ຜົນກວດໂຄວິດ-19 ຂອງຜູ້ນຳບຣາຊິນ ຍັງເປັນບວກ

588

ສຳນັກຂ່າວຕ່າງປະເທດລາຍງານຈາກນະຄອນຫຼວງບຣາຊີເລຍ ປະເທດບຣາຊິນ ເມື່ອວັນພຸດ ທີ 22 ກໍລະກົດ ວ່າ ປາລາຊິໂອ ຄາ ອັລວາໂຣດາ ເຊິ່ງເປັນຊື່ຂອງທຳນຽບປະທານາທິບໍດີແຫ່ງບຣາຊິນ ຖະແຫຼງການເມື່ອວັນພຸດ ກ່ຽວກັບອາການປ່ວຍຈາກໂຄວິດ-19 ຂອງປະທານາທິບໍດີຊາອີ ໂບລໂຊນາໂຣ “ດີຂຶ້ນຕາມລຳດັບ” ນັບຕັ້ງແຕ່ຢືນຢັນກວດພົບເຊື້ອເປັນບວກ ເມື່ອວັນທີ 7 ກໍລະກົດ ຜ່ານມາ. ທັງນີ້, ປັດຈຸບັນ ທ່ານໂບລໂຊນາໂຣ ອາຍຸ 65 ປີ ເຂົ້າຮັບການກວດຜົນເປັນຄັ້ງທີ 3 ເມື່ອວັນອັງຄານ ຜ່ານມາ ແຕ່ຜົນກວດຍັງເປັນບວກ ແລະ ຜູ້ນຳປະເທດບຣາຊິນຕ້ອງສືບຕໍ່ປະຕິບັດຕາມຂະບວນການປິ່ນປົວທາງການແພດ.

ຂະນະທີ່ ກະຊວງສາທາລະນະສຸກບຣາຊິນລາຍງານສະຖິຕິກ່ຽວກັບໂຄວິດ-19 ໃນຮອບ 24 ຊົ່ວໂມງ ຜ່ານມາ ຢືນຢັນພົບຜູ້ຕິດເຊື້ອໃໝ່ 67.860 ຄົນ ເປັນສະຖິຕິປະຈຳວັນຄັ້ງໃໝ່ ແລະ ເພິ່ມຈຳນວນຜູ້ປ່ວຍສະສົມໃນປະເທດ ຢ່າງໜ້ອຍ 2.227.514 ຄົນ ສ່ວນສະຖິຕິຜູ້ເສຍຊີວິດສະສົມຢ່າງໜ້ອຍ 82.771 ຄົນ, ເພິ່ມຂຶ້ນ 1.284 ຄົນ ໂດຍສະຖິຕິທັງຜູ້ເສຍຊີວິດ ແລະ ຜູ້ປ່ວຍສະສົມ ຢູ່ອັນດັບສອງຂອງໂລກຮອງຈາກສະຫະລັດ ອາເມຣິກາ.