ລະດູຮ້ອນອາດບໍ່ຊ່ວຍຂ້າເຊື້ອໂຄວິດໃຫ້ໝົດສິ້ນໄປ

515

ທ່ານ ທາເຄຊິ ຄາຊາອິ ຜູ້ອໍານວຍການເຂດອາຊີປາຊີຟິກຂອງອົງການອະນາໄມໂລກ ເຕືອນວ່າ: ການລະບາດຂອງໂຄວິດ-19 ໃນເຂດອາຊີປາຊີຟິກຍັງບໍ່ຈົບລົງ ແລະ ການຕໍ່ສູ້ກັບພະຍາດດັ່ງກ່າວເປັນວຽກທີ່ຕ້ອງໃຊ້ເວລາຍາວນານ ເຊິ່ງອົງການອະນາໄມໂລກຍັງບໍ່ສາມາດນິ້ງນອນໃຈ ແລະ ທຸກປະເທດຈະຕ້ອງມີມາດຕະການຮັບມືສະຖານະການໃຫ້ເໝາະສົມກັບເນື້ອທີ່ແຕ່ລະປະເທດ.

ປັດຈຸບັນຍັງບໍ່ສາມາດບອກໄດ້ວ່າບັນຫາການລະບາດໃຫຍ່ທົ່ວໂລກນີ້ຈະດໍາເນີນຕໍ່ໄປອີກດົນປານໃດ ເນື່ອງຈາກບໍ່ມີຫຼັກຖານບົ່ງຊີ້ວ່າອຸນຫະພູມທີ່ສູງຂຶ້ນໃນໄລຍະລະດູຮ້ອນຈະເຮັດໃຫ້ອັດຕາການລະບາດຫຼຸດລົງຄ້າຍຄືຫຼາຍຄົນຄາດຫວັງ.

ສູນກາງການລະບາດມີທ່າອ່ຽງຍ້າຍທີ່ໄປເລື້ອຍໆ, ສ້າງຄວາມທ້າທາຍໃຫ້ກັບລະບົບສາທາລະນະສຸກໂດຍສະເພາະເມື່ອມີທ່າອ່ຽງວ່າການລະບາດຈະຍ້ອນກັບມາສູ່ອາຊີອີກຄັ້ງ.

ການລະບາດຂອງພະຍາດເລີ່ມຈາກເມືອງອູ່ຫັ້ນ ແຂວງຫູເປີຍຂອງຈີນ ຈາກນັ້ນຈໍານວນຜູ້ຕິດເຊື້ອສູງຫຼາຍໃນ ສ.ເກົາຫຼີ, ອີຣານ, ອິຕາລີ, ແອັດສະປາຍ ຂ້າມໄປອາເມຣິກາ. ຫຼ້າສຸດຜູ້ຊ່ຽວຊານດ້ານສຸຂະພາບໃຫ້ຮູ້ວ່າສູນກາງການລະບາດສ່ຽງຍ້າຍທີ່ໄປເລື້ອຍໆສ້າງຄວາມທ້າທາຍໃຫ້ກັບລະບົບສາທາລະນະສຸກທົ່ວໂລກ.