ກຽມທຸບສະຖິຕິໂລກ! ເດັກນ້ອຍພອນສະຫວັນສູງ ໃກ້ຈະຈົບປະລິນຍາຕີ ດ້ວຍອາຍຸພຽງ 9 ປີ

400

ເມື່ອເວົ້າເຖິງລະບົບການສຶກສາທີ່ພວກເຮົາຄຸ້ນເຄີຍ ກວ່າເຮົາຈະຮຽນຈົບຈາກມະຫາວິທະຍາໄລໄດ້ນັ້ນ ໂດຍປກກະຕິຄົນທົ່ວໄປຈະໃຊ້ເວລາດົນ ເກືອບ 20 ປີ ນັບຕັ້ງແຕ່ອະນຸບານຈົນ, ປະຖົມ, ມັດທະຍົມຈົນຮອດປະລິນຍາຕີ.

ແຕ່ສຳລັບອ້າຍບ່າວນ້ອຍ ອາຍຸ 9 ປີ ຄົນໜຶ່ງທີ່ມີພອນສະຫວັນແຕກຕ່າງຈາກຄົນທົ່ວໄປ ເພາະວ່າ ໃນເດືອນທັນວາ 2019 ນີ້ ຕົວລາວກຳລັງຈະຮຽນຈົບຈາກມະຫາວິທະຍາໄລແລ້ວ.

ຊື່ຂອງບ່າວນ້ອຍຄົນນີ້ ກໍ່ຄື ທ້າວລໍເຣັນ ຊິມອນສ໌ (Laurent Simons) ອາຍຸ 9 ປີ ເຊິ່ງກຳລັງຈະຮຽນຈົບປະລິນຍາຕີສາຂາວິສະວະກຳໄຟຟ້າ.

ທ້າວລໍເຣັນ ເປັນເດັກຊາຍຊາວດັດ ຫຼື ເປັນຄົນປະເທດໂຮນລັງ ຜູ້ທີ່ເຄີຍຖືກຍ້ອງຍໍວ່າ ເປັນເດັກທີ່ມີພອນສະຫວັນ ມາຕັ້ງແຕ່ເກີດ ພ້ອມກັບ IQ 145 ແລະ ເທັກນິກການຈື່ຈຳເປັນຮູບພາບ ກາຍເປັນເດັກທີ່ຈື່ຈຳ ແລະ ຮຽນຮູ້ໄດ້ໄວກວ່າຄົນທົ່ວໄປຫຼາຍ.

ລໍເຣັນ ສາມາດສອບເສັງທຽບ ແລະ ໃຊ້ເວລາຮຽນ ລະດັບມັດທະຍົມ ພຽງປີເຄິ່ງ ຫຼື 18 ເດືອນເທົ່ານັ້ນ ຫຼັງຈົບມັດທະຍົມ ຕອນອາຍຸ 8 ປີ ກໍ່ຮຽນຕໍ່ພາກວິຊາວິສະວະກຳໄຟຟ້າ ຈາກມະຫາວິທະຍາໄລເທັກໂນໂລຢີ ໄອໂອເຝນ (Eindhoven University of Technology).

ລໍເຣັນ ຮຽນໃນວິທະຍາໄລມາໄດ້ 9 ເດືອນແລ້ວ ແລະ ໃນທັນວານີ້ ລາວກຳລັງຈະຈົບການສຶກສາລະດັບປະລິນຍາຕີໃນສາຂານີ້ ເຊິ່ງຈະເປັນການທຳລາຍສະຖິຕິໂລກ ອີງຕາມການບັນທຶກຂອງກິນເນສບຸ໊ກ  (Guinness book).

ລໍເຣັນ ກຳລັງຈະທຳລາຍສະຖິຕິຂອງ ໄມເຄິລ ເຄຍນີ່ (Michael Kearney) ຜູ້ທີ່ເຄີຍຈົບການສຶກສາລະດັບປະລິນຍາຕີ ຕອນອາຍຸ 10 ປີ.

ທ່ານ Sjoerd Hulshof ຜູ້ອຳນວຍການມະຫາວິທະຍາໄລ ກ່າວວ່າ ໂດຍປົກກະຕິແລ້ວ ທາງຄະນະອະທິການບໍດີຈະອະນຸຍາດໃຫ້ນັກສຶກສາທີ່ມີລັກສະນະ ຫຼື ຄວາມສາມາດພິເສດ ແລະ ມີເຫດຜົນທີ່ສົມເຫດສົມຜົນ ຫຼື ນັກກິລາທີ່ສ້າງຊື່ສຽງໃຫ້ມະຫາວິທະຍາໄລ ມີສິດສາມາດເລືອກຈັດຕາຕະລາງການຮຽນຂອງຕົນເອງໄດ້.

