ກຳປູເຈຍ ສັ່ງປິດຄາຊິໂນທົ່ວປະເທດ ຫຼຸດຄວາມສ່ຽງການຕິດເຊື້ອໂຄວິດ-19

516

ຄາສິໂນທັງໝົດໃນປະເທດກຳປູເຈຍຖືກສັ່ງປິດຊົ່ວຄາວ ໃນວັນພະຫັດນີ້ ເພື່ອຫຼຸດການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່.

ສຳນັກຂ່າວຕ່າງປະເທດລາຍງານຈາກນະຄອນຫຼວງພະນົມເປນ ປະເທດກຳປູເຈຍ ເມື່ອວັນຈັນ ທີ 30 ມີນາ ວ່າ ສົມເດັດຮຸນເຊັນ ນາຍົກລັດຖະມົນຕີຂອງກຳປູເຈຍ ໄດ້ຖະແຫຼງການເມື່ອວັນຈັນ ວ່າ ຄາສິໂນທົ່ວປະເທດແມ່ນໃຫ້ປິດບໍລິການແບບບໍ່ມີກຳນົດ ຕັ້ງແຕ່ 11:59 ໂມງ ຕາມເວລາທ້ອງຖິ່ນ ຂອງວັນທີ 1 ເມສາ 2020 ເຊິ່ງເປັນມາດຕະການຫຼ້າສຸດຂອງລັດຖະບານ ເພື່ອປ້ອງກັນການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ ຫຼື ໂຄວິດ-19″ ໃນປະເທດ.

ທັງນີ້ ຄຳສັ່ງຂອງນາຍົກລັດຖະມົນຕີກຳປູເຈຍ ມີຂື້ນໄດ້ບໍ່ດົນ ຫຼັງຈາກກະຊວງສາທາລະນະສຸກກຳປູເຈຍ ລາຍງານມີຜູ້ຕິດເຊື້ອໄວຣັສໂຄວິດ-19 ເພິ່ມອີກ 4 ຄົນໃນປະເທດ ເພິ່ມສະຖິຕິຜູ້ປ່ວຍສະສົມ 107 ຄົນ. ໂດຍຜູ້ປ່ວຍໃໝ່ເປັນຊາຍຊາວຝຣັ່ງ ອາຍຸ 61 ປີ ມີປະຫວັດການເດີນທາງເຂົ້າມາປະເທດກຳປູເຈຍ ເມື່ອວັນທີ 22 ມີນາ ຜ່ານມາ ແລະ ຊາຍ ຄົນກຳປູເຈຍ ອາຍຸ 30 ປີ ເປັນພະນັກງານຂອງຄາຊິໂນແຫ່ງໜຶ່ງ ໃນເມືອງປອຍເປດ ແຂວງບັນເຕຍມຽນເຈັຍ ທີ່ມີຊາຍແດນຕິດກັບ ປະເທດໄທ.