ອັງກິດເຂັ້ມງວດ! ຫ້າມປະຊາຊົນອອກຈາກເຮືອນ ຫາກບໍ່ຈໍາເປັນເຖິງທີ່ສຸດ

513

ຈາກສະພາບການລະບາດຂອງໂຄວິດ-19 ທີ່ກໍາລັງແຜ່ລາມຢູ່ຫຼາຍປະເທດໃນທົ່ວໂລກ ເຮັດໃຫ້ທຸກປະເທດຕ້ອງມີມາດຕະການເຂັ້ມງວດຕໍ່ການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດດັ່ງກ່າວ, ຫຼ້າສຸດ ອັງກິດໄດ້ເຂັ້ມງວດບໍ່ໃຫ້ປະຊາຊົນອອກຈາກເຮືອນເດັດຂາດ ຫາກບໍ່ມີຄວາມຈໍາເປັນເຖິງທີ່ສຸດ.

F. Brinley Bruton ຂອງ NBC News ລາຍງານໃນວັນທີ 23 ມີນາຜ່ານມານີ້ວ່າ: ທ່ານ ບໍຣິສ ຈອນເຊິນ ນາຍົກລັດຖະມົນຕີສະຫະຣາຊະອານາຈັກອັງກິດ ໄດ້ປະກາດມາດຕະການເຂັ້ມງວດໃຫ້ປະຊາຊົນຢູ່ເຮືອນ, ຫ້າມອອກໄປໃສ ຖ້າວ່າບໍ່ມີວຽກຈຳເປັນທີ່ສຸດ ເຊິ່ງການປະກາດດັ່ງກ່າວມີຂຶ້ນຍ້ອນສະພາບການຕິດເຊື້ອພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ-19 ຢູ່ອັງກິດເພີ່ມຂຶ້ນເລື້ອຍໆ. ມາດຕະການດັ່ງກ່າວຈະປະຕິບັດໃນ 3 ອາທິດ ຈຶ່ງຈະປະເມີນຜົນຄືນ.

ຄຳຖະແຫຼງຂອງນາຍົກລັດຖະມົນຕີອັງກິດ ຍັງຊີ້ອອກວ່າ: ອາຊີບທີ່ມີຄວາມຈໍາເປັນ ເຊິ່ງເຮັດຢູ່ເຮືອນບໍ່ໄດ້ຈຶ່ງຈະໃຫ້ອອກໄປວຽກໄດ້ປົກກະຕິ, ສ່ວນປະຊາຊົນທົ່ວໄປຈະອອກເຮືອນໄປຕ້ອງມີຄວາມຈຳເປັນທີ່ສຸດ ເຊັ່ນ: ຊື້ເຂົ້າປາອາຫານ – ເຄື່ອງໃຊ້ຈຳເປັນໃນຊີວິດປະຈຳວັນ, ການໄປຫັດກາຍ ແລະ ໄປຫາແພດໝໍ.

ທ່ານ ບໍຣິສ ຈອນເຊິນ ຍັງກ່າວຕື່ມວ່າ: ປະຊາຊົນບໍ່ຄວນພົບປະກັນ ເພາະວ່າຈຳນວນຜູ້ຕິດເຊື້ອໃນປະເທດຍັງເພີ່ມຂຶ້ນ. ພ້ອມກັນນີ້, ອັງກິດຍັງໄດ້ສົ່ງກຳລັງຕຳຫຼວດລົງຮັກສາຄວາມສະຫງົບຮຽບຮ້ອຍ, ຄວບຄຸມສະພາບ, ຖ້າມີການຂັດຄຳສັ່ງດັ່ງກ່າວກໍຈະຖືກປັບໃໝ, ຖ້າປະຊາຊົນເຕົ້າໂຮມກັນແຕ່ສອງຄົນຂຶ້ນໄປກໍຈະຖືກຕຳຫລວດເຂົ້າໄລ່. ສ່ວນຮ້ານຂາຍເຄື່ອງທຸກແຫ່ງທີ່ບໍ່ໄດ້ຂາຍສິນຄ້າຈຳເປັນຕໍ່ການດຳລົງຊິວິດຕ້ອງປິດບໍລິການຊົ່ວຄາວ, ຕະຫຼອດຮອດຫ້ອງສະໝຸດ, ເດີ່ນຫຼິ້ນຂອງເດັກນ້ອຍ, ສ່ວນສວນສາທາລະນະ ແມ່ນໃຫ້ປະຊາຊົນສາມາດໄປຫັດກາຍໄດ້ມື້ລະເທື່ອ, ສະເພາະການແຕ່ງດອງ ຫຼື ງານວິວາມຸງຄຸນແມ່ນຕ້ອງໂຈະ, ຍັງດຳເນີນໄດ້ແຕ່ການຊາປະນະກິດສົບ.

ມີລາຍງານຂ່າວຈາກສຳນັກຂ່າວກຽວໂດຂອງຍີ່ປຸ່ນວ່າ: ຫຼາຍບໍລິສັດໃນປະເທດອັງກິດ ໄດ້ປະກາດໃຫ້ພະນັກງານເຮັດວຽກຢູ່ກັບເຮືອນ, ສ່ວນລົດໂດຍສານສາທາລະນະກໍແລ່ນໜ້ອຍລົງ ເຊິ່ງໄດ້ບໍລິການສະເພາະອາຊີບທີ່ຈຳເປັນເທົ່ານັ້ນເປັນຕົ້ນແມ່ນແພດ.
ຂໍ້ມູນຈາກ: ປະເທດລາວ