ໜ່ວຍງານເອີຣົບເລີ່ມພິຈາລະນາວັກແຊັງຊິໂນແວັກ

35

ວັກ​ແຊັງ​ປ້ອງ​ກັນ​ໂຄ​ວິ​ດ-19 ຂອງບໍລິສັດຊິໂນແວັກຈາກປະເທດຈີນ ເຂົ້າສູ່ການພິຈາລະນາຂັ້ນຕອນທຳອິດຂອງການກວດກາ ໂດຍອົງການການຢາແຫ່ງສະຫະພາບເອີຣົບ.

ສຳນັກຂ່າວຕ່າງປະເທດລາຍງານຈາກນະຄອນຫຼວງບຣັສເຊລ ປະເທດແບນຊິກ ເມື່ອວັນອັງຄານ ທີ 4 ພຶດສະພາ ວ່າ ຄະນະກຳມະການພິຈາລະນາຢາຂອງອົງການການຢາແຫ່ງສະຫະພາບເອີຣົບ (EMA: European Medicines Agency) ໄດ້ອອກຖະແຫຼງການ ເມື່ອ​ວັນ​ອັງ​ຄານ ເລື່ອງການເລີ່ມພິຈາລະນາປະສິດທິພາບຂອງວັກແຊັງປ້ອງກັນໂຄວິດ-19 ຜະລິດໂດຍບໍລິສັດຊິໂນແວັກ ໄລ ໄຊເອັນ ຈາກປະເທດຈີນ. ໂດຍອີງໃສ່ການກວດສອບ ແລະ ຕິດຕາມເວລາຈິງ ຫຼື ຕ້ອງກວດສອບທັນທີ ຈາກຜົນເບື້ອງຕົ້ນຂອງການທົດລອງໃນສັດ ແລະ ຄົນ ເພື່ອປະເມີນປະສິດທິພາບຂອງວັກແຊັງ ໃນການກະຕຸ້ນໃຫ້ຮ່າງກາຍສ້າງພູມຕ້ານທານຕໍ່ຕ້ານໄວຣັສໂຄໂຣນາສາຍພັນໃໝ່.

ไม่มีคำอธิบายรูปภาพ

ຂະບວນການດັ່ງກ່າວ ຈະຊ່ວຍຫຼຸດໄລຍະເວລາການພິຈາລະນາສັ້ນລົງ ເພື່ອອະນຸມັດການນຳໃຊ້ເປັນກໍລະນີສຸກເສີນ ໂດຍນອກເໜືອ ຈາກວັກແຊັງຊິໂນແວັກ ເຊິ່ງເປັນວັກແຊັງທຳອິດຈາກປະເທດຈີນທີ່ເຂົ້າສູ່ຂັ້ນການກວດສອບດັ່ງກ່າວ ຍັງມີວັກແຊັງອີກຫຼາຍຍີ່ຫໍ້ທີ່ກຳລັງຢູ່ໃນຂັ້ນຕອນດຽວກັນ ລວມທັງວັກແຊັງຄຽວແວັກ ຂອງເຢຍລະມັນ, ໂນວາແວັກ ຂອງອາເມຣິກາ ແລະ ສະປຸດນິກ ວີ ຂອງຣັດເຊຍ.

ປັດຈຸບັນ EMA ໄດ້ລົງທະບຽນນຳໃຊ້ວັກແຊັງ ໃຫ້ 4 ຍີ່ຫໍ້ ເປັນກໍລິນີສຸກເສີນ ຄື ແອສຕຣາເຊເນກາ/ອັອກຟອດ, ໄຟເຊີ/ໄບໂອເອັນເທັກ, ໂມເດີນາ ແລະ ຈອນສັນ ແອນ ຈອນສັນ.