ແຫ່ຮູບຫຼໍ່ພະເຈົ້າໄຊຍະເຊດຖາທິຣາດ ສູ່ຫໍທຳມະສະພາ ຄົບງັນຕາມປະເພນີ

649

ຄະນະຮັບຜິດຊອບໂຄງການກໍ່ສ້າງອະນຸສາວະລີ ພະເຈົ້າໄຊຍະເຊດຖາທິຣາດ ໄດ້ແຫ່ຮູບຫຼໍ່ພະເຈົ້າໄຊຍະເຊດຖາທິຣາດ ພ້ອມຊົງຊ້າງ ມາຈັດພິທີທາງສາສະໜາທີ່ຫໍທຳມະສະພາ, ວັດທາດຫຼວງເໜືອ ເພື່ອເປີດໃຫ້ມວນຊົນໄດ້ມາຮ່ວມບຸນໂມທະນາປັດໄຈຕ່າງໆ ກ່ອນຈະເຄື່ອນຍ້າຍລົງແຂວງອັດຕະປື ໃນວັນທີ 26 ກໍລະກົດທີ່ຈະມາເຖິງນີ້.

ໃນວັນທີ 21 ກໍລະກົດ 2020 ຄະນະຮັບຜິດຊອບໂຄງການກໍ່ສ້າງອະນຸສາວະລີພະເຈົ້າໄຊຍະເຊດຖາທິຣາດ ໄດ້ແຫ່ຮູບຫຼໍ່ພະເຈົ້າໄຊຍະເຊດຖາທິຣາດ ພ້ອມຊົງຊ້າງ ຈາກບ້ານຈອມມະນີ ມາທີ່ຫໍທຳມະສະພາ ( ວັດທາດຫຼວງເໜືອ ) ເມືອງໄຊເສດຖາ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ຈຸມມາລີ ໄຊຍະສອນ ອະດີດປະທານປະເທດ ສປປ ລາວ, ມີ ທ່ານ ພົງໄຊ ໄຊຍະເສນາ ປະທານ ບໍລິສັດ ວັງຕັດຂຸດຄົ້ນບໍ່ແຮ່ ໃນນາມເຈົ້າພາບ ພ້ອມດ້ວຍການນຳແຂວງອັດຕະປື ແລະ ພໍ່ແມ່ປະຊາຊົນເຂົ້າຮ່ວມ.

ທ່ານ ສຸກສະໄໝ ຈັນທະມາດ ອະດີດຮອງເຈົ້າແຂວງອັດຕະປື ໃຫ້ສຳພາດວ່າ: ຂ້າພະເຈົ້າຮູ້ສຶກເປັນກຽດ ແລະ ດີໃຈເປັນຢ່າງສູງທີ່ໄດ້ຕາງໜ້າປະຊາຊົນບັນດາເຜົ່າແຂວງອັດຕະປື ທີ່ໄດ້ມາຮັບ, ອັງເຊີນເອົາຮູບຫຼໍ່ຂອງພະເຈົ້າໄຊຍະເຊດຖາທິຣາດ ໄປປະດິດສະຖານຢູ່ແຂວງອັດຕະປື ເຊິ່ງເປັນບ່ອນທີ່ເພີ່ນເຄີຍເຄື່ອນໄຫວໃນອະດີດຕະການ ພ້ອມໄດ້ສະແດງຄວາມຮູ້ບຸນຄຸນກັບປະຊາຊົນລາວບັນດາເຜົ່າໃນທົ່ວປະເທດທີ່ໄດ້ໃຫ້ການຮ່ວມມືສະໜັບສະໜູນ ແລະ ຫຼັງຈາກນີ້ຈະໄດ້ຈັດກິດກຳຂຶ້ນເພື່ອສະເຫຼີມສະຫຼອງ, ຄົບງັນທີ່ຕໍ່ໜ້າຫໍທຳມະສະພາ ແລະ ເຮັດພິທີກຳທາງສາສະໜາ ໃນເວລາ 8:00 ໂມງ ເປັນຕົ້ນໄປ ລະຫວ່າງວັນທີ 21 – 26 ກໍລະກົດ 2020 ເຊິ່ງໃນວັນທີ 26 ກໍລະກົດ ຕອນເຊົ້າຈະມີພິທີຕັກບາດພະສົງ 39 ອົງ ຕາມອາຍຸຂອງເຈົ້າໄຊຍະເຊດຖາທິຣາດ.

