ມອບເຂົ້າສານຈ້າວ 20 ໂຕນໃຫ້ 2 ກອງບັນຊາການທະຫານແຂວງສະຫວັນະເຂດ-ຄຳມ່ວນ

173

ໃນຕອນເຊົ້າຂອງວັນທີ 14 ທັນວາ 2020 ນີ້ ຢູ່ທີ່ໂຮງຮຽນທະຫານຊາຍແດນ 712,ກົມທະຫານທະຫານຊາຍແດນ ກົມໃຫ່ຍເສນາທິການກອງທັບ ໄດ້ຈັດພິທີມອບ-ຮັບເຂົ້າສານຈ້າວຈຳນວນ 20 ໂຕນໃຫ້ກອງບັນຊາການທະຫານແຂວງສະຫວັນະເຂດ-ຄຳມ່ວນ ເຊິ່ງມອບໃຫ້ກອງບັນຊາການທະຫານແຂວງສະຫວັນະເຂດຈຳນວນ 12 ໂຕນ ທະຫານແຂວງຄຳມ່ວນ ຈຳນວນ 8 ໂຕນ.ເຂົ້າຮ່ວມພິທີ ມີ ສະຫາຍ ພົນຈັດຕະວາ ສີພັນ ພຸດທະວົງ ຄະນະພັກອົງການກົມໃຫ່ຍ ຫົວໜ້າກົມທະຫານຊາຍແດນກົມໃຫ່ຍເສນາທິການກອງທັບ,ສະຫາຍ ພັນໂທ ສຸວັນ ເກດຕະວົງ ຄະນະພັກ ຫົວໜ້າຫ້ອງການກອງບັນຊາການທະຫານແຂວງສະຫວັນະເຂດ,ມີສະຫາຍ ພັນໂທ ວຽງວິໄລ ພານິຈັນ ຄະນະພັກ ຫົວໜ້າຫ້ອງການກອງບັນຊາການທະຫານແຂວງຄຳມ່ວນ,ມີຄະນະພັກ-ຄະນະອຳນວຍການພ້ອມດ້ວຍຄູອາຈານໂຮງຮຽນທະຫານຊາຍແດນເຂົ້າຮ່ວມ.

ໃນພິທີ ສະຫາຍ ພົນຈັດຕະວາ ສີພັນ ພຸດທະວົງ ຫົວໜ້າກົມທະຫານຊາຍແດນ ໄດ້ມີຄຳເຫັນວ່າ ເຂົ້າສານຈ້າວຈຳນວນ 20 ໂຕນທີ່ມອບໃຫ້ສອງກອງບັນຊາການທະຫານແຂວງສະຫວັນະເຂດ-ຄຳມ່ວນໃນຄັ້ງນີ້ ແມ່ນການຊ່ວຍເຫຼືອຂອງກອງບັນຊາການທະຫານຊາຍແດນຫວຽດນາມ ເພື່ອນຳໄປມອບໃຫ້ເມືອງເຊໂປນ ແຂວງສະຫວັນະເຂດ ແລະ ເມືອງ ບົວລະພາ ແຂວງຄຳມ່ວນ ທີ່ໄດ້ຮັບຜົນກະທົບໜັກຈາກໄພນໍາຖ້ວມໃນເດືອນຕຸລາປີ 2020 ຜ່ານມາ ເຊິ່ງສະແດງເຖິງຄວາມເປັນຫ່ວງເປັນໄຍ ແລະ ໃຫ້ການອຸ້ມຊູຊ່ວຍເຫຼືອເຊິ່ງກັນ ແລະ ກັນໃນຍາມທີ່ລຳບາກ ອີກອັນໜື່ງກໍ່ຍ້ອນການພົວພັນຮ່ວມມື ຄວາມສາມັກຄີແບບພິເສດລະຫວ່າງກົມທະຫານຊາຍແດນກົມໃຫ່ຍເເສນາທິການກອງທັບປະຊາຊົນລາວ ກັບກອງບັນຊາການທະຫານຊາຍແດນຫວຽດນາມທີ່ມີມາແຕ່ດົນນານແລ້ວນັ້ນ.

