນຜັນ

96

ນາຍົກລັດຖະມົນຕີບໍຣິສ ຈອນສັນ ມີທ່າທີເຖິງການເລື່ອນເວລາຜ່ອນຜັນມາດຕະການປິດເມືອງໄລຍະສຸດທ້າຍອອກໄປອີກຢ່າງໜ້ອຍ 1 ເດືອນ ເນື່ອງຈາກພາຍໃນປະເທດອັງກິດກຳລັງຜະເຊີນກັບການແຜ່ລະບາດຢ່າງໜັກຂອງເຊື້ອໄວຣັສໂຄໂຣນາກາຍພັນ “ເດລຕ້າ”.

ສຳນັກຂ່າວຕ່າງປະເທດລາຍງານຈາກນະຄອນຫຼວງລອນດອນ ປະເທດອັງກິດ ເມື່ອວັນອາທິດ ທີ 13 ມິຖຸນາ ວ່າ ນາຍົກລັດຖະມົນຕີບໍຣິສ ຈອນສັນ (Boris Johnson) ກ່າວເມື່ອວັນເສົາ ຜ່ານມາ ກ່ຽວກັບສະພາບການແຜ່ລະບາດຂອງໂຄວິດ-19 ພາຍໃນສະຫະຣາຊະອານາຈັກວ່າມີຄວາມເປັນກັງວົນຢ່າງຍິ່ງ ເນື່ອງຈາກພົບຜູ້ຕິດເຊື້ອກາຍພັນ ສາຍພັນເດລຕ້າ ທີ່ພົບຄັ້ງທຳອິດໃນປະເທດອິນເດຍ ເພີ່ມຂຶ້ນຢ່າງຕໍ່ເນື່ອງ ແລະ ໃຫ້ຄວາມເຫັນອີກວ່າ ສະຖານະການເມື່ອເດືອນຜ່ານມາດີກວ່ານີ້.

อาจเป็นรูปภาพของ หนึ่งคนขึ้นไป, ผู้คนกำลังยืน และกลางแจ้ง

ເຖິງວ່າ ທ່ານຈອນສັນ ບໍ່ໄດ້ກ່າວຫຍັງເພິ່ມຕື່ມ ແຕ່ຜູ້ນຳອັງກິດມີກຳນົດທີ່ຈະປະກາດໃຫ້ປະຊາຊົນຮັບຊາບ ພາຍໃນວັນຈັນທີ 14 ມິຖຸນານີ້ ວ່າ ແຜນການຜ່ອນຄາຍມາດຕະການປິດເມືອງໃນໄລຍະສຸດທ້າຍ “ທີ່ເປັນລຳດັບຂັ້ນ” ຈະເລີ່ມຕົ້ນຂັ້ນທຳອິດ ໃນວັນທີ 21 ມິຖຸນານີ້ ຈະເປັນໄປຕາມແຜນທີ່ວາງແຜນໄວ້ ຫຼື ບໍ່. ແຕ່ທ່ານເອງ ແລະ ເຈົ້າໜ້າທີ່ລະດັບສູງໃນລັດຖະບານກ່າວໄປໃນທິດທາງດຽວກັນມາຕະຫຼອດ ວ່າ ການຜ່ອນຄາຍມາດຕະການຄວບຄຸມສັງຄົມໃນສະຫະຣາຊະອານາຈັກຕ້ອງປະຕິບັດຕາມ “ຫຼັກຖານທີ່ສະແດງອອກທາງວິທະຍາສາດ”.

อาจเป็นรูปภาพของ 2 คน, ผู้คนกำลังนั่ง และกลางแจ้ง

ຂະນະທີ່ ສື່ທ້ອງຖິ່ນຫຼາຍແຫ່ງຂອງອັງກິດລາຍງານວ່າ ມີຄວາມເປັນໄປໄດ້ສູງຫຼາຍທີ່ ທ່ານນາຍົກລັດຖະມົນຕີ ຈະເລື່ອນກຳນົດການຜ່ອນຄາຍມາດຕະການທາງສັງຄົມອອກໄປອີກຢ່າງໜ້ອຍ 1 ເດືອນ ເປັນວັນທີ 19 ກໍລະກົດ ແທນ.

อาจเป็นรูปภาพของ หนึ่งคนขึ้นไป, ผู้คนกำลังนั่ง และพื้นหญ้า

ທັງນີ້, ກະຊວງສາທາລະນະສຸກສະຫະຣາຊະອານາຈັກ ລາຍງານຢືນຢັນພົບຜູ້ຕິດເຊື້ອໃໝ່ 7.738 ຄົນ ເມື່ອວັນເສົາ ຫຼຸດລົງເລັກໜ້ອຍເມື່ອທຽບໃສ່ກັບສະຖິຕິຜູ້ທີ່ເຊື້ອທີ່ໄດ້ຢືນຢັນ ເມື່ອວັນສຸກ ຜ່ານມາ. ແຕ່ຍັງຢູ່ໃນລະດັບສູງ ນັບຕັ້ງແຕ່ເດືອນກຸມພາ ຜ່ານມາ ແລະ ເຮັດໃຫ້ປັດຈຸບັນສະຫະຣາຊະອານາຈັກມີຜູ້ຕິດເຊື້ອໂຄວິດ-19 ເພີ່ມຂຶ້ນຫຼາຍກວ່າ 4,5 ລ້ານຄົນ, ປິ່ນປົວເຊົາດີສະສົມເກືອບ 4,3 ລ້ານຄົນ ແລະ ເສຍຊີວິດສະສົມຢ່າງໜ້ອຍ 127.896 ຄົນ ເພີ່ມໃໝ່ 12 ຄົນ.