ຟີລິບປິນ ຮັບວັກແຊັງ ສະປຸດນິກ ວີ ລັອດທຳອິດຈາກຣັສເຊຍ

364

ຣັສເຊຍສົ່ງມອບຢາວັກແຊັງປ້ອງກັນໂຄວິດ-19 ສະປຸດນິກ ວີ “Sputnik V” ຈຳນວນ 15.000 ໂດສ ໃຫ້ແກ່ຟີລິບປິນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງມະນີລາ ປະເທດຟີລິບປິນ ເມື່ອວັນອາທິດ ທີ 2 ພຶດສະພາ ວ່າ ທຳນຽບມາລາກັນ ໄດ້ຖະແຫຼງການວ່າ ຢາວັກແຊັງ ສະປຸດນິກ ວີ ຂອງສະຖາບັນກາມາເລຢາຂອງຣັສເຊຍ ຈຳນວນ 15.000 ໂດສ ຖືກນຳສົ່ງດ້ວຍຖ້ຽວບິນຄາໂກ້ຂອງສາຍການບິນກາຕ້າ ແອເວ ມາເຖິງສະໜາມບິນນານາຊາດນິນອຍ ອາກີໂນ ເຂດຊານເມືອງຂອງນະຄອນຫຼວງມະນີລາ ເມື່ອວັນເສົາທີ່ຜ່ານມາ.

ທັງນີ້, ວັກແຊັງດັ່ງກ່າວເປັນລັອດທຳອິດ ຈາກທັງໝົດ 20 ລ້ານໂດສ ທີ່ລັດຖະບານຟີລິບປິນໄດ້ເຈລະຈາຊື້ໂດຍຜ່ານກອງທຶນການລົງທຶນໂດຍກົງຂອງຣັສເຊຍ (RDIF) ເຊິ່ງເປັນຜູ້ຈຳໜ່າຍວັກແຊັງສະປຸດນິກ ວີ ໃນນາມຕົວແທນຂອງລັດຖະບານມອສກູ ແລະ ສະຖາບັນກາມາເລຢາ ເຊິ່ງເປັນຜູ້ພັດທະນາ.

ຫຼັງຈາກນີ້, ກະຊວງສາທາລະນະສຸກຟີລິບປິນຈະກວດສອບຄຸນນະພາບຂອງວັກແຊັງອີກຄັ້ງ ກ່ອນທີ່ຈະຈາຍວັກແຊັງສະປຸດນິກ ວີ ໃຫ້ແກ່ໜ່ວຍງານສາທາລະນະສຸກ ໃນ 4 ເມືອງອ້ອມຂ້າງນະຄອນຫຼວງມະນີລາ ເຊິ່ງເປັນພື້ນທີ່ສີແດງຂອງການແຜ່ລະບາດໂຄວິດ-19 ໂດຍປົກກະຕິແລ້ວວັກຊີນລັອດດັ່ງກ່າວ ມີກຳນົດເດີນທາງມາຮອດ ຕັ້ງແຕ່ວັນທີ 25 ເມສາ ຜ່ານມາ ແຕ່ຕ້ອງໄດ້ເລື່ອນເວລາເນື່ອງຈາກປະສົບກັບບັນຫາດ້ານການຂົນສົ່ງ.

ປັດຈຸບັນ ຟີລິບປິນ ເຊິ່ງມີຜູ້ຕິດເຊື້ອສະສົມຈາກໂຄວິດ-19 ຫຼາຍກວ່າ 1,04 ລ້ານຄົນ ແລະ ເສຍຊີວິດແລ້ວຫຼາຍກວ່າ 17.300 ຄົນ ໄດ້ຮັບວັກແຊັງປ້ອງກັນໂຄວິດ-19 ຫຼາຍກວ່າ 4.04 ລ້ານໂດສ ຈາກຈຳນວນດັ່ງກ່າວ 86% ເປັນວັກແຊັງຍີ່ຫໍ້ຊິໂນແວັກຂອງຈີນ ຮອງລົງມາເປັນວັກແຊັງແອສຕຣາເຊນິກາ/ອັອກຟອດ ທີ່ໄດ້ຮັບມອບໂດຍຜ່ານໂຄງການໂຄແວັກຂອງອົງການອະນາໄມໂລກ (WHO) ແລະ ນັບຕັ້ງແຕ່ເລີ່ມສັກວັກແຊັງ ເມື່ອເດືອນມີນາຜ່ານມາ ປະເທດຟີລິບປິນໄດ້ນຳໃຊ້ວັກແຊັງໃນຄັງໄປແລ້ວຫຼາຍກວ່າ 1,8 ລ້ານໂດສ.