“ຍ່າງແລກເງິນ” ປະເທດອຸຊເບກິສຖານ ຈັດກິດຈະກຳກະຕຸ້ນປະຊາຊົນດູແລສຸຂະພາບ

44

ປະເທດອຸຊເບກິສຖານຈັດກິດຈະກຳ “ຍາງແລກເງິນ” ເພື່ອກະຕຸ້ນໃຫ້ປະຊາຊົນໃນປະເທດດູແລສຸຂະພາບ.

ສຳນັກຂ່າວຊິນຫົວ ລາຍງາຈາກນະຄອນຫຼວງທາສເຄນ ປະເທດອຸຊເບກິສຖານ ເມື່ອວັນອາທິດ ທີ 2 ພຶດສະພາ ວ່າ ກະຊວງຍຸຕິທຳຂອງປະເທດອຸຊເບກິສຖານ ປະກາດ ເມື່ອວັນທີ 1 ພຶດສະພາ ຜ່ານມາວ່າ ໄດ້ຮັບຮອງມະຕິມອບໃຫ້ເງິນໃຫ້ແກ່ປະຊາຊົນ ອາຍຸ 18 ປີ ຂຶ້ນໄປທີ່ຍ່າງຫຼາຍກວ່າ 10,000 ກ້າວຕໍ່ມື້.

ລັດຖະບານອຸຊເບກີສຖານໄດ້ພັດທະນາແພລັດຟອມ ອອນລາຍ ເຊິ່ງປະຊາຊົນສາມາດລົງທະບຽນ ແລະ ສ້າງກະເປົາເງິນເອເລັກໂທຣນິກ ເພື່ອຮັບປະມານ 0.3 ໂດລາສະຫະລັດ (ປະມານ 2.700 ກີບ) ສຳລັບການເດີນທາງດ້ວຍການຍ່າງແຕ່ລະມື້ ໂດຍປະຊາຊົນຕ້ອງຕິດຕັ້ງແອັບພລິເຄຊັ່ນສຸຂະພາບໃສ່ໃນໂທລະສັບມືຖືຂອງຕົນເອງ.

ກະຊວງດັ່ງກ່າວ ກ່າວວ່າ ຜູ້ທີ່ຍ່າງຫຼາຍທີ່ສຸດໃນລະດັບທ້ອງຖິ່ນ ແລະ ລະດັບປະເທດ ແມ່ນຈະໄດ້ຮັບເງິນຕອບແທນແຕ່ລະເດືອນ ໂດຍກິດຈະກຳດັ່ງກ່າວ ເພື່ອແນໃສ່ການດຳລົງຊີວິດແບບສຸຂະພາບດີເປັນວົງກວ້າງ ແລະ ສົ່ງເສີມການຫຼິ້ນກີລາ ເຊັ່ນ: ການຍ່າງ, ແລ່ນ, ຂີ່ລົດຖີບ, ເຕະບານ, ຕີດອກປີກໄກ່ ແລະ ບານສົ່ງ.