ຜູ້ເສຍຊີວິດ 16 ສົບທຳອິດຈາກ 39 ສົບ ຊາວຫວຽດນາມໃນອັງກິດ ຖືກສົ່ງກັບເຖິງປະເທດແລ້ວ

600

ສຳນັກຂ່າວຕ່າງປະເທດລາຍງານ 16 ສົບທຳອິດ ຈາກ 39 ສົບ ຜູ້ເສຍຊີິວິດຊາວຫວຽດນາມ ທີ່ພົບຢູ່ທ້າຍລົດບັນທຸກຫ້ອງເຢັນ ຫລັງລັກເຂົ້າປະເທດອັງກິດໃນເດືອນກ່ອນໜ້ານີ້ ຖືກສົ່ງກັບຫວຽດນາມແລ້ວ.

ເຈົ້າຫນ້າທີ່ ແລະ ສື່ຫວຽດນາມ ລາຍງານ 27 ພະຈິກ 2019 ວ່າ: 16 ສົບໄດ້ເດີນທາງເຖິງສະໜາມບິນ ໃນນະຄອນຫຼວງຮ່າໂນ້ຍ ໃນເຊົ້າຂອງວັນທີ 27 ພະຈິກ ແລະ ສົບຖືກສົ່ງຂຶ້ນລົດໂຮງໝໍ ໄປຍັງບ້ານເກີດຂອງຜູ້ຕາຍ ແລະ ສ່ວນສົບທີ່ເຫລືອຢູ່ຈະຖືກສົ່ງກັບປະເທດໃນພາຍຫລັງ.

ເຈົ້າໜ້າຕໍາຫຼວດຫວຽດນາມ ກ່າວວ່າ: ກ່ອນຫນ້ານີ້ ເສຍຊີວິດທັງຫມົດມາຈາກ 6 ແຂວງຄື: ນະຄອນຮາຍຟອງ (Hai Phong), ແຂວງຮາຍດວງ (Hai Duong), ເຫງະອານ (Nghe An), ຫ່າຕິ໋ງ (Ha Tinh), ກວ໋າງບິ່ງ (Quang Binh) ແລະ ນະຄອນເຫວ (Hue) ຄອບຄົວຂອງຜູ້ເສຍຊີວິດທັງໝົດມີອາຍຸລະຫວ່າງ 15-44 ປີ ຕ້ອງທຸກທໍລະມານ ແລະ ເຕັມໄປດ້ວຍຄວາມສັບສົນວ່າຈະນຳສົບຂອງຜູ້ເປັນທີ່ຮັກພວກເຂົາກັບບ້ານໄດ້ແນວໃດ.

ຕາມແຈ້ງການຂອງກະຊວງການຕ່າງປະເທດ ວັນທີ 14 ພະຈິກ ລະບຸວ່າ: ລັດຖະບານຫວຽດນາມ ໄດ້ຊຳລະຄ່າໃຊ້ຈ່າຍຂົນສົ່ງສົບຂອງຜູ້ເສຍຊີວິດລ່ວງຫນ້າແລ້ວ ຊຶ່ງຄອບຄົວຂອງຜູ້ເສຍຊິວີດ ຈະຊຳລະຄືນໃນພາຍຫລັງ ເຊິ່ງຄອບຄົວຕ່າງໆ ຈະຕ້ອງຈ່າຍຄ່າທໍານຽມໃນການນໍາສົບກັບປະເທດເປັນມູນຄ່າປະມານ 2.832 ໂດລາສະຫະລັດ ຫຼື ປະມານ 24 ລ້ານກວ່າກີບຕໍ່ສົບ.

ການຄົ້ນພົບສົບໃນຕູ້ຄອນເທນເນີໃນເຂດອຸຕສາຫະກໍາ ໃກ້ນະຄອນລອນດອນ, ປະເທດອັງກິດ ໄດ້ຄາດການເຊື່ອມໂຍງໄປຍັງທຸລະກິດຄ້າມະນຸດຜິດກົດຫມາບທີ່ຂົນສົ່ງຄົນທຸກຍາກຈາກອາຊີ, ອັບຟຣິກາ ແລະ ຕາເວັນອອກກາງ ຜ່ານການເດີນທາງທີ່ເຕັມໄປດ້ວຍອັນຕະລາຍມາຍັງດິນແດນຕາເວັນຕົກ.