ຕົວເມືອງໃຫຍ່ທົ່ວໂລກກະຕຸ້ນເສດຖະກິດຍາມຄໍ່າຄືນ

367

ຫຼາຍເມືອງໃຫຍ່ທົ່ວໂລກພະຍາຍາມຈະຊຸກຍູ້ເສດຖະກິດດ້ວຍນະໂຍບາຍຕ່າງໆເຊັ່ນດຽວກັບຈີນທີ່ສ້າງຮູບແບບຕົວເມືອງທີ່ບໍ່ມີວັນຫຼັບໄຫຼຢ່າງນະຄອນ ນິວຢອນຂອງອາເມຣິກາ ແລະ ນະຄອນຫຼວງ ລອນດອນຂອງອັງກິດດ້ວຍການກະຕຸ້ນເສດຖະກິດໃນຕອນຄໍ່າຕັ້ງແຕ່6ໂມງແລງຈົນເຖິງ6ໂມງເຊົ້າໃຫ້ກັບມາຄຶກຄັກເຕັມໄປດ້ວຍມວນຊົນ.

ໃນສະພາບທີ່ເສດຖະກິດໂລກມີບັນຫາຕະຫຼອດຮອດຄວາມເຄັ່ງຕຶງທາງການຄ້າລະຫວ່າງອາເມຣິກາກັບຈີນນະໂຍບາຍສໍາຄັນຢ່າງໜຶ່ງຂອງລັດຖະບານຈີນໃນໄລຍະທີ່ຜ່ານມາຄືການສົ່ງເສີມການບໍລິໂພກພາຍໃນປະເທດເພື່ອທົດແທນການສົ່ງອອກ  ແລະ ການລົງທຶນທີ່ຫຼຸດໜ້ອຍຖອຍລົງ.

ມີຄໍາສັບຄໍາໜຶ່ງທີ່ກໍາລັງໄດ້ຮັບຄວາມນິຍົມໃນວົງການເສດຖະສາດ ແລະ ນະໂຍບາຍຂອງຈີນນັ້ນຄືເສດຖະກິດໃນຍາມຄໍ່າຄືນໂດຍມີຄວາມໝາຍເຖິງຂະແໜງເສດຖະກິດທີ່ຢູ່ໃນໄລຍະເວລາຕັ້ງແຕ່6ໂມງແລງໄປຈົນເຖິງ6ໂມງເຊົ້າ.

ຂະແໜງເສດຖະກິດໃນໄລຍະເວລານີ້ມັກຢູ່ໃນຫົວໜ່ວຍທຸລະກິດບໍລິການເປັນຫຼັກເຊິ່ງກົງກັບອີກຈຸດເນັ້ນໜຶ່ງຂອງການປະຕິຮູບເສດຖະກິດຈີນຄືການສົ່ງເສີມການບໍລິການທົດແທນພາກອົດສາຫະກໍາທີ່ເລີ່ມບໍ່ຂະຫຍາຍຕົວໂດຍຫົວໜ່ວຍທະລະກິດບໍລິການຈະສາມາດດຶງດູດແຮງງານໄດ້ເປັນຈໍານວນຫຼາຍ ແລະ ຍັງເປັນຕະຫຼາດແຮງງານທີ່ມີການກະຈາຍລາຍໄດ້ດີກວ່າພາກອຸດສາຫະກໍາເນື່ອງຈາກລາຍໄດ້ມັກຈະກະຈາຍເຖິງມືຜູ້ໃຫ້ບໍລິການໂດຍກົງຕ່າງຈາກອຸດສາຫະກໍາທີ່ມີຄົນມັກໄດ້ສ່ວນແບ່ງລາຍໄດ້ໜ້ອຍເມື່ອປຽບທຽບກັບເຈົ້າຂອງໂຮງງານ.

ໃນເດືອນ ສິງຫາທີ່ຜ່ານມາ,ຄະນະລັດຖະມົນຕີຫາກໍປະກາດແຜນການສົ່ງເສີມເສດຖະກິດໃຫ້ເປັນໜຶ່ງໃນນະໂຍບາຍຊຸກຍູ້ເສດຖະກິດພາຍໃນປະເທດເພື່ອຮັບມືກັບເສດຖະກິດທີ່ຂະຫຍາຍຕົວຊ້າລົງຫຼັງຈາກນັ້ນເມືອງໃຫຍ່ໆໃນຈີນເຊັ່ນນະຄອນຫຼວງ ປັກກິງ,ຊຽງໄຮ,ກວາງເຈົາ,ເສິນເຈິນ ແລະອື່ນໆລ້ວນແຕ່ມີການອອກນະໂຍບາຍພັດທະນາເສດຖະກິດໃນຍາມຄໍ່າຄືນຂອງແຕ່ລະເມືອງ.

