ໄຟປ່າຫຍັບເຂົ້າໃກ້ເມືອງຫຼວງຂອງອົດສະຕຣາລີ

414

ຕາມຂ່າວເອເອຟພີລາຍງານຄວາມຄືບໜ້າສະຖານະການໄຟປ່າໃນອົດສະຕຣາລີວ່າຄວັນໄຟສີດໍາຈາກໄຟທີ່ໄໝ້ປ່າໃນເຂດທາງຕາເວັນອອກລອຍເຂົ້າສູ່ນະຄອນຫຼວງ ແຄນເບີຣາ ຂອງອົດສະຕຣາລີທ່າມກາງຄວາມພະຍາຍາມຂອງໜ່ວຍງານປົກກັນ ແລະ ມອດໄຟທີ່ຍັງລະດົມກໍາລັງປະຕິບັດໜ້າທີ່ເຖິງວ່າຈະສາມາດຄວບຄຸມໄຟປ່າໄດ້ແລ້ວກວ່າ140ຈຸດ.

ແຕ່ສໍານັກງານອຸຕຸນິຍົມວິທະຍາແຫ່ງຊາດອົດສະຕຣາລີລາຍງານວ່າ:ກະແສອາກາດຮ້ອນຈະພັດຜ່ານທົ່ວປະເທດໃນໄລຍະຫຼາຍມື້ຕໍ່ໜ້າ ແລະ ອາດຈະເຮັດໃຫ້ສະຖານະການໄຟປ່າຮ້າຍແຮງຕໍ່ເນື່ອງໂດຍສະເພາະໃນລັດນິວເຊົາເວວເຂດປະສົບໄຟປ່າຮ້າຍແຮງທີ່ສຸດ,ຄາດຄະເນວ່າອຸນຫະພູມຈະເພີ່ມຂຶ້ນກາຍ40ອົງສາ.

ໝອກຄວັນໄຟປ່າອາດຈະລອຍຢູ່ເໜືອທ້ອງຟ້າເມືອງຫຼວງຈົນເຖິງຢ່າງໜ້ອຍວັນທີ12ເດືອນ ທັນວານີ້ຫຼັງຈາກທີ່ກະແສລົມແຮງຕາເວັນອອກພັດຄວັນໄຟມາເມືອງ ເບຣດວູດ ແລະ ແຄມຝັ່ງທະເລຂອງແຄນເບີຣາຕັ້ງແຕ່ວັນທີ8ເດືອນ ທັນວາທີ່ຜ່ານມາ.

ສ່ວນກະແສອາກາດຮ້ອນຈະເພີ່ມຈາກ36ອົງສາໃນວັນທີ9ເດືອນ ທັນວາເປັນ38ອົງສາໃນວັນທີ10,ແຕ່ເມື່ອກະແສຄວາມເຢັນພັດຜ່ານມາແລ້ວຈະຫຼຸດລົງເຫຼືອ34ອົງສາໃນວັນທີ11ເດືອນ ທັນວານີ້ ແລະ ລົງໄປຢູ່ທີ່23ອົງສາໃນວັນທີ13ເດືອນ ທັນວາ.