ມາເລເຊຍ ເຈລະຈາຊື້ວັກແຊັງເພີ່ມຈາກ ຣັດເຊຍ ແລະ ຈີນ

200

ສຳນັກຂ່າວຕ່າງປະເທດລາຍງານວ່າ: ລັດຖະບານມາເລເຊຍ ກຳລັງເຈລະຈາຊື້ວັກແຊັງປ້ອງກັນໂຄວິດ – 19 ຈາກຣັດເຊຍ ແລະ ສປ ຈີນ ເຊິ່ງຈະສັ່ງຊື້ວັກແຊັງຈາກບໍລິສັດໄຟເຊີ ແລະ ໄບໂອເອັນເທັກເພີ່ມ ເພື່ອໃຫ້ພຽງພໍສຳລັບສັກໃຫ້ປະຊາຊົນ.

ທ່ານ ໄຄຣີ ຈາມູລຸດດິນ ລັດຖະມົນຕີກະຊວງວິທະຍາສາດ ເຕັກໂນໂລຊີ ແລະ ນະວັດຕະກຳຂອງມາເລເຊຍ ເປີດເຜີຍວ່າ: ລັດຖະບານມາເລເຊຍ ໄດ້ຈັດສັນງົບປະມານ 500 ລ້ານໂດລາສະຫະລັດ ເພື່ອຈັດຊື້ວັກແຊັງປ້ອງກັນໂຄວິດ – 19 ເພື່ອມາສັກໃຫ້ປະຊາຊົນ ຈຳນວນ 26,5 ລ້ານຄົນ ເຊິ່ງກວມເອົາ 82,8% ຂອງຈຳນວນປະຊາກອນທັງໝົດ.

ລາຍງານຂ່າວລະບຸວ່າ: ລັດຖະບານມາເລເຊຍ ໄດ້ສັ່ງຊື້ວັກແຊັງຈາກບໍລິສັດໄຟເຊີ – ໄບໂອເອັນເທັກ ແລະ ແອສຕຣາເຊເນກາ ຂອງອັງກິດແລ້ວ, ຂະນະນີ້ກຳລັງເຈລະຈາຂໍຊື້ວັກແຊັງສະປຸດນິກ – V ຈາກສະຖາບັນກາມາເລຢາຂອງຣັດເຊຍ ຈຳນວນ 6,4 ລ້ານໂດສ ແລະ ຈະເຈລະຈາຊື້ວັກແຊັງຈາກບໍລິສັດ ຊີໂນແວັກ ໄບໂອເທັກ ແລະ ບໍລິສັດກັງຊີໂນໄບໂອໂລຈິກສ໌ ຂອງ ສປ ຈີນອີກ, ເຫດຜົນທີ່ລັດຖະບານມາເລເຊຍສັ່ງຊື້ວັກແຊັງຈາກຫຼາຍບໍລິສັດກໍຍ້ອນວ່າສັ່ງເພື່ອໄວ້ ເພາະວັກແຊັງບາງຊະນິດອາດບໍ່ຜ່ານການອະນຸມັດໃຫ້ນຳໃຊ້ ລວມທັງບາງບໍລິສັດອາດຈະສົ່ງມອບບໍ່ທັນຕາມກຳນົດເວລາ.