ອິນໂດເນເຊຍ ສ້າງໂຮງໝໍພາກສະໜາມຢູ່ເກາະກາລັງ

640

ສຳນັກຂ່າວຕ່າງປະເທດລາຍງານຈາກນະຄອນຫຼວງຈາກາຕາ ປະເທດອິນໂດເນເຊຍ ເມື່ອວັນສຸກ ທີ 3 ເມສາ ວ່າ ປະທານາທິບໍດີໂຈໂຄ ວິໂດໂດ ໄດ້ລົງສຳຫຼວດພື້ນທີ່ເກາະກາລັງ ເຊິ່ງເປັນເກາະຂະໜາດນ້ອຍຕັ້ງຢູ່ພື້ນທີ່ຫ່າງໄກ ໃນເຂດເມືອງບາຕຳ ແລະ ເປັນສ່ວນໜຶ່ງຂອງເກາະສຸມາຕຣາ ເມື່ອວັນພຸດ ຜ່ານມາ ເພື່ອກວດກາເບິ່ງຄວາມຄືບໜ້າຂອງການກໍ່ສ້າງໂຮງໝໍພາກສະໜາມ ສຳລັບການປິ່ນປົວຜູ້ຕິດເຊື້ອໄວຣັສໂຄໂຣນາສາຍພັນໃໝ່ ຫຼື ໂຄວິດ-19 ເທິງເກາະກາລັງເຊິ່ງເປັນພື້ນທີ່ບໍ່ມີຄົນອາໄສຢູ່.

ສຳລັບໂຮງໝໍຊົ່ວຄາວແຫ່ງນີ້ ມີຕຽງຮອງຮັບຜູ້ປ່ວຍ 360 ໜ່ວຍ ອຸປະກອນການແພດພື້ນຖານທີ່ຈຳ ເປັນ ແລະ ພື້ນທີ່ສະເພາະສຳລັບການກັກບໍລິເວນ. ທັງນີ້ ທ່ານວິໂດໂດ ກ່າວວ່າ ໂຮງໝໍຈະສາມາດເປີດໃຫ້ບໍລິການ ໃນວັນຈັນທີ 6 ເມສາ ນີ້, ອີກປະການໜຶ່ງເກາະກາລັງແຫ່ງນີ້ເຄີຍເປັນສະຖານທີ່ຕັ້ງສູນພັກພິງໃຫ້ກັບຜູ້ລີ້ໄພ ຫຼາຍກວ່າ 250.000 ຄົນ ຈາກສົງຄາມຫວຽດນາມ ໂດຍເປີດດຳເນີນການຈົນຮອດປີ 1993.

ລະຫວ່າງວິກິດການລະບາດຂອງໄວຣັສໂຄວິດ-19 ປະເທດອິນໂດເນເຊຍປະສົບກັບບັນຫາດຽວກັນກັບທຸກປະເທດໃນໂລກ ຄືການຂາດແຄນອຸປະກອນການແພດ ແລະ ສູນເສຍບຸກຄະລາກອນການແພດ ເຊິ່ງຖືເປັນ “ນັກຮົບແນວໜ້າ” ຂອງການຄຸຄາມເຊື້ອລະບາດຄັ້ງນີ້ ໂດຍຈາກຈຳນວນຜູ້ເສຍຊີວິດສະສົມ ຈາກໂຄວິດ-19 ໃນອິນໂດເນເຊຍ ຢ່າງໜ້ອຍ 170 ຄົນ ເປັນບຸກຄະລາກອນແພດຢ່າງນ້ອຍ 12 ຄົນ ແລະ ຜູ້ເສຍຊີວິດອາຍຸນ້ອຍທີ່ສຸດເປັນເດັກຍິງ ອາຍຸ 11 ປີ ສ່ວນຜູ້ປ່ວຍສະສົມ ຢ່າງໜ້ອຍ 1.790 ຄົນ ແລະ ປິ່ນປົວເຊົາແລ້ວ 112 ຄົນ.