ກອງປະຊຸມອາຊຽນສະເໜີຮ່ວມມືຕໍ່ຕ້ານກັບໂຄວິດ-19

511

ສຳນັກຂ່າວເອເອັຟພີ ແລະ ຣອຍເຕີ ລາຍງານຈາກນະຄອນຫຼວງຮາໂນ່ຍ ປະເທດຫວຽດນາມ ເມື່ອວັນອັງຄານ ທີ 14 ເມສາ ວ່າ ທ່ານຫງວຽນຊວັນຟຸກ ນາຍົກລັດຖະມົນຕີຫວຽດນາມ ໃນຖານະປະເທດປະທານສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ໄດ້ກ່າວໃນພິທີເປີດກອງປະຊຸມສຸດຍອດວາລະພິເສດ ຮ່ວມໂດຍ 3 ປະເທດອາຊີຕາເວັນອອກຈີນ, ຍີ່ປຸ່ນ ແລະ ເກົາຫຼີໃຕ້ (ອາຊຽນ+3) ໂດຍຜ່ານລະບົບອອນໄລນ໌ ຫຼື ວິດິໂອຄອນເຟີເຣນ ຈາກນະຄອນຫຼວງຮາໂນ່ຍ ໄດ້ຮຽກຮ້ອງກັບບັນດາຜູ້ນຳອາຊຽນ ສ້າງຕັ້ງກອງທຶນສຸກເສີນ ເພື່ອຕໍ່ສູ້ກັບການແຜ່ລະບາດຂອງໄວຣັສໂຄວິດ-19 ຂະນະທີ່ເຊື້ອດັ່ງກ່າວກຳລັງສ້າງຄວາມເສຍຫາຍຢ່າງໜັກ ໃຫ້ແກ່ອຸດສາຫະກຳທ່ອງທ່ຽວ ແລະ ເສດຖະກິດທີ່ເພິ່ງມາການສົ່ງອອກ.

ທ່ານຫງວຽນຊວັນຟຸກ ໄດ້ກ່າວເຕືອນວ່າ ການລະບາດຂອງໄວຣັສໂຄວິດ-19 ສົ່ງຜົນກະທົບຮ້າຍແຮງຕໍ່ຊີວິດຂອງປະຊາຊົນ ລວມທັງສະພາບການທາງເສດຖະກິດ ແລະ ສັງຄົມໃນອາຊຽນ. ນອກຈາກນັ້ນ, ຍັງທ້າທາຍກັບສະຖຽນລະພາບ ແລະ ຄວາມໝັ້ນຄົງຂອງສັງຄົມດ້ວຍ ພ້ອມກັບຮຽກຮ້ອງໃຫ້ເປີດເສັ້ນທາງການຄ້າທີ່ຖືກປິດຍ້ອນການລະບາດຂອງໄວຣັສ ເພື່ອຊ່ວຍເຫຼືອແຮງງານ, ການສົ່ງອອກອາຫານ ແລະ ແຕ່ລະປະເທດຄວນເພິ່ມອຸປະກອນການແພດໃນຄັງສຳຮອງໃຫ້ພຽງພໍດ້ວຍ.