ຈາກນັ້ນກໍ່ໄດ້ເຊັນບົດບັນທຶກມອບ-ຮັບຢ່າງເປັນທາງການ.ໃນໂອກາດດັ່ງກ່າວນີ້ ສະຫາຍ ພັນໂທ ສຸວັນ ເກດຕະວົງ ຄະນະພັກ ຫົວໜ້າຫ້ອງການກອງບັນຊາການທະຫານແຂວງສະຫວັນະເຂດ ກໍ່ໄດ້ຕາງໜ້າສອງກົມກອງກ່າວສະແດງຄວາມຂອບອົກຂອບໃຈນຳກົມທະຫານຊາຍແດນກໍ່ຄືກອງບັນຊາການທະຫານຊາຍແດນຫວຽດນາມທີ່ມາມອບເຂົ້າສານຈ້າວເພື່ອຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກນຳ້ຖ້ວມໃນເດືອນຕຸລາຜ່ານມານີ້ ພ້ອມໃຫ້ຄຳສັນຍາວ່າຈະນຳເອົາເຄື່ອງບໍລິໂພກດັ່ງກ່າວນີ້ໄປມອບໃຫ້ອຳນາດການປົກຄອງເມືອງເຊໂປນ ແລະ ເມືອງ ບົວລະພາ ແຂວງຄຳມ່ວນເພື່ອໄປມອບໃຫ້ຄອບຄົວທີ່ໄດ້ຮັບຜົນກະທົບຈາກນຳ້ຖ້ວມໃຫ້ທົ່ວເຖິງ.ຕໍ່ມາໃນວັນທີ 15 ທັນວາ 2020 ນີ້

ເຂົ້າສານຈ້າວຈຳນວນ 12 ໂຕນ ກໍ່ໄດ້ໄປມອບໃຫ້ອຳນາດການປົກຄອງເມືອງເຊໂປນ ເຊິ່ງເຂົ້າຮ່ວມພິທີມີສະຫາຍ ພັນເອກ ຄຳເພັດ ສຸລິຍະວົງ ຫົວໜ້າການທະຫານກອງບັນຊາການທະຫານແຂວງສະຫວັນະເຂດ,ມີ ສະຫາຍ ພັນໂທ ບຸນລ້ອມ ສຸພະມີໄຊ ຮອງເລຂາພັກເມືອງ,ມີຄະນະນຳຂອງເມືອງເຂົ້າຮ່ວມ.ສະຫາຍ ພັນໂທ ບຸນລ້ອມ ສຸພະມີໄຊ ກໍ່ໄດ້ກ່າວສະແດງຄວາມຂອບອົກຂອບໃຈຕໍ່ການນຳກອງບັນຊາການທະຫານແຂວງກໍ່ຄືກົມທະຫານຊານແດນ ແລະ ກອງບັນຊາການທະຫານຊາຍແດນຫວຽດນາມ,ທີ່ໄດ້ນຳເອົາເຂົ້າສານຈ້າວຈຳນວນ 12 ໂຕນ ມາມອບໃຫ້ ແລະ ຢືນຢັນວ່າເຂົ້າສານຈຳນວນດັ່ງກ່າວນີ້ຈະນຳໄປມອບໃຫ້ຄອບຄົວທີ່ໄດ້ຮັບຜົນກະທົບຈາກໄພນຳ້ຖ້ວມໃນເດືອນຕຸລາ 2020 ຜ່ານມາໃຫ້ທົ່ວເຖິງແນ່ນອນ.

ພາບ-ຂ່າວ: ພານິດ ພິລາວົງ ທະຫານແຂວງສະຫວັນນະເຂດ