ປະທານປະເທດຈີນ ສະເໜີແຜນວົງຈອນຄູ່ ຟື້ນເສດຖະກິດໂລກ ຫຼັງໂຄວິດ

525

ທ່ານ ສີ ຈິ້ນຜິງ ປະທານປະເທດ ແຫ່ງ ສປ ຈີນ ໄດ້ກ່າວປາໄສໃນກອງປະຊຸມແບບທາງໄກ ການຮ່ວມມືດ້ານເສດຖະກິດອາຊີ – ປາຊີຟິກ ( ເອເປັກ ) ໃນວັນທີ 19 ພະຈິກຜ່ານມາ ທີ່ນະຄອນຫຼວງກົວລາລຳເປີ ປະເທດມາເລເຊຍ ວ່າ: ການທີ່ຈະເຮັດໃຫ້ເສດຖະກິດໂລກຟື້ນຕົວໄດ້ນັ້ນ ຕ້ອງເລີ່ມຈາກການຜະລິດທີ່ມີຄວາມເຂັ້ມແຂງຈາກພາຍໃນປະເທດຂອງຕົນ ເຊິ່ງຈະສ້າງຄວາມສົມດຸນໃຫ້ແກ່ກົນໄກລະຫວ່າງປະເທດ ແລະ ຊ່ວຍໃຫ້ໂລກຟື້ນຕົວເປັນລຳດັບ ຫຼັງໂລກຕ້ອງປະເຊີນວິກິດການຢ່າງໜັກໜ່ວງ.

ທ່ານ ສີ ຈິ້ນຜິງ ກ່າວວ່າ: ວິກິດດ້ານສາທາລະນະສຸກຄັ້ງນີ້ ເປັນໜຶ່ງໃນຄວາມທ້າທາຍຫຼາຍດ້ານ ທີ່ໂລກກຳລັງປະເຊີນ, ການຮ່ວມມືຢ່າງມີປະສິດທິພາບຂອງປະຊາຄົມໂລກ ຄືຫົນທາງນຳໄປສູ່ໄຊຊະນະ ແລະ ການສະແຫວງຫາແນວທາງການຟື້ນຟູຢ່າງຍືນຍົງຮ່ວມກັນ, ສຳລັບ ສປ ຈີນ ນັ້ນ ໄດ້ເນັ້ນການຜະລິດ ແລະ ການບໍລິໂພກພາຍໃນປະເທດເປັນຫຼັກ ເພື່ອເປັນພື້ນຖານໃຫ້ແກ່ການຟື້ນຟູຕັ້ງແຕ່ລະດັບຮາກຖານທ້ອງຖິ່ນ ເຊິ່ງເປັນແຜນຍຸດທະສາດ “ ວົງຈອນຄູ່ ” ເຊິ່ງຈີນ ຊຸກຍູ້ສົ່ງເສີມມານານຫຼາຍທົດສະວັດແລ້ວ ນັ້ນຄືເສດຖະກິດທີ່ເຕີບໂຕຈາກພາຍໃນຢ່າງໝັ້ນຄົງ, ຄວາມແຂງແກ່ນດັ່ງກ່າວຈະນຳມາເຊິ່ງຄວາມສົມດຸນໃຫ້ແກ່ຕະຫຼາດ ທັງພາຍໃນ ແລະ ຕ່າງປະເທດ.

ໃນຂະນະດຽວກັນ ຈີນ ຍັງໄດ້ປ່ຽນແນວຄິດດ້ານການພັດທະນາໃໝ່ ໂດຍປະເມີນຈາກສະຖານະການປັດຈຸບັນ ແລະ ການປ່ຽນແປງຈາກປັດໄຈພາຍນອກ, ພ້ອມທັງຮັບຟັງຂໍ້ສະເໜີຈາກທຸກປະເທດ ເພື່ອນຳໄປສູ່ການເພີ່ມສັດສ່ວນການນຳເຂົ້າສິນຄ້າຄຸນນະພາບສູງ, ການຫຼຸດກຳແພງພາສີ ເພື່ອຊ່ວຍເຫຼືອຕົ້ນທຶນການຜະລິດ.

ທ່ານ ສີ ຈິ້ນຜິງ ຍັງກ່າວເຖິງການຮ່ວມມືດ້ານການຄ້າລະຫວ່າງປະເທດ ໃນຍຸກໂລກາພິວັດ ຕ້ອງກ້າວໄປຂ້າງໜ້າເທົ່ານັ້ນ ແລະ ຈີນ ຈະບໍ່ເຫັນດີນຳ ກ່ຽວກັບການໃຊ້ນະໂຍບາຍດ້ານເສດຖະກິດທີ່ເປັນການຕັດຂາດ ຫຼື ການແບ່ງແຍກລະບົບເສດຖະກິດຂອງຕົວເອງອອກຈາກປະເທດໃດໜຶ່ງຢ່າງເດັດຂາດ.