ຈາກນັ້ນກໍຈະແຫ່ລົງໄປວັນທີ 27 ກໍລະກົດ ຈະໄປພັກແຮມ ແລະ ຄົບງັນຢູ່ແຂວງບໍລິຄຳໄຊ; ວັນທີ 28 ກໍລະກົດ ເຄື່ອນລົງແຂວງຄຳມ່ວນ; ວັນທີ 29 ແມ່ນຢູ່ແຂວງສະຫວັນນະເຂດ ແລະ ວັນທີ 30 ຢູ່ແຂວງຈຳປາສັກ ແລະ ວັນທີ 31 ຈະເຄື່ອນຍ້າຍລົງໄປຮອດແຂວງອັດຕະປື ພ້ອມຕອນຄໍ່າຈະມີພິທີສູດ, ມື້ຖັດໄປຈະມີພິທີຕັກບາດ ແລະ ຍົກຮູບຫຼໍ່ຂຶ້ນໄວ້ແທ່ນປະດິດສະຖານຢູ່ອະນຸສາວະລີຢູ່ບ້ານຫາດຊາຍຂາວ ເມືອງໄຊເສດຖາ ແຂວງອັດຕະ ປື. ທັງນີ້, ຕະຫຼອດການແຫ່ລົງໄປສູ່ແຂວງອັດຕະປື ຂໍເຊີນຊວນບັນດາພໍ່ແມ່ປະຊາຊົນຢູ່ບັນດາແຂວງທາງຜ່ານຜູ້ມີຈິດໃຈ ເຫຼື້ອມໃສ ຫຼື ໃສສັດທາ ກໍສາມາດປະກອບກິດຈະກຳຕ່າງໆຮ່ວມກັນໄດ້.

ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ຜູ້ຮັບຜິດຊອບໂຄງການກໍ່ສ້າງອະນຸສາວະລີ ພະເຈົ້າໄຊຍະເຊດຖາທິຣາດ ໃຫ້ສຳພາດກ່ອນໜ້ານີ້ວ່າ: ໂຄງການກໍ່ສ້າງອະນຸສາວະລີ ພະເຈົ້າໄຊຍະເຊດຖາທິຣາດ ຢູ່ແຂວງອັດຕະປື ເປັນໂຄງການລະດັບຊາດທີ່ໄດ້ລິເລີ່ມມາແຕ່ປີ 2014 ໄດ້ຮັບການແຕ່ງຕັ້ງຄະນະກຳມະການຊີ້ນຳຈາກນາຍົກລັດຖະມົນຕີ, ຜ່ານມາຄະນະກໍໄດ້ມີການຄົ້ນຄວ້າເນື້ອໃນ, ຮູບແບບ, ການຄິດໄລ່ອອກແບບຕ່າງໆ ແລະ ມາຮອດປັດຈຸບັນການກໍ່ສ້າງພື້ນທີ່ສວນອະນຸສາວະລີແມ່ນສຳເລັດຂັ້ນພື້ນຖານແລ້ວ ເປັນຕົ້ນແມ່ນການສ້າງແທ່ນຕັ້ງອະນຸສາວະລີ, ອະນຸສາວະລີ ພະເຈົ້າໄຊຍະເຊດຖາທິຣາດ ແມ່ນໄດ້ເທຫຼໍ່ດ້ວຍທອງເຫຼືອງບໍລິສຸດ ມີນໍ້າໜັກ 18 ໂຕນ ຮູບຊົງອົງແມ່ນປະທັບ ຫຼື ຂີ່ຊ້າງປະທານພອນ ຫຼໍ່ສຳເລັດແລ້ວ 100% ລວມມູນຄ່າໂຄງການທັງໝົດ 39 ຕື້ກີບ.

ພະຍອດຄຳພັດທະຣະເກສີ ( ປອ. ດຳຣົງ ພິມມະຈັກ ) ຄະນະບໍລິຫານງານປະຈຳການ, ຫົວໜ້າຫ້ອງການບໍລິຫານງານ, ຫົວໜ້າກັມມາທິການການຕ່າງປະເທດ ສູນກາງອົງການພຸດທະສາສະໜາສັມພັນແຫ່ງ ສປປ ລາວ ໄດ້ກ່າວວ່າ: ສັດທາສ້າງແມ່ນຄອບຄົວຂອງ ທ່ານ ຈູມມາລີ ໄຊຍະສອນ ອະດີດປະທານປະເທດ ສປປ ລາວ ແລະ ບໍລິສັດ ວັງຕັດຂຸດຄົ້ນບໍ່ແຮ່ ທີ່ເປັນເຈົ້າພາບເຈົ້າສັດທາຫຼໍ່ຮູບສົມເດັດພະເຈົ້າໄຊຍະເຊດຖາທິຣາດ ມະຫາກະສັດຂອງລາວເຮົາທີ່ມີຜົນງານອັນໂດດເດັ່ນ, ເປັນບັນພະບຸລຸດຜູ້ທີ່ມີຄຸນອັນໃຫຍ່ຫຼວງຕໍ່ປະເທດຊາດ ເຊິ່ງຮູບຫຼໍ່ແມ່ນຫຼໍ່ຈາກທອງເຫຼືອງໜັກເຖິງ 18 ໂຕນ ເພື່ອຈະນຳໄປປະດິດສະຖານຢູ່ອະນຸສາວະລີບ້ານຫາດຊາຍຂາວ ເມືອງໄຊເສດຖາ ແຂວງອັດຕະປື.