ແຕ່ໃນກໍລະນີຂອງ ລໍເຣັນ ຍິ່ງເປັນເລື່ອງທີ່ພິເສດຫຼາຍກວ່ານັ້ນ ສຳລັບພວກເຮົາ.

ແຕ່ສາສະດາຈານ ປີເຕີ ບັລຕັສ (Peter Baltus) ທີ່ເປັນຄູຂອງ ລໍເຣັນ ກ່າວວ່າ ກ່ອນໜ້ານີ້ລາວເຄີຍມີລູກສິດຄົນໜຶ່ງທີ່ສະຫຼາດກວ່າຄົນທົ່ວໄປຫຼາຍ ແຕ່ ລໍເຣັນ ມີຄວາມສະຫຼາດຫຼາຍກວ່າລູກສິດຄົນເກົ່າ ເຖິງ 3 ເທົ່າ.

ຂະນະດຽວກັນ ອາເລັກຊານເດີ (Alexander) ແລະ ລີເດຍ (Lydia) ພໍ່ແມ່ຂອງ ລໍເຣັນ ທັງສອງກໍ່ບໍ່ໄດ້ແປກໃຈເລີຍ ສ່ວນໜຶ່ງກໍ່ເນື່ອງມາຈາກທັງສອງຜົວເມຍເຮັດວຽກດ້ານການແພດ ຈຶ່ງເຂົ້າໃຈເຖິງຄວາມແຕກຕ່າງຂອງລູກໄດ້ເປັນຢ່າງດີ.

ສິ່ງທີ່ທັງສອງກັງວົນຫຼາຍກວ່ານັ້ນ ກໍ່ຄືການໃຊ້ຊີວິດຂອງລູກຊາຍ ທີ່ກັງວົນວ່າ ລູກຈະບໍ່ຮັບຮູ້ເຖິງຄວາມຮູ້ສຶກມ່ວນຊື່ນຕາມໄວຂອງເດັກທີ່ມີອາຍຸຮຸ່ນດຽວກັນ.

ຢ່າງໃດກໍ່ຕາມ, ນອກເໜືອຈາກເລື່ອງການສຶກສາແລ້ວ ລູກກໍ່ເຮັດກິດຈະກຳຕ່າງໆ ຕາມໄວຂອງເດັກ ອາຍຸ 9 ປີ ຄືກັບຄົນທົ່ວໄປເຮັດ ເຊັ່ນ: ອອກໄປຫຼີ້ນນຳໝູ່, ນັ່ງຫຼິ້ນເກມຢູ່ເຮືອນ ຫຼື ເພີດເພີນໄປກັບການນອນເບິ່ງໜັງໃນເນັດຟິກຊ໌.

ແລະ ລູກກໍ່ຍັງບອກວ່າ ເລື່ອງການຮຽນຮູ້ບໍ່ແມ່ນຄວາມກົດດັນສຳລັບລາວເລີຍ ມັນຄືສິ່ງໜຶ່ງທີ່ລາວມັກຢູ່ແລ້ວ ໂດຍສະເພາະດ້ານວິສະວະກຳໄຟຟ້າ ລວມໄປເຖິງເລື່ອງການແພດທີ່ລາວເລີ່ມເອົາໃຈໃສ່ກັບດ້ານນີ້ແດ່ແລ້ວ.

ງານອະດິເຫຼກທີ່ເພີ່ມເຂົ້າມາໃນຕອນນີ້ ຈຶ່ງເປັນເລື່ອງຂອງການພັດທະນາອະໄວຍະວະທຽມ

ໃນອະນາຄົດ ລໍເຣັນ ວາງແຜນທີ່ຈະຮຽນດ້ານວິສະວະກຳໄຟຟ້າຈົນຈົບປະລິນຍາເອກ ຄຽງຄູ່ກັບການສຶກສາທາງການແພດໄປນຳ ລວມທັງສຶກສາປະລິນຍາຕີດ້ານສິລະປະທີ່ຈະຕາມມາໃນອະນາຄົດ

ລູກຊາຍມີຄວາມຕັ້ງໃຈທີ່ຈະຮຽນໃຫ້ຈົບທັງໝົດ ປະລິນຍາຕີວິສະວະກຳສາດ, ປະລິນຍາຕີວິທະຍາສາດ ແລະ ປະລິນຍາຕີສິລະປະ ກ່ອນອາຍຸ 17 ປີ ເຊິ່ງເຊື່ອວ່າ ຖ້າ ລໍເຣັນ ມີຄວາມຕັ້ງໃຈແທ້ໆ ລາວກໍ່ຈະເຮັດໄດ້ຕາມທີ່ລາວຕ້ອງການຢູ່ແລ້ວ.