ເກີດອຸບັດຕິເຫດຂົວແຂວນສະລິງໃນຝຣັ່ງຂາດ ເຮັດໃຫ້ລົດທີ່ແລ່ນຂ້າມຕົກລົງແມ່ນໍ້າ ເສຍຊີວິດ 1 ຄົນ

356

ຂົວຂ້າມຟາກທີ່ແຂວນດ້ວຍສະລິງ ເກີດອຸບັດຕິເຫດສະລິງຈ່ອງຂົວຂາດເຮັດໃຫ້ຕົວຂົວຫັກເພຖະຫຼົ່ມລົງ ລົດຫຼາຍຄັນທີ່ແລ່ນຜ່ານຂົວຕົກລົງແມ່ນໍ້າໃນປະເທດຝຣັ່ງ ມີຜູ້ເຄາະຮ້າຍເປັນເດັກຍິງອາຍຸ 15 ປີ ເສຍຊີວິດ ຂະນະ ກຳລັງຂີ່ລົດມາກັບແມ່ ແລະ ຍັງມີຜູ້ສູນຫາຍຫຼາຍຄົນ.

ສຳນັກຂ່າວຕ່າງປະເທດ ແລະ ເດິມິເຣີ ລານງານເມື່ອວັນອັງຄານ ທີ 19 ພະຈິກ ວ່າ ເກີດອຸບັດຕິເຫດເສົ້າສະຫຼົດ ເມື່ອ ຂົວແຂວນສະລິງຂ້າມແມ່ນໍ້າ ໃນປະເທດຝຣັ່ງ ເຊື່ອມລະຫວ່າງ ເມືອງເມຍປົວ-ຊົວ-ຕານ ແລະ ເມືອງບິຊິແອ ຫ່າງຈາກເມືອງຕູລູສ ໄປທາງທິດເໜືອ ປະມານ 30 ກິໂລແມັດ ເກີດສະລິງຈ່ອງຂົວຂາດ ເຮັດໃຫ້ຕົວຂວາຊຸດໂຕລົງ ເມື່ອເຊົ້າວັນຈັນ ທີ 18 ພະຈິກ ຕາມເວລາທ້ອງຖິ່ນ ເຮັດໃຫ້ລົດຫຼາຍຄັນທີ່ແລ່ນຜ່ານຂວາຕົກລົງໄປໃນແມ່ນໍ້າ ຜູ້ເຄາະຮ້າຍເປັນ ເດັກຍິງ ອາຍຸ 15 ປີ ເສຍຊີວິດ ຂະນະກຳລັງນັ່ງຢູ່ໃນລົດກັບແມ່ຂອງລາວ ນອກຈາກນີ້ ຍັງມີລົດບັນທຸກ ແລະ ລົດຄັນອື່ນຕົກລົງໄປໃນແມ່ນໍ້າເຊັ່ນກັນ.

ຜູ້ທີ່ເຫັນເຫດການຫຼາຍຄົນເລົ່າໃຫ້ນັກຂ່າວສະຖານີໂທລະທັດ BFMTV ຟັງດ້ວຍຄວາມຕົກໃຈ ວ່າ ພວກເຂົາໄດ້ຍິນສຽງດັງສະນັ່ນຄືກັບຟ້າຮ້ອງ ຂະນະທີ່ ພວກຕົນຢູ່ຫ່າງຈາກຂວາທີ່ເກີດເຫດ ປະມານ 150 ແມັດ ຈິ່ງຮີບຟ້າວອອກມາເບິ່ງ ແລະ ໄດ້ເຫັນຂົວແຂວນສະລິງຫັກພັງລົງ ຈົນເຮັດໃຫ້ລົດທີ່ແລ່ນຜ່ານມາຕົກລົງໄປໃນແມ່ນໍ້າ.

ຫຼັງຈາກເກີດເຫດຮ້າຍແຮງ ຂົວແຂວນດັ່ງກ່າວ ຕັ້ງຢູ່ໃນບໍລິເວນສະຖານທີ່ທ່ອງທ່ຽວທີ່ໄດ້ຮັບຄວາມນິຍົມຫຼາຍ ເຮັດໃຫ້ທາງການຝຣັ່ງ ລະດົມສົ່ງທີມງານກູ້ໄພ ກວ່າ 60 ຄົນ, ເຮລິຄອບເຕີ 3 ລຳ ໄປບ່ອນເກີດເຫດ. ຂະນະທີ່ ມີຜູ້ໄດ້ຮັບບາດເຈັບ ຢ່າງໜ້ອຍ 9 ຄົນ ໂດຍມີຜູ້ປະສົບເຫດ 4 ຄົນ ທີ່ຕົກລົງໄປໃນແມ່ນໍ້າ ແລະ ສາມາດລອຍຂຶ້ນຝັ່ງເອງໄດ້. ປັດຈຸບັນ ເຈົ້າໜ້າທີ່ຕຳຫຼວດກຳລັງດຳເນີນການສືບສວນໜ່ວຍງານທີ່ຮັບຜິດຊອບໃນການກວດກາດູແລຂົວແຂວນແຫ່ງນີ້.