ທັງນີ້ມີລາຍງານຂ່າວວ່າ:ທາງນະຄອນ ຊຽງໄຮຍັງແຕ່ງຕັ້ງຜູ້ຮັບຜິດຊອບເສດຖະກິດ ແລະ ຜູ້ບໍລິການເຂດເສດຖະກິດໃນຍາມຄໍ່າຄືນຂຶ້ນມາເປັນການສະເພາະນໍາ.

ຕົວຢ່າງຂອງນະຄອນ ຊຽງໄຮ ຖືວ່າສະແດງໃຫ້ເຫັນແນວທາງການພັດທະນາຂອງຈີນທີ່ມີການຕັ້ງໂຈດໃໝ່ໆເພື່ອເນັ້ນໜັກແກ້ໄຂບັນຫາບາງຢ່າງລວມທັງມີການສ້າງຕັ້ງຜູ້ຮັບຜິດຊອບໂດຍກົງ ແລະ ປະສານງານກັບພາກສ່ວນຕ່າງໆທັງຍັງມີການປະຊາສໍາພັນຈົນກາຍເປັນຮູບແບບໃໝ່ໃນສັງຄົມຈົນໄດ້ແຮງສະໜັບສະໜູນ ແລະ ພະລັງສ້າງສັນຈາກພາກເອກະຊົນນໍາອີກ.

ປັດຈຸບັນມີພິພິທະພັນ,ສູນການຄ້າ ແລະ ໂຮງໝໍຫຼາຍແກ່ງໃນເມືອງໃຫຍ່ຂອງຈີນເລີ່ມຕໍ່ເວລາປິດເຮັດວຽກຫຼືຈັດເຂດພິເສດທີ່ເປີດຈົນຄໍ່າເຖິງເຊົ້າ.ນອກຈາກນັ້ນຍັງມີການຄິດຮູບແບບທຸລະກິດໃໝ່ໆເຊັ່ນຮ້ານໜັງສື ແລະ ຮ້ານກາເຟ24ຊົ່ວໂມງເພື່ອຕອບສະໜອງຄວາມຮຽກຮ້ອງຕ້ອງການຂອງກຸ່ມລູກຄ້າໄວໜຸ່ມ,ນັກຮຽນທີ່ຕ້ອງການສະຖານທີ່ອ່ານໜັງສືຫຼືໄວໜຸ່ມມັກທ່ຽວເຊິ່ງຫາບ່ອນນັ່ງຫຼິ້ນຫຼັງຈາກທ່ຽວໃນຕອນຄໍ່າແລ້ວ.

ເມືອງໃຫຍ່ເຫຼົ່ານີ້ຍັງພັດທະນາຕະຫຼາດກາງຄືນທີ່ມີສີສັນເຕັມໄປດ້ວຍຮ້ານນ້ອຍໆລວມທັງມີຈຸດຂາຍເຄື່ອງທັງອາຫານ ແລະ ສິນຄ້າຕ່າງໆ,ຕະຫຼາດເຫຼົ່ານີ້ຍັງກາຍເປັນສະຖານທີ່ທ່ອງທ່ຽວໃໝ່ຂອງເມືອງໄປໃນຕົວ.

ນອກຈາກນີ້ຍັງມີການພັດທະນາການປະດັບໄຟແສງສີໃນຍາມຄໍ່າຄືນໂດຍສະເພາະໃນເຂດທ່ອງທ່ຽວຫຼືໃຈກາງເມືອງໃຫ້ມີຄວາມງົດງາມເພື່ອສົ່ງເສີມໃຫ້ມວນຊົນອອກມາຍ່າງຫຼິ້ນ,ຖ່າຍຮູບ ແລະ ໃຊ້ຈ່າຍໃນຍາມຄໍ່າຄືນນໍາໄປສູ່ການເພີ່ມຕົວເລກການບໍລິໂພກເຊິ່ງໃນທີ່ສຸດກໍຈະໄປເພີ່ມຕົວເລກການຂະຫຍາຍຕົວຂອງຈີດີພີຂອງເມືອງນັ້ນໆ.